غاليتي

البارت 12

______________________
‎2:00 م
المنجي خش للمطبخ وشايل شكاير : السلام عليكم
امينه : وعليكم السلام
بحت في غاليه وحركلها حواجبه
اميره : مبروك الشقه
المنجي : الله يبارك فيك
امينه : كان نعرفها الي لعبت بعقلك ناكلها بسنوني
غاليه بحتت في هناء وسكتت
هناء : ياأمي فوقك احمد مش لازم هما الاثنين
المنجي مصبي عند الباب : شن دايرين غداء
امينه اتحرك في الرز : امبطنه و رز بالتقليه
المنجي بحت في غاليه : كذا طاسة اميه ياغالية
غالية صبت صبتها ومدتها له
المنجي مسك يدها وهو ياخذ منها في الطاسه
غاليه تلخبطت : هناء وين حطيتي تليفونك
هناء : فوق في الدار
غاليه طلعت ركبت
المنجي ضحك ومشى يبي يطلع للصاله
هناء صبت تجري وطلعت وراه : منجججي
المنجي برم : ايوه
هناء : انسيت انقولك بكرا عيدميلاد غاليه
المنجي رقاله : كنك ماقلتيلي قبلها
هناء : انا بروحي راحت من بالي بكل
المنجي : انديرولها حفله برا
هناء : وين نص المكانات صكرن ايام الضرب
المنجي سكت شويا
هناء : شن تبي تاخدلها ؟
المنجي : مش عارف مزال ؛ شن رايك في الحياة مول ؟
هناء : باهي كيف انديروها لها انكلمو هلها وهكي
المنجي هز راسه : لالا كلمي صاحباتك اعزميهن وانديروها لها مفاجأه انتي قولي قدامها على اساس تبي محلات وانا توا انشيلكن
هناء : انقول لصفاء ومروه
المنجي : اكيده اها
غاليه نزلت مالدروج ابتسمت : شن تحكو
هناء : انقرمو فيك قتله بارده البنت هذي
غاليه ضحكت : عليك سماطه
المنجي : شن جونا اليوم احسن ؟
غاليه هزت راسها : تمام الحمدلله ..
ومشت تبي اتخش للمطبخ
المنجي : كنك تهربي مني انتي كلما ندويلك
هناء : انه الرعب ياساده 😂
غاليه فنصت فيه : فكني مالوجيج
هناء تضحك : امينه يامخوفتيهم كلهم 😂
امينه في المطبخ : شن قلتي ؟
المنجي ضرب هناء : سلامتك ياامي
رجب فتح الباب و خش : السلام عليكم
المنجي : وعليكم السلام ياحاج
امينه طلعت : روحت يارجب
رجب يمسح في عرقه : صهد برا
______________
أحمد درس قدام الحوش
ويحكي في التليفون : لا تبي بنادول
ومسك اختبار الحمل بحت فيه
هبه : باهي وانت عليش حارق دمك وجايبلها دواء خليها تجيبه بروحها
احمد تنهد : مانبش صداع بعدين هضا دواء تجيبه حتى للغريب
هبه : مش ناوي اطلقها يااحمد ؟؟
احمد تأفأف : توا هذا وقته يابوبي ؟
هبه اضايقت : انت وعدتني انك تاخدني
احمد : باهي انا نبي ننزل توا لان اليوم خميس غدانا عند هلي لازم مانطولش
وتليفونه الاخر رن : دقيقه بس
ومسك التليفون الاخر ورد : ايوه
اميره : وينك يامودي ؟
احمد : هياا حاصل في الزحمه توا كيف خشيت الشارع
اميره : وحشتني
احمد سكر على هبه الخط في التليفون الاخر
اميره : مودي
احمد : حتى انتي وحشتيني .. عطيني شويا بس جاري مصبي ضبحلي
هبه اضايقت اكيده هي الي رنت عليه وسكر في وجهي
بس ياانا ياانتي يااميره !!
احمد مسك التليفون الاخر الي دايره من ورى اميره
بحت فيه وحطه تحت الكرسي ونزل ..
_____________________
‎6:00 م
غالية ماسكه التليفون تحكي مع المنجي : وراسي انا كحل بس والله مايبان
المنجي : انا قلت لالا
غاليه : عشان خاطري
هناء اتوشوش فيها : قوليله عشان خاطري ياحبيبي
غاليه فنصت فيها
هناء تجدا فيها : الله يربحك لسنيه 😢
المنجي : تي وين رحتي
غاليه : معاك
المنجي : مش عارف قبل اليوم ماشي للشقه سيبت الزواقين بروحهم
غالية : مش معاهم الراجل الي يشرف عليهم
المنجي : لالا انا مصبي عليهم بروحي عليش تخرجت مالهندسه كان نبي انجيب مقاول
هناء تقرص فيها : قوليله حبيبي ياحقيره 😠
غالية ادف في يد هناء و بصوت واطي : حبيبي
المنجي : عيون حبيبك
غاليه : وراسي خلي هنيوه ادير خط كحل
المنجي اضايق : عليك قصة معش فضت
غالية : والله مايبان في الجفن من فوق حتى مش من جوا
المنجي : وكان لقيتها دايره حاجه اخرى ؟
غاليه : لالا كحل بس وعلى ضمانتي
المنجي : هاتي احبيبه به
غاليه كشرت : لالا مافش
هناء اتوشوش : كنه ؟
غاليه حطت يدها ع التليفون : قالي عطيني احبيبه 🙄
هناء : عااااطيه عااااطيه الله يسترك استريني 😭😠
غاليه : لالا مانعطش
المنجي : غاليه !!
غالية : نعم
المنجي : هناء احداك صح ؟ 😒
غالية : لالا انا متغطيه بالورغان وهي تلبس
المنجي : باهي انا نبي انشف شعري ونلبس
غاليه : مازلت بالمنشف ؟؟ راك تمرضلي
المنجي : لا جو تمام
غاليه : باهي خلاص اتفقنا ع الكحل ؟
المنجي تنهد : عارفه كان نزلتلي من فوق تقول عروس والله ماهي خاشه للمربوعه 😠
غالية : لا والله ماتخاف توا ادير خفيف
المنجي : اوكي توا
غاليه ؛ باي ......... وسكرت
هناء : شن قالك
غاليه ضحكت : قالي به بس خفيف
هناء صبت اتنط : ياناااعلياااا واخيييييراً 💃🏻💃🏻😂
_____________________
اميره ادير في سلاطه روسيه و اتخلط فيها بالمايونيز
المنجي خش للمطبخ
اميره : عقبالك
المنجي : سلمك 😒
اميره : عميمه قالتلي في وحده في عقلك
المنجي : ان شاء الله
اميره : عرفني عليها
المنجي : توا لما تخطبوها ليا اتشوفوها
هناء خشت : اميره سامحيني تعبتك
اميره : لا عادي مافيش تعب ..
هناء : وين ماما
اميره : مش عارفه مش قالت ماشيه اتعزي
هناء : اها صح اكيده مشت وقريب اتروح
المنجي تليفونه رن فتح الخط : ها يالوس
غالية خشت بحتت في هناء
هناء قلبها يدق
المنجي : هياا اني طالع
غاليه بحتت فيه : جاا ؟
المنجي غمزها وطلع : جاا 😉
_________
وسام مرتبك ومصبي برا ماسك علبة بكلاوه و باقة ورد
المنجي فتح وبحت فيه : لمن جاي ياشاب
وسام : كنك 😳
المنجي ضحك : والله ماعرفتك ياصاحبي كنك نظيف 😂
وسام ضحك : عدي يااا .....
المنجي : را والله نرفضك ! 😏 افطن رقبتك في يدي 😂
وسام يضحك
المنجي فتحله المربوعه : خش يالوس
________
هناء بحتت فيهن : شكلي كويس ؟
غاليه : تجنني ❤
اميره مشت شور القهوه وبحتت في غالية : انحطو القهوه معاها شنو قاتو الي جابه احمد ؟
خش المنجي مدلهن باكو البلاوه : هاكي هذا
جت اميره خداته منه : معناها انحطو حتى من الي جابه الراجل
غاليه حطت القهوه ع النار ومصبيه ترجا فيها تفور
المنجي بحت في هناء : تعالي
هناء قلبها يدق وبحتت في غاليه
المنجي : مش وقت تبحيت في بعضكن اطلعي قدامي 😡
وسام في المربوعه مقمعز ومرتبك
المنجي صبّا عند الباب : تعالي خشي
هناء بصوت واطي : السلام عليكم
وسام ابتسم ويبحت لوطه : وعليكم السلام ورحمة الله
هناء قمعزت وقعدت ساكته
المنجي قمعز
وسام ساكت متحشم يحكي معاها احدا خوها
___
اميره : توا المنجي قعدلها غادي ضروري يطلع
غاليه : مش هايطلع
اميره : فكري معايا في سبله انجيبوه بيها
غاليه اتصب في القهوه : توا انقوله يجي ياخد القهوه و نمسكه برا
اميره علي ما وتيت انا الموالح بسرعه مرات الراجل مايطولش
غاليه : اول مره في مقابله انشوف حد يدير موالح
اميره : عميمه قالت عشان يعرفوه مش حد براني
غاليه رفعت السفره : توا انرد ناخد مترد البكلاوه
مشت للمربوعه و صبت عند الباب : منجي
المنجي صبا طلع : كنك 😡
غاليه ابتسمت : خود القهوه
المنجي خداها
غاليه : تعال بعدها خود الحلو
خش بالسفره حطها ع الطاوله وطلع يبي ياخد البكلاوه
غالية : كنهم ساكتين ؟
المنجي راقيله : مانعرفش 😑
وخش
اميره تباوعتها : شن صار
غاليه : خش شن اندير ؟ 😥
اميره : ضبحيله ديري اي سبله ولا طيحي مش انتي ديما طايحه ؟ 🙄😂
غاليه ضحكت و ردت اخرى عند الصالون
المنجي : خود قهوه ياوسام كنك ياراجل مانكش براني
وسام متخزرط : توا ناخد مش داير غيبه
المنجي : عليش متحشم قوللها شروطك وانتي قوليله وفضو السيره الي معش كملت
هناء ابتسمت وساكته
غاليه قدام الباب : منجي
المنجي تأفأف وطلع : تي كنك ازف كل دقيقتين اتضبحي
غاليه مسكاته من يده : وراس عيوني تخليهم شويا
المنجي كشر : لالا
غاليه ماسكه يده واتبحت فيه : وراسي انا خليك معايا طشه وخش
وكراته من يده : قمعز هنا ع الدروج شويا نبيك
قمعز المنجي ع الدروج وقعدت غاليه اتلهي فيه
وسام بحت فيها : كيف حالك ؟
هناء ابتسمت : الحمدلله تمام ؛ وانت
وسام ضحك : تمام ..
و شرب القهوه وحطها : طبعاً بلا مانعرف بروحي عارفتيني وعارفه جميع المعلومات عليا وانا نفس الشي
هناء ساكته وتسمع فيه
وسام : اكيد عندك شروط تبي تقوليهن زي ما انا عندي
هناء بصوت واطي: اكيده
وسام ابتسم : باهي تفضلي نسمع فيك
هناء هزت راسها : لالا انت قبل قول
وسام ضحك : باهي تمام ..؛ انا لاني واعر لاني معقد طبعي كويس وشفتي خواتي لبسهن عادي و اخرى لينا مش متحجبه يعني لا نفرض عليك عبايه لا خمار
هناء ضحكت : تمام بكل
وسام : كملي قرايتك واشتغلي و سوقي كان تبي تسوقي
هناء تسمع وفرحانه
وسام : لكن حاجه وحده نبيها انا راجل نحب المراه البيتوتيه يعني جو الغداء السمح و اصناف جو انروح مالحوش نلقى غداء يمسح الكبد
هناء ضحكت
وسام يضحك : اهم حاجه بطني واسألي خوك
هناء : هذينا بس شروطك
وسام : لا و حاجه تانيه الي يصير في الحوش مانلقاش لا عند هلك لا هلي
هناء : تمام كان هكي
وسام ابتسملها : وانتي شن شروطك ؟
______________________
غاليه مصبيه قدام الدروج : شفت كيف انطلقو وحكو بعد طلعت
المنجي ضحك : يعني انا الي كنت مخرب
غاليه : اها طبعاً توا بحت نحنا بروحنا محلانه تخايل يجي حد يخرب علينا مش هانسكتو ؟
اميره تباوعتهم : منجي جيب القهوه خلاص وخود الموالح
غالية ضحكت : اهو شفت لما اميره طلعت سكتنا
المنجي اضايق : نعنجد موالح ؟ مش لمه هي 😑
غاليه ابتسمت : امي امينه قالت هكي ونحنا نفذنا
المنجي : عليك رايات 😤 ...
غاليه : وراس حبيبي روق شويا
المنجي صبّا
غاليه : خود القهوه وتعال
المنجي خش عليهم سكتو
وسام بحت فيه : وين يامانجا
المنجي : خلاص الامور تمام واتفقتو ؟
وسام ابتسم : لا تمام
المنجي بحت في هناء : باهي هيا كان عندك حاجه قوليها واسقدي
وخذا القهوه وطلع
هناء جت تبي اتصبي
وسام : هكي متفقين تمام
هناء تحشمت : ان شاء الله خير
وسام مسك باقة الورد وابتسم : هاكي هذي لكي
هناء خدتها منه : شكراً ليش تعبت روحك
وسام : لا مافش تعب
هناء طالعه خبطت في المنجي شايل سفره
المنجي بحت فيها
هناء وجها انحمر وخشت تجري للمطبخ
غاليه بحتت في الورد : ياخيااا نجيه
اميره ضحكت : يفهم في الذوق طلع
هناء قمعزت : ياناعليااا يابنات وجي طاااح
اميره قمعزت مقابلتها : باهي شن قالك
هناء : شروطي الي نبي انقولهن له ابتاع قرايا وشغل سبق بيهن هو قبل واخرى سوقي و جوه يهبل 😍
غاليه كرت كرسي وقمعزت معاهن
________________________
‎12:00 ص
احمد راقد في سريره وراقيله
اميره فتحت الحمام وطلعت خشت للدار
بحتت فيه لقاته راقيله
اميره : كنك
احمد احمد بحت فيها : انتي الي كنك مبتسمه
اميره ضحكت : انا حامل
احمد ضحك لكن ارتبك في نفس الوقت !!
________
هدا بارت هديه مني 😍😍