#نمشه

البارت السادس

للكاتبه نور الربيعي

البارت السادس

مرت اشهر على كعدتنه ...وحسن اشترى قطعه ارض قريبه من بيت اخوي وهم موقع حلو وركن .....
وضل شويه شويه يجمع فلوس ويبني ....اني مامهتمه كاعده بيت اخوي ومرتاحه لا اذيه ولا مشاكل ...جبت امير ..وماحسيت بيه ...ولا واحد يحجي ولا يهين ....بسس مرت اخوي بالبدايه ...تضوجني بتصرفاتها
بس بعدين تعودت على كعدتي بيتها
...حسن منعني البس اتراكات ...ومنعني اطلع بالحديقه ...لان بيت اخوي ناصي والبيوت الي يمه عاليات فيشوفون بالحديقه ....وجان كلما يروح حسن لاهلها والجهال وياي ..
يرجعلي ماله خلك ...وبسس يصيح
ويطلعلي سوالف سوالف
اني عرفت امي داتحجي براسه
فماردت اسوي مشاكل
ضليت اخذ بحجيه وكلشي يريده اسويه
........
عفت ذكرياتي ....ورحت افتح الباب لامجد
اجه كعد يمي عبالك كلشي ماصار ...باوعتله اخذ الريوت وضل يباوع التلفزيون
....البنات جانن يلعبن
:: امجد
::ها
:: ليش ماطلكتني ؟
:: ليش هالسوال
::جاوبني ...هواي عندي اساله ابالي بسس اريدك تجاوبني على هذا السوال
:: لان لازم مااطلكج
:: يعني ؟
:: يعني علمود البنات شفتهن مايتحمل بددونج
:: لا غير البنات .... انت من البدايه جنت واكف وياي رغم اني غلطانه ومحد رضى على الي سويته .... وانت لازم اول واحد ماترضى ..بس شفتك وكفت وياي
:: اي وكفت وياج ...بس مو معناها ماضجت منج ...واصلا كرهتج ولعبت نفسي منج ... بس بنفس الوقت ماردت اخسرج .
:: هاي مو اول مره اسويه
:: وانشاءالله اخر مره
:: واذا سويتها
:: اطلكج ومايهمني كلشي
..........
حسيت نفسي وصخه بهاي الدنيا ...ولازم اغير من نفسي ... كافي لازم ارتاح ....ورجعت اتذكر ذاك اليوم بدايه حياتي التعيسه
بيوم حلمت
...جنت كاعده بيت بي غرفتين ...السكف واكع والحيطان مفطره ..
وجنت مامرتاحه بكعدتي ...وشفت اختي هبه ..كتلها هبه اني ماابقى هنا امشي نروح ...كلتلي نمشه ترا هذا بيتنه ....واني حتى لو ترحين ...راح ترجعين لهذا البيت ...كتلها لا مستحيل اني مااتحمل هنا ابقى
...........وفزيت من نومتي ......جان الظهر والجهال نايمين
....باوعت للغرفه ...صايره هوسه ملاعيب وبطانيات ....كمت داارتب بيها ...وطلعت نضفت الحديقه ............ واخذت راحتي بالتنضيف ...وشويه كعد امير ......طلع بالحديقه يلعب وضليت ابوعله شلون يلعب ....اباوع للباب واحد داايفتح بيه .....شوي ودخل وشفته حسن ..
كمزت من مكاني وطفرت للغرفه ..
اشوفه اجه عليه وعيونه حمر ...
دااحجي اكله الله يساعدك ......اجاني بوكس بوجهي خلاني اطيح بلكاع
..
:: كومي اوديج لاهلج
:: شبيك يمعود
:: كومي يلااااا انتي الحجي ميفيد وياج ....لو مخليج بيت اهلي احسن ... صدك لو كالت امي
:: شمسويه متفهمنيي ...ها احجي ...امك حجت براسك ...الله يعلم شنو الحجي الجديد الي طلعته
:: تاج راسج امي افتهمتي .... يلا حضري نفسج خلي اوديج لاهلج
:: مااروح
لزمني من شعري وضل يضربني بالحايط
::شنو ماترحين ...تمشين حجايتج عليه ... يلا بلا لغوه زايده
............
نزلني بالكاع وطلع من الغرفه .......والجهال ضلو يتابجون ....اجيت احضنهم حتى يسكتون ومايطلعون صوت ويسمع اخوي ....
وضليت ابجي وياهم
هو هذا حظي ...لا يمهم مرتاحه ولا بعيده عنهم مرتاحه
......وشوي اسمع صوت اخوي ...يحجي وياه حسن ......
وحسن يصيح هسه تطلع هسسه ....ميفيد الحجي وياها ... كم مره كتلها الحديقه متطلعين بيها ......... الجيران يشوفوج .....
ماتاخذ حجي الله يهديها
......
اخوي يقنع بيه ...يحجي وياه ولا يفيد ....مشحون شحن
....كمت لميت غراضي وطلعت ....اخوي بعد مايكدر يحجي ... باوعلي واني ابجي ...كلي والله تصفى لتخافين ...
وطلعنا تكسي والجهال وياي .... حتى مابدلتهم ...وضلو بملابسهم
وصلنا للبيت ....وابويه جان توه واصل من المحل ....باوعلي
:: ها بويه نمشه شمالج
باوعتله ونزلت راسي وطبيت جوه
وضل هو وحسن يحجون .......
استقبلتني مرت ابويه ....وعرفت جايه زعلانه .......من جنطتي والجهال مبهذلين ... ماحجت شي .... شتحجي تعودت اجي كم مره زعلانه ... وبعدين تنحل ويرجع كلشي مثل ماجان ....
كعدت بالغرفه ....وطلعت ماي من الثلاجه شربت ...ريجي نشف من البجي والشهك ....وانطيت للجهال ...وكعدت ...
شوي اجه ابوي يصيح ويغلط عليه
انتي ماتعرفين تصرفين
طول عمرج ماتفتهمين
ماتعرفين تكسبين رجلج بحجايه حلوه تهديه
دومج غلطانه ...ضلي بعد مابيه حيلج اني
........
وضليت بيت اهلي اسبوع وحالي حال ... متبهذله كلشش .. وصرت ثكيله كلش ...حسره ع الجهال يلعبون ...صاحو عليهم ...ويجولي يبجون يردون ابوهم ....نسرين كلش وكيحه وماتكعد ولسانها طويل ....مثلي كلش بالظبط من جنت صغيره ...مااخاف من احد ولا جبير
... بسس امير لا عاقل ويفتهم احسن من نسرين رغم اصغر منها هو ........
فد يوم العصريه كاعده ...واندك الباب وراح اخويه يفتحه ....
.....رحت وراء دااشوف منو ....شفته دخل وسد الباب ....باوعت لايده ورقه
.....باوعلي وانطاني الورقه
:: شنو هاي
:: حسن انطانياها
فتحتها :: يي شنو
:: ورقه طلاق

للكاتبه نور الربيعي