#نمشه

البارت الرابع

للكاتبه نور الربيعي 

البارت الرابع

ومن راح للشغل .... اخذت المكناسه وضليت اكنس الحوش ...من قهر قلبي خلصها بس غلط عليه ....شلت المده الي نكعد عليه علمود اكنس الي جواها واشوف محبسي والكلاده الذهب ....المحبس معوج مبين واحد دايس عليه بسس الكلاده مابيه شي ....رحت صحت لعمتي ....... واجت وهيه تصلي على محمد .....وراحت اشترت جكليت ....وقرت عليه مدري شنو وزعته على الجيران .....جنان جانت مموجوده ...حرامات جان طلعت ضيم قلبي وقهري على المحبس بيها ....واشبعها كتل ......بالليل حسن اتاخر ..
ضليت انتظره بالغرفه ...وفرحانه لان لكيت الذهب
الساعه ب12 صارت وماكو .....طلعت من الغرفه دااروح اسال عمتي ...وشفته على الدرج كاعد وخلي راسه بين رجليه ....لسه اذكر الموقف ...تقربت منه اسمعه يبجي ...من حس بيه شال راسه وضل يمس بعيونه
::ها شكو ليش تبجي
لزمته من ايده بارده :: من يمته هناا ليش مااجيت للغرفه
::نمشه عوفيني
::شنو ؟
::اني مايصير عندي جهال عوفيني احسن وروحي شوفي حياتج
::حسن شجاي تحجي
::اي اني مثل عدنان مااخلف اليوم العصر اخذت الفحوصات وكالولي نسبتك صفر يعني مااخلف ...مااريد الحجي يصير عليج مثل جنان ...روحي شوفي حياتج احسن الج
قهرني كلش قربته من يمي وحضنته
::حسن لتفقد الامل يجوز الله جاي يمتحنه ويجرب صبرنا
::شنصبر شتحجين انتي ....شوفي عدنان مو صابر ...اشو ماكو
::حسن فدوه لعينك كوم طب جوه الدنيا بارده لا تتمرض
::نمشه خلي نطلك
::مااطلك ..واضل وياك وحتى لو اصير مثل جنان هم اضل وياك
طببته جوه ونومته وغطيته بالبطانيه .....حسيته مثل الطفل ...اول مره اشوفه يبجي ...وضليت افكر ...ليش هيج وياي ربي ...اوووف
بوكته مانمت للفجر ....سمعت صوت الاذان ونزلت دمعتي ......كمت اتوضى حتى اصلي ......ولزمت القران واول مافتحت القران طلعت ايه ((يَا أَيُّهَا الَّذِينَ آمَنُوا اسْتَعِينُوا بِالصَّبْرِ وَالصَّلَاةِ ۚ إِنَّ اللَّهَ مَعَ الصَّابِرِينَ))
ضليت ابجي وحمدت ربي ....وخليت كلشي وراء ع امل يجي يوم واحبل
..............
الصبح اول ماطلعت من الغرفه لكيت بوجهي جنان ..
::هلاو جنونه شلونج ؟ اهلج شلونهم
:: الحمدلله
::اي صدك البارحه مادريتي
::خير انشاءالله ؟
::لكيت الذهب مالتي جوه المده مدري منو مخليه
:اها الحمدلله
دارت وجهها وراحت
......ووف طلعت محتمله الحجي من عمتي مرت عدنان ماتخلف والسبب من ابنها
....سويت ريوك لحسن وطلع
وباوعت لعمتي تتنظر مني جواب
::عمه البارحه حسن راح شاف الفحوصات
::اي وشكال
::السبب مني مااخلف نسبتي صفر ..بس الدكتور كال اكو امل
لزمت قلبها
::يمه قلبي شبيهم ولدي ياخذون نسوان ماتخلف ...اوف ياقلبي هم حظ ماعدهم يمممه لحكيني
جيبي ماي جيبي ..
جنان على صوتها اجت وردت بالسالفه وشفتها ضحكت بسس مااعرف ع شنو ع عمتي مدري عليه لان مااخلف
...وديتلها ماي ودخلت للغرفه ..ضجت من حجيها
وغده ماتغديت ... اسمعها تحجي بالغده سوت عليهم زقنبوت مو اكل ...كلساع واحد يكلها كافي ولا تسكت
ومن اجه حسن سوت عليه جنازه وعزاا
ودره شكلت لامه وضل يصيح
::يمه ماكو هيج حجي البارحه شفتهن والسبب جان مني ... يمه ولدج مايصير عدهم جهال
طب للغرفه معصب
::ليش كلتيله هيج
::اهدى شويه ملازم تفضح اخوك
::شهالحجي يعني تتحملون حجي واهاين والغلط منه احنا مااايصير هيج
..............
فزيت من ذكرياتي ....واني اسمع واحد يصيح بالحديقه ... فتحت الباب اريد اعرف منو ...بسس مااعرفت ..الصوت ماعرفته
بعدها بنص ساعه صاح ابويه عليه ...عدلت نفسي وطلعت
:: بويه رجلج يريدج .. ومااعرف يابويه شيريد منج من بعدج الي سويتيه وسودتي وجهه بسس يابويه الي نريده منج ...هذا الشي ماينعاد مو كل يوميه جايتنه مسوي مشكله لو رجلج كاتلج ...والله العظيم اي مشكله بعد تطلقين منه وتكعدين هنا حالج هبه بالبيت ....فصيري زينه علمود رجلج وعلمود بناتج خطيه صار اسبوعين الله يعلم منو الهن
...........
هوا يحجي واني اهز براسي واكله ان شاءالله
::بااجرالعصر يجي عليج حضري نفسج
::ان شاء الله
......فرحت كلش ورحت سبحت على كيفي وعدلت نفسي .... واخيرا راح ارتاح من هالسجن وهالناس الي ماترحم ....بسس ضل ابالي منو هذا الي ضل يصيح
....كعدت يم بنات هبه اباوع تلفزيون
هبه رجلها استشهد باانفجار وضلت بيت اهلي ماتكدر تزوج لان بناتها ياخونهن وهيه روحها بناتها الاثنين ...وهبه بعدها صغيره ..وحارمينا من الطلعه ومن الموبايل ...يعني ماادري شلون مرتاحه بعيشتها
.......وصفت وتذكرت الايام والمشاكل الي مرت عليه بيت عيالي ....وعلى كم مره ارجع لاهلي زعلانه ...لان حسن تعب كلش من وراء لساني ... مايكدر يصير ضد امه ....
بيوم جنت بيت اهلي زعلانه ... وطولت كعدتي عدهم ...جنت جاي اشتغل وحسيت بدوخه واريد بسس اتقيه
....لزمتني مرت اخوي وكعدتني بالكاع ...واني الدنيا ادور بيه ....جابتلي ماي اشرب كتلها اكو حبايه مال راس بالدولاب جيبي
:: يااااا نمشه يجوز حامل ترا شي عادي هاي اعراض الحمل
...طلعت الماي من حلكي وفتحت عيوني وباوعتلها
::يي والله شبيج ..روحي اخذي عمتي للدكتور وحللي يجوز حامل
اني من كد فرحتي نسيت الدوخه وكمت على حيلي لمرت ابوي ...
::هسه نروح هسسه هسسه
::وين ولج شبيج تشهكين
:: للدكتوره خلي نروح احلل بلكي الله واهل البيت حامل
::ياااا وشدراج
::يلا يماا كومي
........جريتها من ايدها .... وجبتلها العبايه تلبسها ...ولبست اني ... ورحنا للدكتوره احلل
...اني امشي ...واحس رجليه ثكلن بلكوه امشي
ومرت ابوي تدردم ..حتى لابوج ماكلنه ..
شلون بسالفتج انتي
....وصلنه للمستشفى ولعبت نفسي من الريحه ...وتقأيت ومرت ابوي ترزل بيه فشلتينه ولجج الناس تباوعلنا
...وكعدت على الكرسي بعد ماحجزنا ...انتظرها تصيح اسمي ...وصار المغرب وماكو ... الناس تحوش ..هذا الي يطب ويطلع ...وهذا الي كاعد ينتظر ...واني صارت عليه الدقيقه ساعه
شويه وصاحت نمشه كرم ....وجهي صار اصفر ..شسوي .... مرت ابوي جرتني ودخلنا ..
اباوع للدكتوره بعده صغيره وشحلاهه ...بقلبي كلت هاي شتفتهم ...ضحكتلي وكالت نامي خلي افحصج .. وضلت اتبحوش مدري بشنو ...شوي باوعتلي وابتسمت
::مبين من عيونج اول مره تحبلين
:: شنو يعني دكتوره ؟ يعني حامل
:: يي حامل الف مبروك
::.ماصدك شلون حامل واني مايصير عندي جهال
::ربج يحبج ..وشاف صبرج ..وانطاج نعمه
وهسسه انتي بشهر الثالث والجنس ممبين ...هاي فتره دربالج ع روحج وع الطفل لان اول طفل وهاي الاشهر خطره
::هو حسن وخيريه بسس يدرون يخلوني اشتغل يخلوني اتعب
الدكتوره ضحكت
::دكتوره خو ما تشاقين .صدك حامل
:: اي والله حامل
..........
طلعت وعيوني كلها دموع ولا حسيت بنفسي ابجي
شافتني مرت ابويه :: خير
:: يمه حامل
:: اللهم صل على محمد وال محمد ...شوفي ربج مايظلم عبده ..امشي يلا اتخرنا
.....ورجعنا للبيت ....كلهم فرحانين ...وابويه اتصل بحسن وكله مرت حامل ...وراء شويه دخلو علينه حسن وخيريه تهلهل وتشمر جكليت عليه
....واني ههواي فرحتلها
وشفت الفرحه والشوق بعيون حسن ...تمنيت احضنه وابجي بحضنه واذكره بحجايتي بذاك اليوم

للكاتبه نور الربيعي 
القصه حقيقيه وصاحبه القصه موجوده واعرفها حق المعرفه ....الاحداث تجيلكم ومشاكل نمسه ماتخلص ...تابعوني وفدواا بدون كملي ولا تم
اريد رايكم ؟