#نمشه

البارت الخامس

للكاتبه نور الربيعي 

البارت الخامس

صار العصر واجه زوجي عليه ...كعدو يمه الولد وضلو يحجون وياه ...وشروط موبايل ماكو طلعه ماكو ... واي مشكله انت مسؤؤل عليها ...
كلهم هاي هيه خير ان شاءالله
.........صاحولي ..واني نهد حيلي ..فرحانه كلشش ..دخلت وكلها ضلت تباوع عليه ....رحت بست راس ابويه ...بس حسيته ضايج مني ومراضي عليه .......اخواني همين اسلم عليهن يردون السلام من وراء خشمهم ....بقلبي كلت يلا ترجع الماي لمجاريها وتصير سوالف
.........وطلعت بالسياره ...واباوع للبيت ..وتذكرت من اجيتلهم مشي اني وحسن ..عود زين عليه المشي ...وبطلعتنا من عدهم ..
..بطني ضلت تأذيني كلشش ووجع مو طبيعي ...ضليت اصرخ يمه ويمه .........ودوني للمسشفى ...وحسن راح يجي الجنطه الي محضرتها من اجيب ...
ضليت بسس اشهك وابجي ....هواي شفت اذيه بس مثل الطلوك ماكوو..
. واجتلي بنيه بعد شلاع القلب ....الحمدلله ....الكل فرحو بيه واني
ضليت يوم كامل بالمسشفى ....لعبت نفسي ..اكلهم طلعوني ميقبلون ...وراء شويه اجو خلو البنيه يمي ....وحسن يباوعلي والفرحه بعيونه تخبل
....كلي شتسمينه ....باوعتله ... واحجي وياه نفسي ...هم طلعين مثل امج ماشافت راحه لا بكبرها ولا بصغرها
...كتله اسميه نسرين معناه الورد الابيض الي احبهه .....
قرب وباسها ...
::الله يخليها النا
وراح صاح لامه ومن سمعت راح اسميها نسرين ضلت تحجي
::شنو نسرين لا لا اسميه هديه ع اسم امي ...والله هم انطاها هديه الكم ...
::يمه هديه شنو .. راح وكتها امج الله يرحمها
::ياا يخبل جا مثل اسم نسرين ...ابني اسامي قبل جان الها معنى ...هسسه منو اجه اخترعله اسم \....
ضحكت كتلها : عمه يعني اذا نسميه هديه ...شنو اندلعه
::شسالفه يادلع هذا ...هديه هديه ...
......شويه وطبت مرت ابويه واختي رنا الجبيره ...وجايبن وياهم تمن ومركه فاصوليا ....يدرون احبهه ...رغم كلساع يجيبولي اكل ...بس اكل المستشفى مو حلوو
....خلو الاكل يمي وضليت واكل ...ومااحسيت على روحي ...اكلت الصحن كله
...ويضحكون عليه
.................
رجعت للواقع ....واني بعدني بالطريق للبيت ....وزوجي امجد كاعد يسوق
....تعجبت رغم وصلنا نص الطريق ...بس ماحجينا ولا شي
سالته :: شلونهن البنات ؟
::زينات هسسه نروح عليهم يم امي
::مابجن عليه ماسالن
::بسس بنين تبجي عليج وكلما اشوفها تكلي خابرها ...بس حنين تلعب وياه الجهال ومايهمها
::يي طالعه ع ابوها
:: ها بسم الله بدينا ...ماتردين توصلين للبيت
::والله اني رجعت علمود البنات ...حرامات يبقن بدون ام ....مثل نسرين وامير ...حسره عليهم يشوفوني واشوفهم ...ومااضاله عليك عادي ابقى بيت اهلي معززه مكرمه
:: هههههههههه معززه مكرمه ...مبين من وجهجج وعيونج
.........درت وجهي عنه وضليت اباوع للشارع ...صارلي هوواي ماطالعه وشامه هوه
...مدري تعودت على الطلعه .....
وصلت للبيت ...وامجد راح يجيب البنات ....باوعت للبيت كله تراب ...والسقف عناكب ...وصاير يلعب النفس ...كمت طلعت الغراض للحديقه ...وغسلت المطبخ والهول ..ورجعت الغراض ...هو اني بيتي صغير
....وماعندي غراض هواي ماعدا الغرفه الي شتريته صار شهرين ..
.والقنفات مخليتهن بالاستقبال ...وكلت عود اشتريلي كاونتر للمطبخ بسس الفلوسس مايتحلك عليهن ...
واني جاي اغسل الحديقه طبن البنات واجن شبكني ..وضليت ابجي ويبجن ويايه
....وابوس بيهن
...بنين وحنين توائم ...كلش يشابهن ...مرات ماافرق بيناتهن لان البسهن نفس اللبس
...بس اعرفهن من شغله وحده مخليه تراجي بااذانتها ...وحده ماعدها تراجي ....
:: شلونجن بالمدرسه جاي تروحن مو ؟
بنين :: بيبي تلبسنه وتمشطنه علمود نروح للمدرسه بسس حنين ضلت ماتقبل تروح
:: ليش حنين ؟
حنين :: المعلمه تكلي ليش ماتكتبين الدرس وتضل تصيح عليه وكلت بعد مااروح ..بس تجين انتي تعلميني وتكتبيني وااروح
...........جريت حسره وكلت بليايه انتو بالضيم
....خلصت الحديقه وطبيت اسبحهن .
..ودخلت للغرفه اريد ابدلهن .......واذكرت اخر شي صار هنا والمشكله الي طحت بيها .
..... لعبت نفسي اخذت الملابس وطلعت بالهول البسهن ......
واخذت صفنه ....وباوعت ليفوك ...ربي سامحني اني غلطت .. اني ابتعدت عنك هواي
.وضليت ابجي ..والبنات يباوعني ويمسحن بدوموعي ........وتذكر يوم جنت كاعده وبحضني نسرين بنتي جان عمرها 4 سنين جاي امشطلها وجنت حامل باامير ..
.وصاحتلي عمتي حتى اعجن .....
::عمه كولي لجنان تعجن والله مابيه حيل
:: هسسه احنا شذابين عليج اشو بس العجن وتكولين مابيه حيل ...نسوان قبل يشتغلن ولا يهمن لا حمل ولا جهال ...هاي لو عندج العشره شلون ...يمكن ايضل البيت وصخ ولا اكل ولا عجن
::اهووو حسره عليه كلت شي رديتها بعشره
....
كمت اخذت نسرين وطبيت للغرفه
.....اشو اجت دخلت الغرفه وضلت تصيح
:: انتي شكد صلفه .. وادب سزز ....ماتكولين عمتج كبرت ومابيها حيل للعجن
:: ياعمه هسسه اني شوكت كلت عجني ..كلت كولي لجنان اشو كاعده وكلشي ماعدها
:: اي اعتمدتي كله على جنان .......جنان كاعده خلي تسوي غده ......جنان ماعده شي خلي تكنس ...شفتي البنيه ماعدها جهال سويتيها خدامه لرجليج
..... استغفرت ربي
:: شو قبل بس نمشه وبس ...شنو الي تغير ...لو جابت الجهال الج وصارت كخه
:: كافي بلا حجي زايد ...ارتفع عندي الضغظ مابيه حيل احجي بعد ....بس حسابي وياج من يجي حسن ...هو يتصرف وياج
..............
وبس اجه حسن .......سوتني كلش وضلت تزيد بالحجي .......اني ماحجيت شي ..
.دخلت للغرفه ... وكلت يجي حسن واحجي وياه ع انفراد واتفاهم وياه .....لان اذا كدام امه .... بسس عرايك اكضيها
........وبس اجه حجيت وياه وفهمته .....
:: نمشه خلي نطلع من البيت احسن
اني انصدمت مجنت متوقعه هيج يكول
:: صدك تحجي
:: اي والله كعدتج هنا كله غلط بسس مشاكل وذا بقيتي هنا راح تزيد اكثر ...واني تعبت ..وهاي جاي اكلج ..كلش تعبت منج ومن امي ...واريد استقر اريد ارتاح .....ارجع من الشغل انام شويه ......اشو كلما اطب استقبلتوني بمشكله ...وبعد مااتحمل
:: وامك شلون .. اكيد مراح تقبل ..روحها بنسوره ...ماتكدر تعوفها
:: اني افهمهه هاي سهله بسس المشكله .. وين نروح ...لازم ادور ع بيت اجار على ماااشوف وين تصفى
:: حسن خلي نكعد يم اخوي ......بيته جبير ...وبس هو ومرته ومراح ينونس ....وعلى ماتشوف بيت عود الله كريم
................وبالليل بالعشه كاعدين عمي وعمتي والبنات ..
.عدنان مجان موجود وحسن استغل الفرصه وحجه
:: باجر مااروح للشغل اريد اطلع ادورلي بيت
خيريه :: المن ولك بيت
:: الي اريد اطلع واكعد بيت ...وعندي كم فلس ضامهن اشتري بيه قطعه ارض ....وابنيها على كيفي شويه شويه
:: ولك حسن صدك تحجي ... تريد تطلع وتعوف اهلك
:: يمه فدوه كافي اريد استقر وارتاح
عمي يفتهم ...وكلش يحبنه ...مافد يوم ضوجني بحجايه ...جان دائما يمدح بيه ويحجي بالزين كله
:: ابني اني وياك بفكرتك واشعجك بيها روح شوف حياتك ... والبيت بالاخير الكم ولجهالكم .. بسس ابقى يمنه على ماتبني وتخلص ... عود بعدين اطلع
خيريه :: شتحجون انتو لا طلعه ولا بطيخ ...شوف حسن خاف وزتك ولعبت براسك ...ترا من هسه اكلك طلعه من البيت ماكو
:: يمه الفكره فكرتي واني الي متأذي مو انتو ...... تقبلينها يايمه ..تقبلين ابنج مامرتاح ...واذا على الجهال كل فتره اجيبهم يمج ... ولا يهمج
:: ماكو هالفكره شيلها كلش ...وماتطلعون
:: يمه بعد اني قررت
عمي :: اتوكل ابني بقرارك ..واذا تريد اشوف اصدقائي اذا عدهم بيت للاجار
:: لا اني لكيت بيت اكعد بي ليضل بالكم .. بس باقي ادور قطعه ارض زينه ومكان حلو
خيريه :: والله مصفي امورك وحاسبها زين ...من يمتى مخططين ومتفقين ها
::يمه شنو مشكلتج انتي .......
:: اريدك يمي ...ماتروح ...ربيتك سنين تجي هاي تاخذك مني
::هسه اني وين رايح .....وشنو بعد مااجيلكم ...
وبعدين انتي مو اخذتي ابوي من امه ......هيه هاي سنه الحياه يايمه ......
..............
ومرت اسبوع ......واني كملت كلشي .....
والغرفه فتحوها ....وخلوها بالسياره وخلو الجنط ......جنت مفكره ماعدنا غراض .....
بسس من خلوهن بالسياره ماكفت وجان اكو بعد جنطتين والثلاجه .......خلينا الثلاجه
..بالبيت واخذنا الجنط بالتكسي ورحنا لبيت اخوي .......بيت اخوي كلش جبير ......بس الحديقه لو تنبني تصير شقه ....
غير الجوه كل غرفه شكبرها .....
شدو الغرفه ........ونزلو الغراض .......
واخوي فرحان كلش ...بس مرته كلش مكروها ...ولا تحب الخطار ....24 ساعه وجهه معبوس وماتضحك ...
بسس مامقصره وياه اخوي ... رغم هو معوق ومايكدر يمشي ولا يتحرك .... بس هيه الي تسبحه وتغسله ...وصابره وياه ...وتحبه

للكاتبه نور الربيعي
صحيح هالبارت مابيه احداث تشوق ....حاولت اكمل بسس راسي اسم الله عليكم من البارحه لحد هسسه ياذيني ...انشاءالله اعوضكم بالبارت القادم