غاليتي

البارت 15

_______________________
اميره راقده فطنت حد يبوس فيها في خدها فتحت عيونها لقاته احمد
فتحت عيونها ومسحت خدها : شن تبي لاحقني لعند هنا
احمد بصوت واطي : انا اسف حقك عليا كان راقيلي
اميره قمعزت : اطلع برا وسكر الباب را والله نمشي لعمي
احمد متضايق : كنت فاصل امس والله ماقصدي
اميره صبت : سيبتلك الحوش بلي فيه عليش لاحقني
امينه فتحت الدار وفنصت فيه : توا عليش جايها ادره في كبدها المراه اتوحم ومش ناقصها
احمد : امي ارجوك ماحد يدخل ✋🏼
اميره : شن رايك اندخل هلي ولاهلك ؟؟ وانت عارف بابا كان مشيتله حرجاته هايطلقني منك دغري وقالها لك قالك يوم الي اتجيني حرجانه معش اترد
احمد ايتأفأف : اصلا الحق علياا انا جاي انصالح فيك واتهددي فيا
امينه : اطلع امشي شغلك
وبحتت في اميره : اطلعي افطري قوتي روحك خليه توا يشعف ويرد للطريق
اميره فرحت بكلام عمتها وبموقفها معاها ❤
واضايقت من روحها لانها ماكانتش اتعامل فيهم كويس وخاشه عليهم مالبدايه كإنها خاشه جبهة حرب
ف قررت انها تكسبهم وتعاملهم كويس عشان يقعدو ديما في صفها 💪🏼
__________________
‎4:30 م
المنجي طالع مالدار : هناااء .. هنااااء
هناء تباوعاته من لوطه : كنك
المنجي قرب مالدروج وبصوت واطي : كلمي غاليه قاعده مكسده بروحها
هناء ضحكت : الحب دح دح 💃🏻💃🏻😂😂
المنجي : هياا قبل مانطلع عشان انجيبها
هناء : بس هي واميره مايحبنش بعضهن
المنجي هز راسه بمعنى لالا : يومتها حسيتهن تمام بدا يمشي الجو غير كلميها توا تجي
هناء : تم توا انقوللها
امينه نازله م السطاح : طالع ؟
المنجي بحت فيها : ماشي انشوف حمامات
امينه مسكت سوريته : حرام هذي مش ابتاع بهدله
المنجي: لا جو تمام
امينه : غير كان طاوعتني وبنيت فوق خوك
المنجي نازل مالدروج : كان هضا را مزال حتى ماصبيت السقف
امينه اضايقت : خاطري نعرف عليش مستعجل بس قيسها كلباتك وكلت عقلك
المنجي ضحك : ان شاء الله خير
_________
‎4:30 م
غاليه مقعمزه فاتحه فيس واتفتش في صفحة المنجي
: احسن مافش ولا بنت معلقه الا ساره بنت خالته تدحنس
اوووف مش عارفه امتى نبي نفتك منها ان شاء الله تجوز وانتريح وانا كان نلقى نحبسه في فازو واندسه في دولابي ماحد يشوفه
تليفونها رن
غاليه فتحت الخط : ألو
هناء تضحك : تي وين لقيتك منزله بوست
غاليه : اها رديت للفيس مانحكيلكش
هناء : اكيد دايره برج مراقبه ع المنجي
غاليه ضحكت : مانحكيلكش توا كنت انفتش
هناء : حتى انا اول ماقالو وسام يبي يخطبك تذكري شن درت ؟
غاليه ضحكت : درنا جوله تفتيشيه في الليل
هناء : تعالي اليوم كسدي معانا
غاليه : انتي ومنجي
هناء : انا واميره
غاليه : لالا فكيني منها توا تقعد اتعزق في الكلام
هناء : وراس لولي توا انحطو فيلم وانغيرو جو
غاليه : توا انشوف ماما هانقول انك رنيتي على تليفون صفاء
هناء : مزال ما حكيتيلها انتي ؟؟
غاليه : مزال وخايفه اتقلولي كيف تقبلي هديه هكي
هناء : باهي حكيتي للمنجي ؟
غاليه : لالا مانبش انقوله انخاف انقوله يقول في عقله هذي تبي امها تعرف يعني اتزر فيا ع الخطبه
هناء : انتي تعالي هو توا يروح يدير حمام بعد المغرب توا نعزقله دوس
غاليه : خلاص توا انقول لماما وانجي
هناء : رني عليه راك تجي بروحك ويديرلك نهار اسود
غاليه ضحكت : لالا شعفه وتوبه توا انقوله يصبيلي في الشارع ...
وخش عليها المنجي انتظار : اهوا يرن سكري
... وردت عليه : ايوه حبيبي
المنجي : كلماتك هناء يابيبي ؟
غاليه : توا خشيت عليا انتظار انت كنت نحكي معاها
المنجي : مش عارف التليفون مايطلعش الانتظار
غاليه : اهاا
المنجي : باهي جايا ولا لا ؟ هياا انا نبي نطلع توا را
غاليه : باهي عدي للشقه توا انرن عليك بعد ساعه تعال خودني
المنجي : على اساس تبي تلبسي فيلو انتي كلها عبايه واطلعي
غاليه : لالا مانبش عبايه
المنجي : هي نص ساعه للشقه وانجي نلقاك واتيه
غالية : باهي حاضر
المنجي : الله الله في شعرك ؛ مانبش انشوف شعره برا
غاليه تضحك : حاضر
__________________
سعاد اطيب في قهوه في المطبخ
غالية خشت بحتت لقت سفره وفناجين ع الطاوله
بحتت في امها : لمن هضا كله من جاينا
سعاد : رجاله جايين لبوك
غاليه خدت طرف اغريبه من المترد : من هما
سعاد : مانعرفش قالي جاييني رجاله
غاليه : غريبه انظر من
سعاد : شن دايره هناء في الخطبه ؟
غاليه : تمام الحمدلله مبسوطه
سعاد : ان شاء الله تلحقيها ونفرح بيك
غاليه ضحكت : ان شاء الله
وسكتن شويا ..
غاليه : نبي نعدي لهناء
سعاد : مش كنتي معاها امس ؟
غاليه : قاعده هي واميره وامها ماشيا لحوش خالتها
سعاد : من من خالاتها
غاليه : عيشه تهيالي ماسألتهش انا
سعاد : باهي عدي غير ماطولش في الترويحه
غاليه تمسح في ايديها : باهي حاضر مش هانطول
______________
اميرة مقعمزه في دار المقعد
هناء : خلاص فكيها عاد
اميره بحتت فيها : خاطري نعرف شن قلبه عليا
هناء : بلكي انتي درتيله حاجه بلا ماتفطني
اميره هزت راسها بمعنى لالا : والله ماجيت شوره
هناء سمعت الجرس صبت : اكيد هذي غاليه
اميره اضايقت : انتي كلمتيها ؟
هناء : اها قلت انغيرو جو
اميره سكتت
_______
المنجي ماسك تليفونه وفاتح ع الصور : خلاص يعني الطقم هذا انركبه في الحمام الكبير
غالية : والصوره الي قبل هذي ركبه في الحمام الصغير
المنجي يبحت في الصوره : خلاص تم
غاليه : كان سعرهن غالي فوتهن انشوفو وحدات اخرى
المنجي : خلاص اسكتي يامسكينه عليش نستخسر في روحي الحاجه السمحه خلي الواحد يعيش
غاليه ضحكت : عيش من ماسكك
المنجي : هانت خلاص انركب المطبخ انجي نخطبك دغري ويقعد مزالي الاثاث بس
هناء فتحت وبحتت في غاليه : وينك
المنجي : ماتبن شي انا طالع
هناء : دير خير جيبلنا عشاء من برا
المنجي ضحك : ورايا حوش انكمل فيه بشويا عليا
هناء ضحكت : الحوش ادير فيه لغاليه مش لياا انا نبي ناكل
غاليه تضحك : اعوذ بالله من لسانك
المنجي : باهي كان كملت بدري وطلعت توا انرن عليك ....
وطلع وسكر الباب .....
اميرة مقعزه بروحها في دار المعيشه
غاليه تباوعتها : اهلين
اميره ابتسمت : خيرات كيف حالك
غاليه : مبروك عليك البيبي
اميره : الله يبارك فيك عقبالك
هناء مصبيه عند الباب : انديرو كبتشينو
اميره : هنيوه انا قهوه عربيه الله يربحك راسي يبي ينفجر
هناء فنصت فيها : مش كويس عليك وانتي حامل
غاليه بحتت في اميره : حطي معاها حليب
__________
مختار في المربوعه : بلا راي البنت المهم نا انتهنى عليها
مصطفى : لا ياعمي المهم رايها ماناخدهش غصب كانهي ماتبش
مختار يشرب في القهوه وحطها : لا سألتها والبنت موافقه
عبدالقادر : خلاص معناها على بركة الله
مصطفى ابتسم ..
عبدالقادر : امتى انديرو الدفع والفاتحه
مختار بحت في مصطفى : انت مستعجل ؟
مصطفى : والله ياعمي شن انقولك ..
عبدالقادر قاطعه : بشقته وشغله الحمدلله خلاص نبو نفرحو بيه
مختار ابتسم : ان شاء الله ربي يفرحنا بيهم
_______________
‎6:00 م
اميره تضحك : عاطك الخير ياهناء قلتيله هكي
هناء : والله عادي قلتها قتله اسمع راني عشت في حوش هلي بنقله في حوشي نبي نرقد للظهر
غاليه تشرب في كابتشينو : شن قالك
هناء : قالي ارقدي انا شغلي لعند العصر المهم انروح نلقى غداء
غالية ضحكت : المهم عنده بطنه
اميره : الراجل الي كل همه بطنه هذا ساهل ديريله اكل وتريحي ؛ الكاينه لما يقعد همه في حاجات اخرى يطيح سعدك وراه
غاليه بحتت فيها : كيف يعني
اميره ضحكت : عيب حاجات متزوجين
هناء عيطت : وووووه يااميره شكله احمد هك نوعيته 😂
اميره ضحكت : اس ياسخيفه
غاليه تضحك وحطت وجها في المخده : مسمطكن
الجرس يرن
هناء صبت : هاابا اكيده المنجي معش تحمل يقعد بعيد
غاليه فنصت فيها بمعنى اسكتي
اميره بحتت فيهن وساكته
هناء طلعت تفتح : هياا جايا
اميره اتكت ع الكنبه : بطني ليه بكل
غاليه : باهي تريحي ارقدي ماتقعدش مقعمزه
اميره : وحتى دوخه وزعمت الكبد تاريته الوحم واااعر
غاليه ضحكت : ماجاكش الوحم على شي معين
اميره : شكلي جايني على احمد
هناء خشت : اميره وحده تبيك تسوق في توسان بيضه
اميره قمعزت : من ؟
هناء : مش عارفه بلكي بنت خالتك الي تسوق
اميره مستغربه : لا مجده سيارتها كيا
هناء : باهي انقوللها اتخش قاعده برا
اميره : فكيني ياانتي مانعرفش حد يسوق الا مجده
غاليه : وعيب تخلنها برا
هناء : شكلها بنت ناس ماضنش وحده في نيتها حاجه
اميره : باهي انا مش لابسه قاعده بالتوته
غاليه : اركبي بسرعه البسي وانزلي
اميره صبت : به
هناء : توا انقوللها تخش ونقعدو معاها لعند تنزلي
وطلعت هناء بحتت فيها ابتسمتلها : تفضلي خشي
هبة نزلت مالسياره وسكرتها : يزيد فضلك
هناء فتحتلها الباب وتمشي قدامها : تفضلي في المربوعه شويا وتنزل اميره
هبه خشت : سامحوني ازعجتكم
هناء : ولا يهمك .. انتي صاحبتها
هبه ابتسمت : لالا زميلة احمد في العمل جايا انباركلها
هناء ابتسمتلها : اها اهلا وسهلا انستي
هبه اتبحت في الباب : الله يآنسك
هناء صبت : دقيقه انشوفلك اميره
هبه : خودي راحتك
_______
غاليه في المطبخ
خشت عليها هناء
غاليه : شن صار
هناء : مش متريحتلها قالت تشتغل مع احمد وجايا تبارك
غاليه : نعنجد تشتغل مع احمد وجايا عليك وقاحه
هناء : المشكله عارفه اميره مجنونة غيره يعني ماعندهاش جو صديقة راجلي وهكي
اميرة خشت عليهن : شن في ؟
هناء تلخبطت : شنو ؟
اميره : وينها المراه ؟
غاليه شاريتلها ع الباب : في الصالون
اميره : ماقالتش شي قدامكن انها تعرفني وهكي
هناء بحتت في غاليه : لالا ماقالتش شوفيها انتي
اميره استغربت : توا انشوفها
________________
سعاد خشت للمربوعه اتلم في الطواسي : خلاص يعني عطيتها
مختار ابتسم : عطيتها الحمدلله
سعاد رفعت السفره : توا انقولها لأمينه بعدين نمشيلها
مختار : اخرى قالي مستعجل ويبي دفع و فاتحه بسرعه
سعاد : امتى نحكي لغاليه
مختار سرح شويا
سعاد : مختار
مختار : خليها توا اصبري يومين اخرى
سعاد : باه توا نصبر
__________
اميره اتبحت فيها ومصدومه
هبه ابتسمت : كنت حابه انحلها معاه ودي بس هو ماجاش للطريق وانقوله يااما انا يااما انتي هو اختارك وانا مش هانخليه يختارك ويضحك علياا حتى انا بنت ناس ومش لعبه في يده
اميره ساكته وماحكتش ولا كلمه تسمع فيها وعيونها يدمعن
هبه تلبس في شنطتها : وصليله رسالتي قوليله مش هبه الي تلعب عليها يااحمد
وصبت : شكراً على استقبالك ليا
هناء جايا في الصاله شافتها طالعه ابتسمتلها : انستينا
هبه ابتسمت : الله يآنسك سلمي على احمد قوليله زارتنا هبه ؛ انتي اخته هناء صح ؟
هناء ضحكت : اها انا اخته
هبه تفتح في الباب الي برا : فرصه سعيده
___________
غاليه خشت للصالون انصدمت
قعدت اتبحت في اميره : هناااااء اميره تنزف
اميره مقعمزه ساكته ومصدومه وعيونها يدمعن وماتحركش
غاليه قربت منها تمسك فيها و اتعيط : هنااااء دوووونك ليااا
هناء خشت تجري : شن فييييي
وبحتت في اميره دبشها دم : طح سعدي كنهااا
غاليه اتعيط وبارمه وجها اتبحت في الساس : انا مانتحملش انشوف دم رني على حد بسرعه
هناء تجري ومسكت تليفونها داهشه حطت على اسم احمد : (( الرقم المطلوب مقفل ))
هناء : منجي اقرب واحد منجي ... وقعدت اترن ع المنجي
المنجي رد : ايوه
هناء اتعيط : منجي الحقنا بسرعه
ويسمع في صوت غاليه اتعيط احداها
: هنااااء بسرعه معش نقدر انتحمل
المنجي سكر في وجها و مشى يجري على كرعيه في الشارع زي الهبل
وصل ويخبط ع الباب بالقووووه
هناء طلعت تجري : اهو جااا
وفتحتله
المنجي دف الباب وخش يجري : وينننها غاليه شن صارلها
هناء تجري وراه : تي مش هي اصبر
المنجي خش للصالون لقى غاليه ماسكه اميره واميره على نفس الوضعيه انصدم وصبا جمد في مكانه
غاليه بحتت فيه وتبكي : تنزف راهي تموت في يدي
المنجي سكر عيونه وتنهد : لبسنها حاجه بسرعه والبسن اطلعن معاها
غاليه اتعيط : انا انخاف مالدم مانقدرش نخليها عليا اكثر راهي تمووووت ...
وتخبط في وجها : اميره امييييييره ردي عليااا
______________________
‎7:30 م
امينه قدام جايبها احمد : هذي مراتك والله ماتلقى خير منها
احمد يسمع فيها وساكت
امينه اتبحت فيه : انا توا ندويلها وانت سلم وليدي خود بخاطرها .....
تليفونها رن
امينه طلعاته مالشنطه : هذي هنيوه
وردت : ايوه ياهنيوه انا برا
هناء : امي ماتنفجعيش انا في المستشفى
امينه شهقت : شن فيييييي
احمد بحت فيها : شنو
هناء : اميره نزفت ونزلت العيل وجبناها للألماني انا وغاليه ومنجي
امينه اتعيط : عليك خبااااره ياناااعلي ياعطاب النهارات
واتبحت في احمد : شيلنييييي تواااا ياناعلييييي
احمد : شن في ؟؟
_____
المنجي مقمعز ع الكراسي وحاط ايديه على راسه
غاليه قربت منه وصبت احداه : فجعاتك هناء ؟
المنجي بحت فيها : نحسابك انتي صارتلك حاجه طلعت زي الهبل
هناء جت ماسكه في يدها شريط بنادول : من يبي
المنجي : قمعزي بلا برم
غاليه بحتت في ايديها : ايديا مزال يرعشن لعند توا
المنجي بحت فيها : قعمزي باهي
ومدلها شيشة اميه : اشربي منها هاكي
غاليه قمعزت وتشرب في اميه
هناء : مافهمتش طلعت منها المراه لقيتيها هكي ؟
غاليه هزت راسها : لقيتها مصدومه هكي و تنزف
هناء : انظر من هي وطلعت تعرفني قالتلي انتي هناء اخت احمد
المنجي : من الي جتكم ؟
غاليه : وحده قالت تشتغل مع احمد خوك
هناء : وقالت جايا انبارك وتبي اميره
المنجي رقاله : وانتن كيف تفتحلها الباب ؟؟
هناء : تي تعرف الحوش كله ومنظرها بنت ناس
المنجي تنهد : ااااه يستر الله كان مايطلع احمد ملبز
هناء : كيف ملبز ؟؟
المنجي تليفونه يرن وفتح الخط : ايوه
احمد : وينكم انتو ؟
______________
‎9:30 م
سعاد مقعمزه في الصاله عند امينه : لا حول ولا قوة الا بالله
امينه تبكي : قبل فرحنا وقلنا حامل البنت و يجينا حفيد انكسرت فرحتنا من عياط الناس ورانا
سعاد حطت يدها على كتفها : اي والله الناس مايخلو حد في حاله ارقي حوشك ياامينه وشربي العيال
امينه : كان نعرف بس من هي الي جت
هناء : قتلك ياماما مانعرفوهاش
امينه جت تبي اتصبي : توا نمشيلها اميره نسألها
هناء : باتي خش عندها وقالي ماحد يخش علينا
سعاد : خليه بالك توا يقرا عليها قرآن وتهدا من خشتها تبكي يامينتي
_____
اميره مقعمزه في السرير في دار هناء وتبكي : ياعمي مازلت عروس جديده ماطقيتش نص سنه و يكلم في صبايا عليا
رجب مقمعز احداها : والله مانخلي حقك يريح واتشوفي كيف انعطب نهاره
اميره تبكي : انا مانستاهل منه هذا كله ويخليها تجيني تمسح بيا الارض في حوشي
رجب متعصب : والله اتشوفي واتفرجي شن اندير فيه ؛ لكن الله يربحك ماتحكي لهلك نا عارف بوك وشرطها عليا قالي البنت عندك وتصير مشكله حلها انت تجيني حرجانه ماترد لحوشها
اميره تبكي
رجب : ونحنا مانبوه خراب بيتك
اميره تبكي : مش قادره نقعد هنا ياعمي نبي نمشي لهلي
رجب : امشي لهلك و وسعي خاطرك كم يوم لكن سلم بنيتي ماتجيبي سيرة الموضوع قدامهم
____________
سعاد مصبيه عند الباب : قبل اليوم نبي نحكيلك على حاجه ضروري توا انجيك الصبح وانقولك
امينه : شن في خير
سعاد : لا خير ان شاء الله توا نحكيلك في الصبح لما انجيك
غاليه محرمتها مرخيه و تاعبه بكل : هيا ماما
سعاد : اسبقيني توا نلحقك
غاليه طلعت لقت المنجي مقمعز قدام الباب
غاليه : شن ادير برا بروحك
المنجي نفخ الدخان : اندخن هنا عشان باتي جوا
وبحت فيها : وجك اصفر يابيبي كنك
غاليه : تاعبه بكل حاسه روحي
المنجي : امشي باهي انوصلك للحوش
غاليه يادوب قادره تمشي : قريب انطيح على وجي
المنجي يمشي احداها وساكت : احمد ملبز طلع يخون فيها وخاش في وجيج صبايا
غاليه انصدمت : كيييييف
المنجي : الي جتكم هذي شكله يكلم فيها ولا مش عارف المهم في جو شين
غاليه اضايقت : هضا الي كان ماخداها راهو مات توا يخون فيها كلهم هكي اصلا
المنجي بحت فيها : كيف كلهم كنك انتي توا تبي تقلبي عليا !!؟
غاليه تمسك في راسها : خلاص انا اسفه بس اعصابي تعبانه
المنجي سكت وقعد يمشي معاها
غاليه صبت قدام الباب
المنجي : خشي ديري حمام دافي و رني عليا انرقدك
غاليه حاطه راسها ع الباب ورنت الجرس
مروه فتحت الباب بالقوه غاليه طاحت عليها
المنجي انفجع : بسم الله
غاليه مقعمزه ع العتبه و تنفض في ايديها : اااه راااسي 😢
مروه منشرطه ضحك 😂😂😂
المنجي يصبي فيها من يدها : كولي و ارقدي بلاش منه الحمام
غاليه اتبحت في مروه : حماره هذ 😡
مروه تضحك : نوحا انك راقده عالباب انا 😂
المنجي بحت في مروه : والنبي وكليها ياصفاء
مروه : انا مروه 🙄
المنجي : وين نندري مانعرفش انفرق بينكن
وبحت في غاليه : كولي كويس
غاليه هزت راسها بمعنى به
المنجي يسكر في الباب : هيا اوكي
______________
‎1:30 ص
غالية كانت راقده وناضت
لقت خواتها احداها في الدار وقاعدات يوشوشن
مسكت تليفونها و تبي تفتح النت مالقتش اشارة
بحتت في الروشن : وين الماي فاي ؟
مروه متضايقه : روح انس وخداه معاه في الدار
غاليه اتأفأف ومتضايقه : كملت
ورنت ع المنجي ...
المنجي فتح الخط : نضتي ياشينه
غاليه اتوشوش : نضت اها
المنجي : كنك اتوشوشي ؟
غاليه : ماهو انس روح للحوش اليوم
المنجي : اممم باهي تمام
غاليه اتأفأف : كيف تمام انا خايفه يخش عليا ويشوف التليفون ؟
المنجي تقلب : باهي خلي عمتي سعاد اتقول انه من باتي وامي جابوه لكي
غاليه سكتت
المنجي : شنو مش مقنع الكلام ؟
غاليه : ماما مزال ماتعرفش
المنجي : ليش ماتقوليلها باهي
غاليه متضايقه : مانقدرش انقوللها من المنجي هاتقولي بصفته من جايبلك ايفون
المنجي سكت وقعد يفكر
غاليه : خلاص ماتفكرش فوت الموضوع
المنجي : اسمعي ! ...........
_____________________

غاليه : خلاص ماتفكرش فوت الموضوع
المنجي : اسمعي ! بكرا توا انجي وندوي معاها وانقوللها اني جبته لكي ونبي نخطبك وهانطلع من عندكم نحكي لأمي
غاليه تسمع فيه وفرحانه ومعش ردت
المنجي : كنك ساكته
غالية : انا مانبش انزرك بلكي انت ماتبش توا
المنجي اضايق : شنو الكلام الفاضي الي تحكي فيه هضا !!
غاليه : و حتى خايفة من ردة فعل هلك ؛ امي امينة بذات حسيتها مش راضيه وتحسابني قالبتلك راسك عليهم وكان تعرف انها انا توا تكرهني
المنجي : خلاص توا انهي الموضوع انا قلت بكرا يعني بكرا و مش هايصير الا كل خير
غاليه : مش عارفه خايفه
______
ستوووووب
رايكم في البارت
مع السلامه♡♡♡☆☆☆