زوجي لا يحبني

الجزء 3

بدا تبتزاد عليا الضغط منين بدات عائلة راجلي و حتا الناس من العائلة يسولو واش مزال ما حملت، ديما تنسمع عقبال لمرات محمد حتا هو يفرح بشي وليد ولا بنية و انا فين من هاد الكلام.....كان ضروري ندير شي حاجة .
كنا كل جمعة تنجلسو فالبيت حيت عندو عطلة تنجبد شي كتاب نقراه و هو مقابل التلفازة و لا شاد اللابتوب يعني ديما نفس الروتين الممل، كانت الشتا تطيح على برا طاحت عليا واحد الفكرة ديك الساعة حطيت الكتاب من يدي و مشيت للبالكون و قفت مور الزاج و قلت ليه : الشتا تطيح، واش تيعجبك هاد الجو؟ قالي واش كاين شي حد متيعجبوش؟ قلت لو بصح انا تنحماق عليه و تيعجبني نتمشا تحت الشتا (شكون انا خخخ هو غير لا كانت السما تتنقط و كنت مضطرت نخرج تنتكبط و نهز المظل و ندير طربوش و نبقا حاطية لا تقيسني شي نقطة تاع الما و لكن دبا اي فكرة حمقة نديرها) قلت لو اش بان ليك و درت براسي لبرا زعما نخرجو هو مفهمنيش قاليا شنو قلت ليه يالاه نخرجو نتمشاو.....شفت عينيه تيلمعو سكت شوية و قالي واش بصح تتهضري صافي لبسي، و بالفعل نضنا تنوجدو راسنا و انا بلعاني بقيت تنلبس على خاطري و قلت ليه سبقني انا جايا و نزل و انا ما لبست لا مونطو لا والو حطيت عيني جا جاكيطو اللي كان لابس كنت ديما تنشوف فالافلام البطل تيحيط جاكيطو و تيعطيه لحبيبتو قلت بمكن تصدق معايا و الا ما صدقاتش غادي نمرض، نزلت عندو و قاليا علاش مالابساش جاكيط و لا شب حاجة؟ قلت ليه راني مولفة نلبس غير هكا (ههههه شكون تيهضر انا اللي فالبرد تنلبس ثلاثة سراول و نتكمش فحال شي بصلة).....هو فالحقيقة عمري جربت نتمشا تحت الشتا يعني شنو معناها نفزك كلي و نمرض يعني عمري شفت المتعة فالامر و لكن حيت هو انسان عاطفي و رومانسي كان خصني ندير هكا و نستغل اي حاجة باش نلفت نظرو و اهتمامو ليا، و لكن را بصح حاجة مختلفة بزاف تمشا تحت المطر مع انسان تتبغيه متتشبه لحتا حاجة اخرى، تمشبنا ووقع دكشي اللي كنت تنتمنى حيد جاكيطو و حطولي على كتافي كان احساس ولا اروع و كلينة البيزا فواحد المطعم و كانت فكرتي و رجعنا للدار تنجريو كانت خرجة زوينة رجعت فرحانة بزاف حيت حسيت باللي فعلا حققت انجاز.....
الجنعة اللي بعدها كنت مستحيل نفلت الفرصة و نخليها تدوز غير هكاك جيت عندو و قلتلو بيزا.....قالي شنو؟ قلت لو تاكل بيزا؟ قالي اه قلت ليه يعني نوض نلبس قالي فين؟ قلت لو واحد الريسطو على ذوقي، كان راىع اضواء خافتة و موسيقى كلاسيككية و راىحة البيزا الشهية.......عجبو المحل بزاف كانت باينة غير من نظراتو و هو تيتأمل فالديكور ديالوقلت ليه عرفتي فاش انساليو فين انمشيو؟قالي فين؟ قلت لو واحد المحل تيبعي آيس كريم قالي واش شنو ايس كريم فهاد البرد حماقيتي ولا شنو؟(اه حماقيت فيك كون مكنتش حمقة كون مبقيتش معاك من الاول) قلت لو امممم حمقة! ما كاين ما حسن من الحماق شي مرات......بقيت تنشوف فعينيه الدخشة و الفضول يعني شنو ممكن يوقع معايا من هنا للقدام؟ افكار مجنونة و غريبة، مكنتش غير مستعدة ناكل ايس كريم فهاد البرد كنت مستعدة ندير اي حاجة على قبلو غير يبغيني قد ما تنبغيه.....
كل جمعة تنمشيو لبلاصة فشكل، افكار اغرب من اللي قبل مرة مدينة الالعاب مرة البحر الحديقة، حتال واحد النهار قاليا يالاه ناكلو آيس كريم ههههه.....
مكنت تنفوت اي مناسبة ولا زيارة تتجمعني معاه على اني مراتو، كنت تنقاد راسي بزاف و تنبان زوينة فمظهر ناعم و راقي معاه، كونت علاقات اجتماعيت كثار مع عائلتو حتا كانو تيمدحوني قدامو و كنت تنفرح بزاف.
كان كل يوم تيسولني شنو خصك نجيبليك معايا لدار فاش نكون راجع تنقوليه جيب ليا معاك هدشي و هدشي و هدشي الا فوقت الدورة الشهرية كنت تنكتبها ليه فورقة و تنكتب ليه الفوط النسائية أول غرض فراش الورقة مع اني كن قادرة نشريها و لكن كنت تنبغيه هو اللي يشريهم باش يعرف خصوصياتي اكثر، باقا عاقلة اول مرة شد الورقة كيفاش ولا وجهو حمر و كيفاش فاش تيدخل للبيت و انا تنبدل حوايجي تيحشم و انا تنشد اي حاجة تنغطي بيها راسي يعني ما خصكش تشوف.....
داز عام على زواجي و بنت عيشة ولدات و ولدها بدا تينطق و ماما ما كانت تتفوت اي فرصة باش تهضر على بنت عيشة وولدها و لكن انا ما كلنش تيهمني اي واحد فيهم كان عمدي هدف واحد بوحدو خصني نوصل ليه و بالنسبة ليا كنت قطعت مرحلة كبيرة و فرحانة بزاف بهدشي اللي حققتو
كان كل لبسي بيجامات عادية ما فيها حتا شي إغراء من مور عام بديت تنلبس شورطات قصيرة و كساوي قصار و اول مرة لبست كسوة قصيرة كنت حشمانة كيفاش غادي نبان قدامو و خاصة انني دوزت عةم كامل ما لبستش شي حاجة من غير اول شهرين تاع الزواج و لكن دبا قلت عادي يعني ما غاديش يأثر فيه و يمكن اصلا هو ما منتابهش.....و لكن لا انتبه بزاف و كاع كنا تنتفرجو فالتلفزة و قالي واخا تجيبيلي كاس دالما عافاك نضت نجيبو ليه و قبل منخرج من البيت ضورت راسي باش نسولو واش بغاه من الثلاجة ولا عادي لقيتو تيشوف فسيقاني فاش شافني انتبهت حشم و قالي شنو قلتي مفهمتش قلت لو حتا حاجة و مشيت للكوزينة فرحانة حسيت بقلبي غادي يوقف من الفرحة........