غاليتي

البارت 23

______
‎10:00 ص
امينه وخواتها يفطرن في المطبخ
امينه مقعمزه تاكل في كعك : انا ماني عارفه شن دايرتله
امباركه : والله تكسبي فيها اجر
امينه اضايقت : انا الي مربيتها يابريكه يعني كيف بنتي بس مانحبش النسب مع القرايب ومع الي نعرفوهم
عيشه سكتت
امباركه : خلاص انتي خليه براحته
وسمعن صوت الباب انفتح
امينه : هضا رجب اكيده
عيشه لبست محرمتها
رجب بصوت عالي : السلام عليكم
امينه : خش مافي حد براني
رجب خش : شن حالكم شن دايرين
عيشه : مبروك علي هناء
رجب : الله يبارك فيك عقبال عندكم ؛ كيف حالك ياامباركه
امباركه : الحمدلله مبروك عليكم عقبال المنجي
رجب بحت في امينه : ماكلمتش البنت
امينه هزت راسها بمعنى لالا : قلت انخليها براحتها انا
رجب طلع للصاله : وين منجي ؟
امينه ارتبكت : ناض من ساعه و طلع قال عنده شغل
_________________
هناء ناضت فتحت عيونها
بحتت في وسام لقاته راقد
صبت بشويااا وخشت للحمام
وطلعت خدت تليفونها وطلعت للصاله
غاليه راقده تسمع في تليفونها يهز ع الكوميدينه
مسكاته ويادوب فتحت عيونها
لقتها هناء
ضحكت وفتحت الخط : الو
هناء : صباااح الخير ياحبي كله
غاليه ضحكت وتثاوب : يابنتي خليك مع راجلك شن تبي فيا مالصبح
هناء تضحك : راجلي قاعد يجخر مش فاضي
غاليه تضحك : هاتقعدي طول عمرك نذله والله
هناء : اسكتي يالولي امس عليك ليله
غاليه ضحكت : هاا شن صار شكلك انتي هجمتي ع الراجل
هناء ضحكت بصوت عالي : لا والله مسكت روحي
وسام ناض وجاها : حبيبتي
هناء ابتسمتله : صباح الخير نضت
وسام شايرلها بمعنى من
هناء : غاليه
وسام قعمز احداها : سلميلي عليها قوليلها عقبالك
هناء : قالك عقبالك
غاليه : ان شاء الله ؛ خلاص عيب خليك مع الراجل
هناء ضحكت : اوكي توا نحكو مره اخرى ؛ المهم كلمي ماما قوليلها ولا قولي للمنجي
غاليه استغربت : شن انقول
هناء ماتبش تحكي قدام وسام : ان خلاص يعني
غاليه فهمتها : لا مانقول لحد انتحشم
هناء : خلاص عابيه عليك اتقولي لحد فيهم المهم مش شوري .. بااااي
وسكرت الخط
غاليه حطت التليفون وناضت تلم في شعرها
بعدها اذكرت منجي مسكت التليفون ورنت عليه لقاته مقفل
خلت التليفون ع السرير وصبت ..
______________
‎4:30 م
رجب ياكل : ليش مسكتيهم ع الغداء ؟
امينه : قالن يبن يروحن لها ثلاث ايام بايتات
رجب : باهي كويس
امينه تاكل ومرتبكه ساكته
رجب : وين منجي ماروحش
امينه : بلكي عنده عمل عادي مرات يطول
وسمعو صوت الباب ينفتح
منجي شافهم ياكلو
سكر الباب : السلام عليكم
وجا سلم على رجب : خير ياباتي
رجب : قعمز تغدا
منجي : لا متغدي الحمدلله
امينه اتبحت فيه وساكته
منجي ركب لداره
رجب : كنه قالب وجه
امينه : والله ماني عارفه الله اعلم بلكي مشاكل في العمل
رجب يسمح في ايديه : الحمدلله ؛ جيبيلنا الشاهي
امينه صبت : هيا خليته يطبخ ع الناار توا نجيبه
المنجي نازل ع الدروج وشايل شنطه كبيره
رجب شافه استغرب : كنك خير ان شاء الله
منجي سكت
امينه طلعت بالشاهي شافاته : درت الي في راسك
منجي بحت في باته : باتي ماشي تركيا كم يوم
رجب : كنك شن فيك
منجي : عندي شغل طلعلي فجأه
امينه عيونها دمعن : تبي تعدي تلوي في ذراعي
رجب علا صوته : قاعد انقول شن في
امينه تبكي : عشان البنت غاليه قلتله ماتاخدهش
رجب تنهد : وانتي مازلتي في جررك ياامينه ماقتلك خلاص فضي السيره وخليه ياخد الي يبيها مالك وماله
امينه اتعيط : على لوي ذراعي كان فيها طلاقي يارجب
المنجي تعصب : لا نبي غاليه لا غيرها اقعدو فيها
رجب تعصب : توا انت ماشي عندك شغل وراد يعني
المنجي : اها
رجب : اربح ياباتي
المنجي يكر في الشنطه
امينه اتعيط وراه : والله ماني مسامحتك كانك مشيت
واتبحت في رجب : طلقته يمشي والله ماهو راد عارفته
رجب يهزب : راجل بلحيته ويدرك الصح مالغلط خليه يدير الي يبيه بلكي خير ايتريح من زنك
امينه انصدمت : انا انزن يارجب
رجب خش للحمام وخبط الباب بالقوه
امينه قعمزت ع الكرسي وقعدت تبكي : حسبي الله ونعم الوكيل
_______
المنجي طلع يحط في الشنطه في ذيل السياره
خطم عليه انس : يامانجاااا
منجي ابتسم : انوووس
انس وقف عليه بالسياره : وين واخد شنطتك معاك
منجي : ناوي العفسه
انس : لا ياراجل ؛! عمل ولا دهواري
منجي : والله ماني عارف هو عمل بس مرات قاعد فتره غادي
انس : باهي غير وانت مروح راك تنسانا بالحلقوم التركي
منجي ضحك : عيب ياطير انجيبلك شنطه كامله
انس : ماتبي شي يامانجا
منجي : سلامتك حبيبي والله
انس : اوكي ياطير
منجي شايرله بيده : تشاو
__________
غاليه مقعمزه وماسكه تليفونها
اتجرب في منجي تلقى فيه مقفل
اتأفأف وحاطه صبعها في فمها
سعاد بحتت فيها : كنك شن فيك
غاليه ابتسمت : شي ماكنش
صفاء جت قعمزت احداهن : ماما
سعاد : نعم
صفاء : مكسدين خاطرنا نطلعو
سعاد : ارجي نين انفك الرباط و انطلعكن
صفاء اتأفأف : ملينا بكل وانس مافش فايده
سعاد : وين مافش فايده قاعد الصبح في الضمان والعشيه محل اسمله عليه
انس فتح الباب : سمعت اسمي ولا تهيالي
سعاد ضحكت : ولد حلال ؛ كنك طولت
انس خش دار المقعد : سخنولي الغداء بسرعه وقت عالمحل
غاليه جت تبي اتصبي
صفاء شايرتلها : خليك انا ماشيا اصلا للمطبخ
انس قمعز : تلاقيت مع منجي برا يكركر وحالته حاله
سعاد بحتت في غاليه : كنه فيش يكركر
انس يلعب بتليفونه : يكر في شناطي ودنيته حايسه قال ماشي تركيا
غاليه انصدمت و قعدت اتبحت في انس زين
سعاد : غريبه ماحد قال انه ماشي
انس : انا امس كنت معاه ماقالش شكله فجأه صارت
غاليه صبت بسرعه ومشت للدار
سكرت على روحها وقعمزت ع السرير اتفكر
كيف يسافر بلا مايقولي
اكيد طفش مني
اقطع دورتي ياريتني ماحكيت على ساره
_____________
المنجي يحكي في التليفون
وهو في السياره : يعني حصلتلي واسطه على بكرا متأكد ؟؟؟ ...... مش نمشي ويردوني ؟؟؟ .... ندفع زياده عادي .... خلاص تم ع الفجر نسقد ... بس تعال عشان تاخد السياره تقورجها .... توصلني انت ؟ ..... خلاص تم ياصلوحه وانت طيب .... تشاو يامعلم ....
___________
#بعد_مرور_اسبوعين ??
‎5:00 م
امينه مقعمزه ف الصاله وتبكي
رجب طلع مالحمام ولابس يبي يطلع : توا عليش تبكي مش انتي الي خليتيه يمشي معناها ليش دايره عزاء لكي اسبوعين نزحتي دموع
امينه تبكي : حتى سماعة تليفون مارفعها ولا اطمنا عليه ولا قال وصل ولا لا
رجب : خلاص خليه كان صارتله حاجه شينا رانا سمعناها لكن اكيد كبده درهت منك ومن نكدك و سيبها لكي وشكلي حتى انا نبي انسيبها لكي انوض ونرقد على عزاء كل يوم
امينه انصدمت
رجب طلع وسكر الباب
فتح الباب الي برا لقى وسام درس السياره
هناء جايا زايره لهلها
نزلت وسلمت عليه
رجب فرح لما شافها واضبطها زين : سلم بنيتي مخليه مكانك ف الحوش
هناء : كيف حالك يابابا شن داير والله وحشتوني بكل
وسام نزل مالسياره وسلم عليه : خير ياعمي شن حالك
رجب يسلم عليه : الحمدلله الله سلمك
وفتحلهم الباب : خش ياوسام
وسام ابتسم : والله ماعندي وقت ياعمي ان شاء الله مره اخرى
رجب ضحك : مانبش نحلفلك اتخش راك صاحب حوش و وليدنا مانك براني
وسام ضحك : والله هلي وماني داير غيبه ياعمي
هناء خشت للحوش ادق ع الباب الي جوا
امينه فتحت ولقتها هناء : هنيييييوه
هناء اضبطتها : ياقلبي اناا ياماما رايفت عليكم بكل
امينه تبكي : مخليه مكانك ياهنيوه الحوش فضا علياا
هناء ضحكت : ضربتين عالراس يوجعن انا ومنجي مره وحده ؛ ياماما ليش تبكي خلاااص
امينه تسمح في دموعها : ليش ماقلتي انك جايا را مسكت اميره مشت لهلها
هناء تسلح في محرمتها : توا انا برانيه ياماما توا نقعد انجيكم كل يوم
رجب خش جايب شكاير و صندوق عصير في يده
امينه بحتت فيه ؛ شنو هذينا ؟
رجب حطهن ع الطاوله : جابهن وسام
امينه : سلمه جياب ليش مانزل
هناء : عنده شغل ماشي لصاحبه يرجا فيه
امينه قعمزت : تعالي احكيلي كيف حالك عربك شن دايره في الزيزه
هناء تضحك : والله تمام ماشي حالي
امينه : قلتيلي امس تبي اطيبي طيبتي
هناء : لا والله ماخلتني عمتي قالتلي مازلتي عروس
امينه ضحكت : باهي سلم عمتك ريحاتك لاحقه ع المطبخ والشقاء
______

كيف حالكم حبايبي
هدا بارت تاني اسفه ع تأخيري انشالله معاش تكرر
لاتنسوا 👈🌟
مع السلامه