واااااااااي ي امي اللحقينيي،ي امي اللحقيني😭
امي :ي بت مالك في شنو بسم الله؟
انا:ولدك هيثم وراااي عايز يضربني ي امي امسكيهو مني😭
امي:ي بت وينو هو م شايفاه
امي اتلفتت يمين يسار م لقت اثري ,وبقت تقول:ي بت شهد طيرتي وين انتي؟
انا:يمه انا تحت السرير هيثم لو سألك قولي ليهو م. عارفه مكانها😭
امي:عملتي شنوو انتي كنتي وين ي الشقيهه،،
فجأة اسمع ليك صوت هيثم بقول وينها ليها الحيوانه دي شهد اطلعي لي بره سرعهه😡
امي:ي ولد ها بسم الله في شنو مالك
هيثم:امي انا بتك دي مليون مرة قولته ليها م تطلع من البيت تتقاطع لي قدام الفرم ولا البقاله ولا البوتيك ،الليله م بخليها تقعد تسلم لي على الأولاد كمان وينها هي 😡
امي:ي ولد هوووي روق كدة وقول لي اي واحدة فيهن ؟
هيثم:كيف اي واحدة فيهم ي امي انتي عارفه في البيت دة ماف واحدة رجلينها م اخوات وجنها تحوم في الحله غير شهد؟
امي:بري والله شهد من البيت م طلعت اسي كانت نايمه هنا جنبي
هيثم:وينها اسي؟ي امي بالله م تقعدي تدافعي وتضاري لي بتك ساااي انا والله بناتك ديل الا اضبحهم ليك عشان بتضاري ليهم😡
امي:ي ولد هوووي كدة اهدا وقول بسم الله مالك عليهن كدة اقعد واشرب ليك فنجان جبنه عاد كان ضبحتهن البغسل ليك وبكوي ليك منو ولما تجي جعان تقول ي منو😂
هيثم:امي عليك الله شوفتي خلاص م تعملي لي حركاتك دي عشان تنسيني انا زاتي طالع 😡
امي:خلاص غوووور بس اوعى بعدين تجي تكابس تقول لي داير غداء فاهم؟
هيثم:اي م داير زاتو يلا وطلع مشى
قولته ليها يمه خلاص مشى؟
قالت لي اي مشى تعالي مارقه يمرق روحكك طرتي وين انتي ي بت فورتي دم اخوك كدة؟قولته ليها دقيقه اطلع اخخخخ شعري مسك في العنقريب ،قالت لي اطلعي براحه ي السجم وقولي لي مالك مع اخوك؟طلعته وقولته ليها يمه والله مشيت اشتري تسالي من حبوبه هاديه بره قدام البقاله ولقاني منتصر سلم علي وهيثم المتخلف دة شافني فجأة احس ليك بي حاجه بتلبعني في ضهري طاااخ ،وم مرة واحدة بس اكتر من مرة،😭😂بقيت اصرخ وااي ي امي وااي واتلفته لقيتو هيثم بالمفراكهه،قال لي تكزبي كمان واقفه تتونسي وتتفاصحي مع ابراهيم صحبي وتقولي لي سلمتي بس،ولسه مصرر يضربني امي مسكتو وقالت ليهو ي ود هووي احترم نفسك والله الليله لمن ابوك يجي يلا امشي من هنا شالت المفراكه ولبعتو بيها😂💔قال ليها ي امي انتي خاربه البنات ديل لكن كويس والله لو م حرشته فيكم ابوووي م ابقى اسمي هيثم اصبرو بس😡💔امي قالت ليهو امشي من وشي م دايرة قله ادب معاك لمن ابوك يجي😡💔طبعا انا من شدة الدقه م بقت لي حاره قعدته ليها في الأرض😂قالت لي قومي تقومي مجنونه انا مش قولته ليك م تطلعي من البيت دة مع المغارب؟كلمتك ولا م كلمتك ي الشقيه اسي الدق دة كدة كويس معاكي؟قولته ليها والله يمه مشيت اشتري تسالي 😭قالت لي تاكلي السم تسالي بلا موسخه لينا بيهو البيت ومالي ليك وشك حبوب م مستفيدة منو في شي 😡قولته ليها الليله لمن ابوي يجي اقسم بالله لو م كلمتو يقوم لي شنب😭هيثم جا راجع تاني قال لي م تقسمي سااي انتي اساسا بي شنبك ي المسترجله اسكتي سااي😂قولته ليهو على الأقل اغزر من حقكك 😛اثناء م نحن قاعدين كدة جات شموخ داخله برااحه لاقاها هيثم في الزقاق قال ليها ايواااااا تعالي تعالي تعالي كنتي وين ي بطه؟طبعا شموخ دي اختي الأكبر مني واساسا هي سبب مشاكلي كلها واسي انا الدقه دي جاتني بسببها لأنها طلعت تقابل حبيبها اللي هو ود جيرانا وقالت لي راقبي لي الشارع وهي عارفه انو بحصل كدة 😭😭😂قالت ليهو اجي كيف يعني مشيت وين من امس انا عندي مبادئ اللتهاب وبالليل كلمتك قولته ليك امشي جيب لي حبوب قولته لي عندي مباراة م ماشي اسي مشيت الصيدليه اشتريت لي حبوب وجيت مالك في شنوو؟قال ليها انتي مشيتي جبتي ليك حبوب بس ولا جبتي الصيدليه كلها؟طبعا كانت شايله كيس كبيير ،قالت ليهو اهاا دة فستان جايباهو من سناء لي عرس ناس عبدالرحيم ،عاينت لي بإستغراب وقالت لي شهد مالك 😨😱طبعا حيوانه وكل مره بتطلع منها زي الشعره من العجينه وانا بشيل الليله😭😂💔قولته ليها ملا تشقكك م عارفه م تسأليني😒🔪قالت لي الجن ولا النفسيات عموما انا مصدعهه والالتهاب عزبني عزاب ماشه اخد لي حبه وانوم ،هيثم قال ليها انتي كمان تاني غطي شعرك دة كويس لما تطيري مكان😒قالت ليهو سمح ودخلت جوة ،امي قالت لي قومي ي بت جهزي الغداء،قولته ليها والله م بجهز ليكم اي غدا وم بتغدأ لمن ابوي يجي😭هيثم قال لي تعالي ختي الأكل دة😡قولته ليهو ابييت تاكل السم 😡قلع نعالو من رجلو وعايز يجدعني بيها جريت دخلته الأوضه والضربه جات في الباب😂💔دخلته الغرفه لي شموخ لقيتها قاعدة وشايله ليها دبدوب في يدها وبتعاين فيهو قولته ليها كويس ي وسخه تاني قولي لي تعالي احرسي لي الشارع يحرسوك ناس الجيش قولي اميين😡قالت لي انتي ي حيوانه طيرتي وين لمن هيثم قبضك 😂😂😂😂😂😂😂😂😂💔قولته ليها م تسأليني مشيت اشتري تسالي بس ولقاني صحبو العارض سلم علي وعينك م تشوف الا النور اشوف ليك هيثم جاي علي فكيتها جريه الولد لمن اتخلع😂😂😂😂😂💔قالت لي واااااااي 😂😂😂😂قولته ليها واي في عينك والله دقه المفراكه دي م ببردها سااي ي ٱما تديني حاجه من الجابوهم ليك ديل☺قالت لي عفنهه والله م اديك😡💔قعدته اكورك ي هيثممم✊قالت لي هسسسسس انتي حيوانهه😡قولته ليها جيبي فتيل الريحهه ،قالت لي واااي ي شهد م تقولي كدة الا فتيل الريحهه😭😭😭😭😭تاني كوركته بأعلى صوتي ي هيييييثثثثثثثثثثثثم✊قالت لي خلاص بديك ليهو إنطمي الله لا جاب باقيك وشالت فتيييل الريحهه وجدعتو لي 😂والله قرب يتكسر لكن الحمدلله انا استاذة في الطيران💪قولته ليها تعجبيني وانتي بتسمعي الكلام 😘قالت لي انشاءالله م ينفعكك ي تييييييييييييييييييييت😡فتحته فتيل الريحه وقعدته اتريح قولته ليها ي سلااااام يااااخ عندي كم شهر مفلسه وم عندي حق الريحهه😌👋قعدت تعاين لي بغيييظ وهي ساكته😂💔طلعته منها مشيت شلته المقشاشه وقعدته اكنس في الحوش وأغني سااي غنيه(الليله وييين انا الفي العصر مرورو💃بجيب لي مرايا ومرايا بعاين ليك برايا حبيبي حبيب قسايا كلام الناس دعايا ومعاك انا للنهاية💃💃💃💃فجأة اسمع ليك صوت بقول لي :ودة منو تعيس الحظ دة انشاءالله؟،كانت سلمى بت جيرانا طوالي جدعته المقشاشه وجبته البمبر وطلعته ليها قولته ليها انتي مالك ومالو ي وسخخه😒😂قالت لي احساس عايزة تقنعيني انو عندك حبيب وكدة😂قولته ليها اي عندي😌قالت لي بطلي وهمنه انتي عارفه وانا عارفه م تعملي لي فيها البت الخطيرة لأنو زول بعاين ليك ماف 😂😂😂😂💔قولته ليها الله ينعلك 😒قالت لي هييي م وريتكك عاااد لقيت الليله ماريا في الشارع م عرفتها وبعلي بس،قولته ليها ليه مالها😱قالت لي وبعلي بقت خطيييرة واتكلبظت كدة ي يمه عاااد م عرفتها لمن زي إفترت كدة😭قولته ليها ماريا الواحدة دي بقت زول انتي جادة😱قالت لي عااد م فضل بنات في الحله شينات وخشنات وم بتقابلن غيرنا ي شهد ووووب علي نمشي وين نحن بس كدة قولي لي الناس دي كلها جاهزة لعرس ناس عبدالرحيم الا نحن بعدين في الحفله لو جا ماري فينا المصور نودي وشوشنا الزي طرابيز اللحام دي وين😭 قولته ليها بري ونحن البقعدنا قدام شنوو؟بعد نضمن العشاء حقنا نشيلو ونمشي نقزقز ورا م دايرين نتصور زاتو 😂✊قالت لي الله ينعلك اصلا طوول م انا مبارياك كدة حأفضل معولقه كدة شهد انا والله لمن اشوف بت مجيهه وسمحه ونايرة بنفسن وبقول هي مالها احسن مني في شنو نفسي نبقى زي البنات ياخ 😡قولته ليها بس برضو العشاء اهم البجو قاشرات ديل م بتعشن افهمي نظام بريستيجهم وكدة😂قالت لي حيييييييي انا شهد حتجلطيني الله ياخدكك😡قولته ليها ي بت اساسا العولاق دة حقنا نفارقو وين؟ 😂✊قالت واسمعي تسنيم الليله وقفتها عربيه في الميدان عاااد تسوو كدي👋قولته ليها انتي م عارفه انو تسنيم دي اساسا بتاعت عربات ؟قالت لي عااد بسماحتها دي عندها حق😒قولته ليها بعدين ارح نمشي ليها اشعر بالشمار😂😂😂😂✊قالت لي وووووب ي شهد نمشي ليها كيف انا كان لقيت مظفر اخوها دة بتدردق في محلي وم بعرف اتصرف 😭قولته ليها ااي عشان كدة ارح يمكن تصطاديهو ي هبلهه😂قالت لي لكن هو م بعاين لي اشكالي دي م تحاولي تواسيني😥قولته ليها اي انا عارفه م بعاين لي اشكالك دي لأنو الود هاااي ي بت وانتي م بتنحسبي مع البنات زاتك زي زيك واحد لكن ارح نضفي بصرك سااي بشوفتو ولد زي طعميه الصباح حاارة كدة وتنزل في القلب زي العسل يم يم يم😋قالت لي الجووع اليفطسكك انتي بس همكك كلو أكل وبعد دة كلو أكل السوسه والعافيه المدسوسه م ظاهر فيك😒قولته ليها الله ياخدكك دايما بتحبطيني يلا م دايرة اشوف وشكك طيري من وشي،قالت لي لاحظي لي انو انتي الطالعه في حيطه بيتنا☺قولته ليها تبيتي في الحراصهه😒قبل م أنزل باب الشارع فتح عايزة أتلفت اعاين الجا منو البنبر رماني بقيت اصرخ واقول واااي رجلي😭ابوي الكان في الباب قعد يعاين لي ولا إشتغل بي زاتو😂💔قولته ليهو ابووي تعال ارفعني رجلي واجعاني😭😭😭💔قال لي ي بت هوووي الجن اليكسرك المطلعك هنا شنو؟انا مش قولته ليك م اللقاك تاني متعلقه لي في حيطهه؟سكتته وبقيت ابكي، والله كمل مشيهو ولا اشتغل بي ودخل البيت😂💔قمته على حيلي وماشه بالجلاله ياخ لمن جاتني دوخه من وقعة الأرض والله😂💔وصلته المطبخ امي قالت لي مالك ي بت؟قولته ليها يمهه وقعتهه من البنبر😭قالت لي تقعي في النار ي بت انتي فاضيه لي من السواطه مع سلمى؟النهار دة كلو متعلقات في الحيطه التقول ماف بيبان تمشو بيها اسي الوقعه دي ربنا اخد منك حق البت الكنتي بتقطعي فيها مع سلمى طيري فرشي لينا السراير دي في الحوش🔪😒قولته ليها وبتك شموخ دي بتعمل في شنو.د خليها تفرش ليكم والله انا لا بقدر لا شي 😭ابوي كان راقد في السرير وبقرا في جريدتو رقدته جنبو ،قال لي من عدم السراير يعني؟قولته ليهو دايرة احكي ليك بعمايل اولادك وامهم معاي😭ضحكك قال لي انا جنكك دة م دايرو😂💔
.......
طيب دقيقه أعرفكم على نفسي قبل م اكمل ، شهد حاليا عمري 25سنه ،خريجه من كليه التربيه درسته احياء دقيقه 😻اسرتي بتتكون من سبعه اشخاص بي امي وابوي ، مؤتمن اخووي الكبير خريج صيدله وشغال وشموخ اختي بعدو،وانا واقعه في الوسط😻بعدي جاي هيثم ااي اي اصغر مني بس نافخ ريشو ومؤدبنا أدب السواد عاد المعامله البعاملنا ليها هو مؤتمن م بعاملنا ليها 😭💔اصغر واحدة لينا إسراء اختي قليله أدب وامي م عرفت تربيها ولا قعدت ليها اساسا كانت ناسياها شكلها لأنها رافعه لينا الضغط بقله ادبها دي😡مع انها عامله لينا جو في البيت😂👋ابوي عندو مغلق شغال فيهو،اما امي تاجره بتاعت ملابس يعني ياها شغله النسوان بتجيب الملابس وبتوزعهم على نسوان الحله وبتسهل عليهم مشيه السوق ،اسرتي من الطبقه المتوسطه يعني لا فقراء لا أغنياء، بس عمرنا عينا م وقعت على حاجه ونحن عارفين انو ابونا م عندو إمكانيه يجيبها لينا،وعمرنا م قارنا وضعنا مع الأعلى مننا،وعمرنا م اتصنعنا حاجه عارفنها م حتكون لينا، وضعنا تمام الحمدلله بالنسبه للحالهم اسوأ مننا ،ابوووووي علمنا على القناعه والبساااطه وكان دايما بقول لينا القناعه بتكون شخصيه الزول،وم أنسى الأيه البزكرنا بيها على الدوام في كل حاجه بقول لينا ربنا قال (وإن شكرتم لأزيدنكم)...❤والأهم من كدة بقول لينا العفهه بتتمثل في إحترامك لزاتك ،بإختصار أبوي مدرستنا في الحياة وامي مرايا عاكسه ليهو كل تفاصيلو ..❤
#مليحيظه
الإسم دة كيف بالله الصيادله ،الدكاترة،ناس مختبرات والمجالاتهم متعلقه بالطب م غريب عليكم صح😁؟الباقي المساكين أبحثو عنو في قوقل لمن الله يقدرني وافهمكم المغزى منو شنو ،بالله م تضغطو علي في الحلقات ،😂👊💔سبب القصه دي في واحدة لاقيتها في لفه من لفات الريبليهات قالت لي انا مكتئبه وعايشه حاله نفسيه و...المهم همومها فوق راسها وحلفتني أكتب انشاءالله سطرين م عارفه بس القصه دي لعيونك انا م حبيت أكسر بخاطرك بس في الحقيقه ربنا أحن عليك من اااي زول ومن أي قصه تلجئي ليها علشان تنسي بيها همومك وزي م قولته ليك استغفري وحاولي أقري قراءن وإتقربي من ربنا صدقيني حتنسي كل همومك دي في كسسسر من الثانيه انتي بس قولي ي رب❤ والله يسعدك ياخ❤
يتبع.....
