اخر حاجة كانت كتوقعها هي يتصل بها هداك اللي ملي شافتو اول مرة، عجبها و خبات إعجابها لأنها ما كاتيق حتى فشي واحد باش تبين اسرارها. الهضرة بينهم كانت قليلة وعادية ولكن لقات فيه انسان مثقف و منفتح و كيحترم الناس. ما شي بحال شي وحدين. التكبر والفهامة الخاوية! هو ملي كتشرح ليه شي دواء كيتصنت و يخليها حتى تسالي عاد يسول. اللباقة ديالو معمرها شافت بحالها. حتى المظهر ديالو عجبها و باين بلي كايمارس شي رياضة! هادشي علاش ولات كاتبغيه و كاتمنى امتى يطل، بلى ما تبين هاد الحب!
ما عرفاتش كي داز الوقت حتى وصل موعد اللقاء مع رشيد. ملي دخل للصيدلية بان ليها بحال شي عريس ولا معروض لشي عرس. بعد ما سلم عليها قرب منها و تكلم بشوية بحال الى خاف اسمعو شي حد:
- ما غانطولش عليك! الموضوع لاش جيت هو انني بغيتك تكوني مراتي على سنة الله و رسوله! اللي ما عرفاهش، هو انني انا ومراتي الاولى هذا عام باش حنا مطلقين. وقعات شي اختلافات و مشاكل بينتنا و لقينا اننا مايمكنش نستمرو. فالأول قررت باش نتفرغ لولدي و ما نعاودش نتزوج، ولكن ملي كنجبدوك لقيتو كيبغيك بزاف و حتى انا لقيت فيك جميع المواصفات اللي كايتمناها كل راجل. دخلتي لقلبي و ما نسخاش نعيشو مجموعين. الى قبلتي غادي تعمري علينا و ديري فينا خير، لحقاش كيعيش ففراغ منهار مشات ماماه. انا ما زربانش، خذي الوقت اللي يخصك للتفكير، حاجة وحدة، كوني متيقنة بلي هادشي ما فيه لا كدوب ولا نفاق!
ما خلاش ليها الفرصة باش تجاوب، سلا جوج كلمات ديالو و مشى. بقات تالفة و جاب ليها الله بحال الى كانت كتحلم. ما صدقاتش هاد الشي اللي وقع! حتى من البورطابل و السوارت نسات فين حطاتهم و ما لقاتهم حتى مشات تحماق. بدا قلبها كيدق و ما عرفاتش علاش عينيها دمعوا. واش من الفرحة و لا من المفاجأة!بقات الليل كامل كتفكر فالجواب اللي تعطيه لرشيد. ما عمرها تصورات ان الأمور غاتمشي بهاد السرعة. ابتسمت ملي جاتها واحد الفكرة غريبة: واو! شحال زوين تكون عندك اسرة فيها زوج و زوجة و طفل من الاول! بلى ما تسناي تحملي وتولدي و شحال من شهر على ما يكبر و يقدر يتمشى و يتكلم! كلشي موجود! الراجل والولد والدار والطوموبيل!
هزت البورطابل و عيطت لرشيد اللي كان غارق فالنعاس و تسنات شحال عاد فاق.
-الو، حسناء؟
-وي انا حسناء، اسمح ليا فيقتك من النعاس!
-لا هانية ما كاين مشكل. ياك لاباس؟
- غير بغيت نقوليك بلي موافقة!
- واو! بصح؟ هذا خبر سار، تأكدي بلي غانكون أحسن زوج.
-كتمنى يكون كلامك صحيح . كانعتدر مرة اخرى على الديرونجمون. تصبح على خير سي رشيد.
