Blackmailing the Music-hater [PHR] - Completed

Chapter Five

PAGPASOK NINA Wax at MJ sa pinto na may nakalagay na ‘Office of the President’, isang babaeng nakapulang bestida ang naabutan nila. Nakaupo ito sa swivel chair ni Wax at kunot-noong nakatingin sa kanilang dalawa.

Tila nagulat naman si Wax. “Carina! What are you doing here? You surprised me! Hindi ka man lang nagpasabi na bibisita ka pala!” Inilang hakbang lang ni Wax ang pinto papunta sa babae.

“Hindi nagpasabi?” mataray na tanong ng babaeng tinawag ni Wax na ‘Carina’. Hindi nito tinanggap ang pakikipagbeso sana ng lalaki.

Sa isip niya, baka girlfriend ito ni Wax. Well, kung umasta naman kasi ito ay parang girlfriend. Sa paraan pa lamang nang pagtingin nito sa kanya ay tila gusto siyang sabunutan.

“Kahapon pa kita tine-text at tinatawagan pero hindi ka sumasagot,” anito at tinapunan siya ng matalim na tingin. “Kaya pala. May kasama ka pala. Sino ba siya?” mataray na baling nito kay Wax.

Siya naman ay walang pakialam sa pagtataray nito. Wala naman silang ginagawang masama. At medyo humaba ng ilang pugada ang buhok niya dahil tila pinagseselosan siya nito. Kung magkagayon, ibig sabihin ay nagagandahan ito sa kanya o ‘di kaya naman ay nai-insecure. Kumpara kasi sa babae, hindi naman siya aabot man lang yata sa kalingkingan ng ganda ng hubog ng katawan nito. The woman was very sexy. The red dress she was wearing accented her curves. Walang-wala ang katawan niya kumpara sa babae. Maganda rin ang mukha nito kaya nga lang, para sa kanya ay masyadong makapal ang kolorete nito sa mukha. She must be really Wax’ girlfriend. Subalit naalala niya, single nga pala si Wax. Kung gayon, sino ang babaeng ito?

“She’s MJ Benitez, a friend of mine. Inilibot ko siya sa buong opisina,” simpleng sagot ni Wax kay Carina.

“Bakit mo siya inilibot dito? Is she an investor? A client?”

“Hindi. I said, she’s my friend. Inilibot ko siya dahil gusto ko,” Wax answered. This time, MJ heard the edge in his voice. Tila naiirita na ito sa pagtatanong ng babae. “What are you doing here?”

Pumadyak si Carina at inilingkis ang mga braso sa leeg ni Wax. “Ang tagal na nang huli tayong magkita. Hindi mo na ako tinawagan. So, I invited myself here to see you because I missed you,” paglalambing ng babae. Akmang hahalikan nito ang labi ni Wax pero lumayo ang lalaki.

Nagbuntong-hininga ito. “Carina, wala naman tayong relasyon. You can’t demand anything from me because we have no relationship. Hindi kita girlfriend. Hindi kita tinatawagan dahil isa lang ang ibig sabihin noon: hindi kita gustong tawagan, makausap o makita. Ano bang malabo doon?” walang emosyong wika ni Wax.

Nabigla siya sa naririnig at nakikita. Parang gusto niyang i-excuse ang sarili at lumabas upang hindi na marinig o makita ang nangyayari sa dalawa pero sa halip na gawin iyon ay napako lang siya sa kinatatayuan sa ‘di malamang dahilan. Ang lupit pala ni Wax mam-break ng babae! Maaari niyang ilagay iyon bilang isa sa mga karakter ng bidang lalaki sa kuwentong isinusulat niya.

“W-Wax, don’t say that,” sagot naman ni Carina. Tunog nagmamakaawa na ito. “Ayaw mo sa akin?”

“Sinabi ko na ang sinabi ko,” maikling tugon ng lalaki.

Mayamaya pa ay humikbi si Carina at padaskol na kinuha ang bag mula sa sofang naroon. “I hate you, Wax!” buong igting nitong sigaw. “I super-duper hate you!” sabay padabog na lumabas. Hindi siya nakaligtas sa galit ng babae dahil nang matapat ito sa kanya, binunggo pa nito ang braso niya kahit na hindi naman siya nakaharang sa dadaanan nito.

“Hey, are you okay?” may pag-aalalang tanong ni Wax at agad siyang dinaluhan.

“I am fine,” sagot niya. “Ang hard mo sa kanya, ha? Akala ko ba mabait at entertaining kang boss? Bakit ang hard mo kay Carina?”