الفصل الثالث عشر
بعد عدة ساعات
أتجه سمير لهارون الجالس في سيارة من سيارات الشرطة قائلاً..” عرفت كل الأماكن إلي ممكن تكون مستخبى فيها شوقي جلس بجانبه و أخرج خريطة للمدينة و أشار لعدة أماكن و قال ..” ده أقرب مكان للمكان اللي نزلوك فيه طبعاً إذا كانوا أغبيه و معملوش عملية تمويه عشان متنتبهش للوقت إلي وصلوك فيه “
هز هارون رأسه بصمت فسأله سمير بجدية ..” بجد أنت خرجت إزاي من الفندق من غير ما حد يشوفك “
نظر إليه هارون بلامبالاة قائلاً..” سؤال غبي زيك يا سمير هيكون إزاي يعني و أنا في الدور الرابع “
رد سمير بحنق ..” أنت متعرفش تجاوب من غير غلط و طولة لسان و سؤالي مش غبي على فكرة الفندق ملوش غير مدخل واحد يبقى منين يا ناصح “
مط هارون شفتيه بسخرية و قال ..” أولا أتصلت بالاستعلامات قلتلهم محدش يزعجني و لا يجي عندي الأوضة و الظاهر وشي المشلفط خلاهم يحسبوا أني تعبان و عايز أنام و بعدين نزلت الدور التاني و خبطت على الأوضة إلي تحت أوضتي بالظبط و أستنيت شويه و لما محدش فتح دخلت كانت فاضية دخلت الحمام و فتحت الشباك إلي كان كبير نوعا ما و فعلاً خرجت منه و أتشعلقت على المواسير زي الحرامية و نزلت تحت و الحمد لله محدش شفني “
قال سمير بتعجب ..” طيب ليه كل ده منزلتش من شباك أوضتك ليه طالما هو كمان بيوصلك لنفس المكان من الشارع الخلفى الي ورا الفندق “
رد هارون بسخرية ..” و لما أقع تتكسر رقبتي من الدور الرابع يا ناصح يا أخي راعي ظروفي دا أنا أكلت ضرب مكلهوش حمار في مطلع زي ما بيقولوا و مش قادر أحرك عضمة في جسمي و أنت عايزني أنزل زي البهلوان و أتشعلق على المواسير “
ضحك سمير بقوة و هو يقول بمرح ..” و الله يا هارون مش مصدق أنك مرفعتش إيدك على حد فيهم و استحملت كل ده “
قال هارون بضيق و خيال نسيم الخائفة يمر أمامه ..” و لما يأذوها يا سمير أعمل إيه ساعتها لا معايا سلاح و لا و لا أي حاجة حتى السكينة الصغيرة إلي ديما كانت معايا وقعت مني لما نزلت من القطر ورا الراجل إلي مراته كانت مخطوفة “
أبتسم سمير بمرح ..” بجد يا هارون أنت عشت مغامرة و لا في الأفلام أنت و البنت إلي معاك “
نهره هارون بحدة ..” بس متقولش عليها بنت دي مراتي يا فالح أتكلم عليها بأدب و دلوقت أتحرك كفاية تضيع وقت في الرغى بتاعك ده أنا كان لازم أطلب حسام أحسن منك عشان اريج دماغي “
ضحك سمير ..” أوامرك يا باشا مستني توجيهاتك “
قال هارون ..” أتحرك على أقرب مكان نزلوني فيه هنبدأ بيه الأول عشان منضيعش وقت أتمنى تكون هناك و نلاقيها “
أدار سمير السيارة و سأله ..” طيب و أخو شوقي عملت ايه في موضوعه لو ملقنهاش هناك “
نظر في ساعة يده و قال ..” متقلقش لسه ادامنا ساعتين و أنا كلمت حمايا العزيز هيتصرف لو الموضوع أتأزم هيجيب أخو شوقي بنفسه بعد ما كلم سيادة اللواء و فهمه إلي حصل هو منع ترحيل المساجين الوقت ده بس سمح أنه ممكن ناخد أخو شوقي على ضمنتي و هو عامل حسابه جايب رجاله تأكل الزلط زي إلي بنشوفهم في الأفلام يعني مش هيقدر يهرب منه “
ضحك سمير ..” أفلام أفلام إيه يا هارون مال تشبيهاتك كدا غريبة متقول حراسات خاصة و خلاص “
تنهد هارون متذكرا نسيم لو سمعت حديثه الآن لضحكت مرحا لقد بات يتحدث مثلها قال بضيق ..” كلمت باقي القوات عشان يحصلونا “
هز سمير رأسه ..” أيوة أطمن بعد تلات دقايق بس هيجوا و هيفضلوا بعيد مستنين أشارتك “
سأله محذرا ..” أكدت عليهم مفيش ضرب نار إلا بأشارة مني أنا مش عايز نسيم يجرالها حاجة “
طمئنه سمير ..” متخافش يا هارون أنا فهمتهم على كل حاجة أطمن “
أشار إليه بالتحرك قائلاً ..” طيب يلا أتحرك ربنا يستر “
أنت تقرأ
مطلوب ( الذئب) / صابرين شعبان
مغامرةهو مغرور و متهور يفعل ما برأسه و لا يطيع أوامر رؤسائه و دوماً يقع في المشاكل هى مجنونه تظن أن الحياة فيلم كبير و هى تعيش داخله تاركه الواقع خلفها ماذا يفعلان معا عندما يتقابلان على الطريق هارون و نسيم و إتنين على الطريق
