بعد مسافة الطريق وصل للقصر,نزل من السيارة بسرعة وهو يتوجه لباب القصر,فتح له البواب الباب بعد ما عرف انه عزام,طلع جواله من جيب البنطلون,واتصل على أحمد,بس قبل ما يتصل سمع صوت أحمد
أحمد:عزام تعال المجلس
عزام توجه لـ أحمد ودخل معه المجلس بعد ما دخلوا المجلس جلسوا
أحمد بقلق:وش صار يا عزام
عزام بجدية قال لـ أحمد كل شي
أحمد بصدمة:تبي تفهمني اني اتكلم مع شخص,يعني هديل هذه حقيقية ومو خيال,يعني انا مو مجنون,لكن متصل مع هذه البنت اللي اسمها هديل
عزام:ايه هذا اللي قال لي عليه الدكتور فيصل....سكت عزام وبعدها
قال:فكر يا احمد اكيد انت تعرف بنت اسمها هديل محمد الـ.......,مو معقول تكون انت والبنت هذه متصلين بدون ما تعرفوا بعض
أحمد وهو يحاول يتذكر الاسم:لا يا عزام انا متأكد اني ما اعرف البنت هذه
عزام:اذا ما في الا حل واحد بس عشان نعرف من هي هديل
أحمد:وش هو الحل
عزام:مو انت بتسوي حفل افتتاح الفرع الجديد بشركتك
أحمد:ايه,بسوي حفل,وكنت افكر اني اتفق مع الشركة اللي قالت لي عليها هديل بس انا مو عارف كيف اوصل لهديل
عزام:طيب,يروح فهد مدير اعمالك لشركة اللي تشتغل فيها هديل,ويتفق معهم,وبنفس الوقت يجمع المعلومات عن جميع الموظفين واسمائهم
أحمد هز راسه بالموافقة:يصير خير
--------
رجع لبيته في ساعة متأخرة كالعادة ونادا بصوت هز البيت
:تركـــي,تركــي
تركي وهو طالع من غرفته
:ابوي ينادي علي اكيد مصيبة جديدة مسح وجهه وهو يقول استغفر الله,توجه لـ ابوه
:نعم يا ابوي
ابو تركي بحنان غير معهود منه:تعال يا تركي خلنا نجلس في الصالة,ونتكلم مع بعض,من زمااان عليك يا ولدي
تركي وهو يكلم نفسه:الحين تأكدت ان وراه مصيبة
بعد ما دخلوا الصالة وجلسوا على الكنبة
أبو تركي:الحين يا ولدي انت كبير ما شاء الله,وصاير رجال,الا قول يا تركي كم عمرك
تركي بسخرية:ليه انت ما تعرف كم عمري
ابو تركي بعصبية:اذا سألت تجاوب على سؤالي من غير ما تسأل
تركي:عمري 29 سنة
ابو تركي بهدوء:يا ولدي انت صرت كبير,ويعني لازم تتزوج
تركي في نفسه:ومن هي تعيسة الحظ اللي بتاخذ رجال ابوه رئيس عصابة مخدرات
تكلم تركي:ومن تبيني اتزوج
ابو تركي:بنت عمك محمد
تركي بعصبية:لا يا ابوي ما ابيها,ابي بنت خالتي
تركي قال انه يبي بنت خالته من غير ما يدري,اهم شي عنده الحين انه ينقذ بنت عمه من ابوه,اللي ما خلاها على راحتها من يوم مات ابوها
ابو تركي بعصبية:بتاخذ بنت عمك يعني بتاخذ بنت عمك
قال جملته وبعدها راح لغرفته
تركي بعد ما خرج ابوه:الله يكون بعونك يا بنت العم من ابوي اللي ما راح يتركك الين ياخذ اللي يبيه منك
--------
في صباح يوم جديد
قامت من النوم على اذان الفجر,دخلت للحمام اكرمكم الله وتوضأت ولبست ثوب الصلاة وصلت صلاتها,بعد ما تمت من صلاتها ناظرت اميرة اللي كانت نايمة على السرير,توجهت لـ أميرة وهزتها بخفيف تبيها تقوم
وقالت بصوت واطي:اميرة قومي صلي
قامت اميرة بهدوء ودخلت للحمام اكرمكم الله,وفي اللحظة اللي دخلت فيها اميرة للحمام, انفتح الباب بقوة
هديل خافت من فتحت الباب:بسم الله
سعاد:يالله قومي للحين نايمة,روحي سوي لي الفطور,وامس ليه ما نظفتي البيت
هديل بطفش:الحين بقوم,روحي من على وجهي
سعاد:نعم,والله لو طولتي لسانك,اقصه,تسمعي
قطع عليهم صوت باب الحمام اللي انفتح وطلعت منه اميرة
سعاد وهي تأشر على اميرة بقرف:ليه هذه هنا,مو قلت لك لاعاد تجيبي لي الاوساخ لبيتي
هديل بعصبية:سعــــاد الى هنا وكفاية,ما اسمح لك تتكلمي على اميرة,التزمي حدودك,والله لو ما احترمتي نفسك,لا ارميك في الشارع,تفهميييين
سعاد بصدمة:هديل انتي تعرفي من تكلمي
هديل:ايه انا اكلمك انتي,اكلم مرت ابوي الاولى اللي تزوج عليها
اميرة واقفة تناظر المشهد وتناظر سعاد بقرف
تكلمت اميرة:عن اذنك يا هديل,واسفة لاني سببت لك مشــ
هديل وهي تقاطعها:لا يا أميرة ما سويتي شي,نفطر وبعدها بنروح
سعاد قاطعت كلامهم:تروحوا وما ترجعوا ان شاء الله,وانتي يا هديل حسابك معي
