الدنيا مو دنية عشك ياابن الحلال ....... جبارشيد
الدنيا مو دنيا عشك ياابن الحلال
لاتخلينا بمحبتك ننجبر
انت ابن العافية وابن الدلال
واحنه ولد الموت ربانه الفقر
وبينه وبينك فرق كلش جبير
ومانكول اسباب كل هذا الفرق
ومانكمل السالفة الحد الاخير
من الاساس وياك مسدودة الطرق
ويانة ماترهم ومانرهم محال
وياك مانكدر ندوم ونستمر
وياهو كلك بالسهل درب الوصال
وانت تدري دروبنه مورثة جمر
منين اجيت وبالعشك عندك يقين
منين اجيت وياهو سوالك درب
انطيني مهلة وخلي اشوفاً وضعي زين
خلي اشوف انوب هم اكدر احب
كلبي تيهته وشرد ماادري وين
وانه صار سنين ماعندي كلب
وخالي كلبك وانت عندك جمال
كل جمال الكون يمك يعتذر
نبع شفتك يعني كلماتك زلال
والعطش بالروح تارك جم فطر
الدنيا مو دنيا عشك ياابن الحلال
منين اجيبلك خلك يرهم عليك
وانت آية من الحسن واحلى الدلع
وآنه يافرحة الاحطها ابين اديك
وآنه بجفوفي عمر شلت الوجع
وحتى ماعندي ابتسامة من ارد اجيك
وليش تشلع كلبك بكلب انشلع
وليش تطلع خاسر ومشلول حال
وتترك الضحكة وعليمن تنقهر
راجع افكارك بعد عندك مجال
ليش بيه تريد كلبك ينكسر
ادري بيك تحبني ماداعي الكلام
وادري بدموعك صدك تبجيلي
من تجيني لاتكلمني بغرام
وعفية عوف الشوك لاتحجيلي
آنه ليلي بلاية واهس ماانام
شلون لو صرت انت واهس ليلي
وشلون لو حبيت شكلك والخصال
وشلون لو باجر تروح وتعتذر
هم ترد لمن اكللك تعال
وتنتظر لمن اكلك انتظر
الدنيا مو دنيا عشك ياابن الحلال
واحنة عدنه الحب يعني الحب عذاب
ولازم من نحب نذب بالحب فلك
ولازم نحب باب بيتك والتراب
ونحب كلشي العايد وراجع الك
ونحب ناسك كلها الشيب وية الشباب
ولازم نحب كل عمامك وي هلك
ولازم نحبك نحب الخال خال
وكل هذني شوية لتكول شكثر
احنة ماعدنة العشك صفنه وخيال
احنة من نحب نطك وننفجر
الدنيا مو دنيا عشك ياابن الحلال
انخاف من حبك لان حبك جديد
ذهب جنه وياهو اليشوفة انعجب
والمشاعر فقره معضدها حديد
وانت يم الفقره لطلع الذهب
وياك مانصقل بعد لا مانعيد
عوفنه ولتكول بينولي السبب
احنة ماعدنة جواب الأي سؤال
لان من شفناك تيهنه الفكر
هم شفت فد يوم كالو للدلال
ليش متحملة حضن نار الجمر
الدنيا مو دنيا عشك ياابن الحلال
ولاتخلينا بمحبتك ننجبر
