من بعد يومين عيطات ليا لوستي واحد العقرب مسمومة لسانها سابقها قالت ليا را بغات تجي لعندي تزورني و هادي اول مرة تجي بوحدها دخلات سولاتني قالت لي كيف دايرة انت و محمد قلت ليها الحمد الله مزيان ما كاين ما حسن من هاد الحال قالتلي مزيان منين الله هداه كنت هازة ليك الهم كيفاش غادي تكون حياتك معاه، قلت ليها علاش؟ قالتلي هيييي على لساني شنو قلت قلت ليها لا هانية غير خودي راحتك و عاودي ليا قالت لي متقلقيش مني ولكن راجلك كانو عندو مشاكل مع ماما طول فترة خطوبتك مكانش باغي يخطب ولا يتزوج و المشكلة ماشي فيك المشكلة فيه هو حيت عقلو معلق بهديك اللي متتسماش و ماماه قالت ليه الا مدازتش هاد الخطبة و الزواج على خير را غادي نسخط عليك حتال يوم الدين ما نتا ولدي ما انا مك شنو واش بغيتي تبقا هكا عايش على ذكراها و هي تزوجات و دارت لولاد و حتا نهار العرس ما كانش باغي يحضر حتا عيطات ليه ماما و هداتو و شبعاتو هضرة و سيفطاتلو خوتو عياو معاه هضرة عاد قبل بز منو، انا حسيت بالاهانة و الذل، كنت تنسمع البنت هي اللي تيبزو عليها تزوج اما الولد لا، كنت ديما تنسول راسي علاش تزوجني عمري فكرت تكون شي حاجة فحال هكا اسوء من انك تخيلهم....حاولت نضبط اعصابي قدام هاد المغيارة اللي جات تال داري باش تقهرني و بحالا باغا تبينلي ان واخا الناس كاملين يبغيوني هو مغيبغينيش انا قلت ليها هذاك غير ماضي و فات و فالاخير الراجل معندوش من غير مرتو و دارو و اي حاجة قبل منها را غير نزوات و انا تيهمني راجلي لأنه تيبغيني دبا و مدللني و تيبغيني نكون فرحانة و مناقصني والو....موراها بساعة مشيت لبيتي و سيفطت ميساج لختي قلت ليها شوية و صوني ليا فتلفون و اي حاجة قلتها ليك سيري معايا فالهضرة و حتال من بعد و نعاود ليك كلشي.....
رجعت لعند لوستي جلست شوية و هي تصوني ليا ختي قلت ليها اوووه راجلي تيصوني ليا، بعد عليها شوية باش متسمعش ختي تتهضر و جاوبت، الو محمد لاباس عليك، حتا انا توحشتك، اه، لا مفيا منخرج، صافي اللي بغيتي جيب معاك أي حاجة، معنديش مشكل هههه...صافي واخا حياتي حتا انا تنبغيك....و قطعت، قلت ليها يخلي ليا راجلي راه تيقول ليا بلا متطيبي ليوم خلينا ناكلو برا ولكن انا مفيا منخرج قلت ليه غير يجيب معاه شي حاجة واجدة....قالت ليا اه اممم مزيان
و طول الوقت اللي حنا جالسين و هي باغا تجبد ليا الهضرة من لساني على حياتي الخاصة و علاقتي مع راجلي و لكن انا معطيتهاش راس الخيط، و منين ما لقات منين تشدني و هي تمشي خرجات فحالها....
جا راجلي من خدمتو و مجبدتش ليه السيرة ديال داك الموضوع فمرة واخا الوقت كلو و انا تنبكي على دكشي اللي عرفتو، وصلت لاكثر من نص الطريق مخصنيش نتراجع دبا و فالاخير تيبقاو هدوك غير تفاصيل من الماضي...
دبا خصني نخدم على التقرب الجسدي كثر لاننا ولينا فحال الاصدقاء لاننا طول الوقت تنجلسو نهضرو مع بعضياتنا تنضحكو تنخرجو تنتساراو ولكن بخال اصدقاء.....فقت بنص الليل و فيقتو قاليا مالكي قلت ليك انا خايفة بزاف و عنقتو قاليا علاش قلت ليه شفت كابوس شي واحد تابعني باغي يغتصبني هو لفني بيديه و قاليا متخافيش و دوزت بقية الليلة فحضنو...
واحد المرة كنت فدار شيخي و مقلتش ليه راني عندهم و مشا هو للدار بلا ميدوز عليا يجيبني و كنت تندير هكا من وقت لوقت، جيت موراه بشي ربع ساعة و دخلت و انا طالع ليا الدم و بقيت تنهضر مع راسي و تنعاير، تفو على بشر متيحتارمو حتا واحد متيوقروش بنادم، لا و تابعني مزال و باغي النمرة ملفوق، هو جا عندي قاليا مالكي شكون هذا، قلت ليه غير شي واحد كان تابعني من داركم حتال هنا ووقف عليا جوح مرات بغا مني النمرة و انا مرديتش عليه، هو تعصب و بزاف، و بدا تيغوت قاليا شكون هذا و علاش مقلتيهاش ليا من قبل، شدني من يدي و قاليا يالاه وريه ليا فينو هي دبا، قلت ليه صافي خليك منو شنو بغيتيه، قاليا و عرف حتا فين ساكنة شوفي المرة الجاية مباقاش تجي بوحدك فينما كنتي انا نجي ليك نديك و غتوريني هداك فينهو و شغلي معاه هذاك انا غنوريه، قاليا وصفيه ليا كيفاش داير، قلت ليه طويل و كتافو عراض يمكن تيلعب الحديد و شعرو زعر و عينيه كبار و عسليين و زوينين قاليا انت واش باغا تعصبيني و جالسة تتغزلي فيه و عاجبك الحال و شايفة ليه حتا فعينيه و دكشي لا مزيان قلت ليه لا اصلا متيعجبونيش الزعرين و نيت معمري ما شفتو هنا، قاليا غدا غتوريه ليا نتفاهم معاه....
كنت الوقت اللي تنلبس شي كسوة ولا شي حاجة تنمشي عندو يسد ليا السنسلة ديالها، ولا فاش تنلبس شي عقد تنطلب منو يسدو ليا، و واحد المرة كنا سهرانين تنتفرجو فالتلفزة و انا ناعسة فوق الفوتوي دازت ساعة انا درت راسي فحالا نعست، شوية هو انتبه ليا جا تيفيقني قاليا يالاهي للبيت هنا غتنعسي معذبة انا قلت ليه بصوت حنين و واحد الدلع زوين غير خليني ما قادراش، هو مشا للبيت و خلاني ياااه الخطة ديالي منجحاتش و غنعس هنا معذبة، ولكن هو كان مشا غير يقاد ليا بلاصتي و جا هزني و داني لفراشي كان احساس معمري حسيت بيه و وليت كل عشرة ايام تندير فحالا داني النعاس و تيتكرر السيناريو نفسو و بانليا حتا هو عجبو الحال مبقاش تيحاول يفيقني تيهزني نيشان
أنت تقرأ
زوجي لا يحبني
Romanceقصة زوينة منقولة مصرية رجعتها للهجة المغربية العنوان كافي لفهم مضمون القصة ما طويلاش بزاف نتمنى تعجبكم :)
