#نمشه

البارت الاول

للكاتبه نور الربيعي \

البارت الاول

الانسان حتى يفتهم الحياه لازم مار بكلشي صعب ومتعلم من اخطائه
كعدت من نومي متكسرا تكسر الكتل الي تعرضته من اخواني وخواتي وابوي خله جسمي ازرق وعظامي تكسرت ..... كعدت على حيلي ورجعت للحايط .....رفعت راسي ليفوك ونزلت دمعتي .....صحيح استاهل الي صار بسس متوقعت قساوتهم هيج عليه ....تذكرت كلشي من طفولتي ومشاكلي بصغري بالمدرسه ومشاكلي وياه خواتي ومرت ابويه ومر علي ذكريات قبل اضحك وابجي بنفس الوقت
اسمي نمشه مواليدي 1988 ...... قصيره مربربه حنطاويه
امي قبل ممتوفى جانت مريضه بيه سكر وصار مابيها حيل النا ....فتزوج ابويه وحده صغيره
جانن يريد الولد ....صحيح اكو ولد من امي ...بس صار معوق بحرب ايران وكعد ع الكرسي ....
واني عمري 7 سنوات امي توفت وصارت تربيني مرت ابويه امل ......مقصرت ويايه بشي بسس جانت تفرق بينا وبين جهالها
من امي 8 بنات اني منهم وولد واحد
ومن مرت ابويه امل 3 بنات و6 ولد
........قبل صحيح جان اكو حصار وحروب بس جانت العيشه ححلوه ... رغم هذا جنه نطلع وناكل الي نريده واي شي ينزل من ملابس لو اجهزه لو اكل جنه احنا اول العالم نشتريه ...
محبيت المدرسه ولا حبيت الدراسه وجنت دائما اسوي مشاكل وياه المعلمات لو اصيح عليهم لو اكل بالدرس لو اشرد من المدرسه واروح لبيت صديقتي منى العب وياها .... فبالسادس وتركت المدرسه وكعدت بالبيت .... اختي هدى اكبر مني بسنه جاان المعلمات يتعجبن هيه اختي لان هادئه ونازوكيه ... وشاطره فكملت مدرسه
مررت عليه كل ذكريات الطفوله وفزيت من هاي الذكريات الي مترجع ولا راح نعيشها من جديد .... دخلت مرت اخوي للغرفه
::نمشه محتاجه شي ؟ تريدني اسبحج
هزيت راسي ايي مااكدر احجي لان صوتي راح من البجي .... لزمت ايدي
:: كومي كومي لشوكت اضلين هيج .. شنو استفاديتي من الي سويتيه حصلتي بس اذيه ومشاكل وبجي ... جنتي كاعده يم رجلج ومرتاحه اشو 24 ساعه طالعه ورجلج ميحاجيج ومخليلج نت وفيس وممقصر وياج شوازاج
جريت حسره ..
:: شوفيني اني حسره عليه شي لا اكدر اعزل ماعدنا فلوس ولا باقيه هنا ومرتاحه بس شكول الحمدلله والشكر مدام اخوج مرتاح هوياه الحمدلله
..............
كومتني للحمام وسبحتي بالبدايه الوجع عبالك شلون واحد ديخلي سجاجين بجسمك بسس بعدين شلون الخدر الوجع
...خلصت ولبست دشداشه عريضه وطلعت ...صارت بوجهي اختي هبه ...عكرت حواجبها
:: دنيا هاي منو كلج تسبحيه ..الوصخه تبقى وصخه لو مو تسبحيه
ردت ارد عليها بسس مابيه حيل احجي صوتي راح من الون والقهر
ردت اكلها اختج اني اختج لو مو اغلط ابقى اختج
هيج تاليتج وياي .......جنت مدلله بناتج اشكال وانواع اشتريلهم ...اكول يتيمات ...هاي جزات فضلي الج
دخلت للغرفه اباوع للحيطان .... اوووف هالغرفه مرتين اجيت بيها ...بيوم الي طلقت من حسن ورجعت لاهلي وكعدت بهاي الغرفه ....وهسه هم رجعت الها
............للكاتبه نور الربيعي 

ورجعت اتذكر يوم عرسي من حسن
كاعده وناس داير مدايري هاي الي تصفك والي تهلهل والي تهوس ........واسمع صوت الطلق والهلاهل زادت واسمع اجوو اجوو اهل العريس
....اني نشف دمي خطوبتي جانت 5 اشهر بس ولا شفته ولا حجيت وياه .... واني كاعده وافكر هاليوم شيخلصه ...
دخل حسن بكل هيبته وطوله لابس قاط بيجي والضحكه تارسه وجهه ... كعد يمي ..لسه اذكر كلشي من كعد يمي ... عطره الي ترس الغرفه بعد ماجانت خنكه من الهوسه وحاره
واتذكر من لبسوني الاكليل وطلعنه سوه بالسياره ....حسيت روحي ملكه واجه الي جنت اتمنه اميري ......
فرينه البصره بطولها وعرضها بوكتها جعت كلشش وبطني ضلت تطلع صوت واستحيت كلش لاسمع الصوت ...ردت اشيل هذا الي فوك راسي داباوع وين وصلنا ...... بسس ماكدرت جنت لازمه بيدي قران انطتنيا امل مرت ابوي وكلتلي ضلي طول الطريق اقري سوره الكرسي ....
بعدها سمعت صوت طلق والسيارات ضلت توكف ...عرفت وصلنا ....نزل هوا بعدها نزلني وكادني للبيت والطلق فوك راسي كلساع انزل راسي عبالك راح توكع عليه الطلقه .... زادت الهوسات والهلاهل وشالو الاكليل من وجهي ....عيوني ضلن ياذني كلشش ... كعدنا شويه بعدها كام ...يريد يطلع يم الزلم ... شاف امه باس راسها وطلع .... اجتي امه يمي وحلكها مفتوح عبالك اول واحد تعرسهه
::يمه نمشه طالعه قمر تخبلين
:: شكرا خاله
تباوع ع النسوان وتحجي وتمدح بيه
ونمشه نادره واهلها خوش ناس ...وسالتها وحده اذا عندي خوات بعد معروضات للزواج ههههه ..
:: اي عدها ثلاثه اصغر منها وحده مخطوبه بعد كم يوم تعرس واثنين بعدهم
::اي خوش مو احنا نريد مره لحسام ومدام كلتي خوش ناس انروح نشوف وحده اله
.......... اني اسمع حجي وشويه فكري يروح شوكت يخلص العرس ... وارجع اسمع حجيهم وابتسم
....ام حسن ( خيريه ) الله مايجرعا مدري شلون متحمليها
عرفتها من اول مااجت للبيت تشوفني .....لسان وبس تلكلك .... كلت هاي دواها يمي زين اخذتني لابنها وماخذت وحده فقيره وتنظلم
...... العرس كضوها كله طلق وصعاديات وكلساع اكمز ... وكلما يزيد الطلق النسوان يكولن اللهم صل على محمد وال محمد .............وشويه ودخلو ولد يهوسون اجتي مره باوعتي وضحكت ...خلت الاكليل ع راسي وغطتني لان راح يزفونا
... اني من غطوني ضلو يمشوني بسس ماعرف وين مدري منو لازم ايدي وودانيي للغرفه ....
.......... للكاتبه نور الربيعي
.....
واني دااذكر يوم عرسي سمعت صوت باب اندك وخطار اجو للبيت بس منو ...... قربت راسي من باب الغرفه حتى اعرف منو .... عرفت من صوت الجهال اجت اختي هدى ...وسمعت هبه تكول لهدى لعد ليشش ماجت وياج سرور (قصدها ع اختي الي اكبر من هدى )
هدى :: خابرتها تكول احمد مايبقل والجهال يبجون كالت اغديهم واجي
هبه :: يوووو عود كلت نتوس هنا تعالي دخلي هنا
.........
رجعت لمكاني وكلت كافي مااتحمل هنا بسس يجي ابوي اكله يرجعني لرجلي ....اذا ابقى هنا اموت
غلطت يي وشنو الانسان مايغلط
وحده ربي الي مايغلط .........

للكاتبه نور الربيعي