احب كلك
**********
خِلّك ما صرت لوما خليلي أتصير
وصرت خِلّي برضاتك جي صرت خِلّك
علّمتك عليّه من الألف للياء
وتغلط بالا جابه
وآنه أعدّلّك
حرثت لخاطرك بالروح حرث الكاع
بوسات أو ورد كل خلكي أشتلّك
شمعة انته بحياتي
أو عمري ظلمة ليل
اشعلت روحي و خفت
ما اشعللك ... أشعلك ... ؟؟
خاف أسنين عمرك تحترك بالشوك
أضمّلك كمت من عمري اعزلّك
عليك اتسودنت مو بس أخاف اعليك
احل روحي و اكضّك خايف تحلّك
و اغمض من أشوفك و اخدر اعله الصوت
غلطة انته بحياتي و صعبه ما ازلّك
جم إبليس اطرد من يوزني اعليك
و جم شيطان ارجمه أبروحي و اكتلّك
ما صيرن نبي بس راهب آنه اوياك
بآيات ألمحبه أبشوك ارتّلّك
شلّي بغيرك انته و ألكه مثلك وين
و تتعب تلكه غيري بهلتعب شلّك
ياهو ألعلمك و اتريد تمشي أبعيد
سلّ الشوك باجر خايف ايسلّك
مثل ظلّك جنت* بالخطو *نمشي اثنين
و مشيت انته بظلام* و ضيّعت ظلّك
دلّيني عليك أسنين تايه بيك
و امشي وياي ادورك خاطر أندلك
عرّفني عله شخصك رايد احجي وياك
بس كلمه و بعد ما غيرهه انكلك
وحده ... من اثنين
أو وحده راح اختار
لو كلّك أحبّك
لو أحب كلّك
اسأل ليش احبك حته اكلك ليش
وليش شما تسوّي وياي أقبلّك
لحظة موت عمري اسنيني كلهن خوف
بس اوياك أأمّن لمّن أوصلّك
و انته آخر نفس واشكد عزيز أتصير
و بلحظة الموت تريدنه انملّك ... ؟؟
خيط عله الجرح باللحم صرت اوياي
لو كلّ الجروح اتطيب ما فلّك
تعرف كلشي بيّه و ما اعرف اشبيك
لغز حلّك ، لغز ، من يكدر ايحلّك ... ؟
أشرد حته اجيك و مدري ليش الخوف
خاف تخاف مني بسدّك اختّلّك
مثل ظلّك أظل و الليل يكضي الليل
و من تطلع شمس من طولك أنزلّك جبار رشيد
