غاليتي

البارت 24

‎6:30 م
غاليه مقعمزه في دار المقعد اتفرج ع التلفزيون
واتفكر في المنجي زعمك وينه شن قاعد يدير
باهي معقوله هنت عليه و قاعد بلايا عادي هكي
تعبت مالتفكير سكرت عيونها واتكت ع الكنبه
ياربي طمني وريح بالي
تسمع في الباب يدق
صبت تفتح : من
امينه : افتحي
غاليه فتحت الباب وابتسمت : اهلين
امينه خشت : وينكم ساعه ماتفتحي
غاليه : كنت جوا وماما والبنات يغسلن في الفرش فوق
امينه تسلح في كندرتها : وكنها امك تغسل في الفرش
غاليه : ماهو فك الرباط قريب مزال اسبوع بس اكيد توا الدنيا تكب علينا
وسكرت الباب
الباب دق اخرى
غاليه : من الي يدق
وفتحت الباب
هناء عيطت في وجها : مفاااااجأة
غاليه عيطت وحطت ايديها على فمها : هنييييوه
هناء تضحك واضبطتها : ياكلبببببه وحشتييييني
غاليه اضبطتها بالقوه : وحق ربي مش مصدقه اني شفتك واخيييييييراً
سعاد نزلت من السطاح شافتهن : زارتنا البركه ماشاءاالله على بنيتي
هناء اضبطتها
سعاد : ماشاءالله نايره ياهنيوه
هناء تضحك : سلمك
وخشن لدار المقعد
سعاد ضحكت : كان قلتي انك جايا را نظفنا الحوش وفرشناه ورد
امينه قعمزت : قاعد تقوليش الحوش يبرق
غاليه : امس نظفت اليوم والله ماعندي جهد
امينه : الحوسه تكمل والعمر مايكمل بعدين لا عندكم عيال صغار لا شي عشان يلبزو حتى حوشتكن قابه
سعاد قعمزت وتنهدت : انهد حيلي في الفرش اليوم
امينه : ليش جايبه الشقاء لروحك اهي تشاركيه قريبه نهاية الشارع يغسلو
سعاد : انا قاعده محبوسه قلت انمشي الوقت شويا نلهى
امينه : حتى البنيات انحرمن مالطلعه
غاليه : لا طلعه لا خشه
هناء : وين التوأم المختلف ؟
سعاد : سيبتهن فوق يسيقن في السطاح توا ينزلن
_________
صفاء مصبيه ع السور : بحتي الطرف الي يقطع في الطريق
مروه تضحك : انكبو عليه اميه ؟
صفاء : لااا فكينا را يطلع يعرف انس
مروه : باهي انطيحوه ??
صفاء فنصت فيها : مش عندك واحد واتكلمي فيه
مروه : ماهو نحنا توأم وانتي غبيه انطيحه انا بعدها خوديه انتي ياحماره
صفاء فرحت : اهاا صححح هو مش هايعرف ????
غاليه مصبيه ع الدروج واتضبح : يابنااات انزلن شوفن هنيوه
مروه بحتت في صفاء : هنيوه عندنا ????
صفاء نزلت تجري : واخيرا بنشوفوها
غاليه تضحك وخشت للمطبخ ادير في قهوه
لحقتها هناء ..
مروه خشت وراهن : جينااا
غاليه : مبردكن نبو نحكو بروحنا شويا
صفاء : نحنا مش صغار نبو نعرفو شن صار يومها ??
هناء ضحكت بصوت عالي : ياكلااب ????
غاليه فنصت فيها : خزي مافش حشم بكل عليك جيل حقير
مروه : هاهاهاها على اساس انك كبيره بكل يعني
غاليه اضايقت : اطلعن ولا انضبح لماما
صفاء : احكي ياهناء توا نطلعو بعدها
هناء : به توا نحكيلكن
غاليه فنصت فيها : هناء ?? مش ناقصات ضياع را
هناء تضحك : خليهن يثقفن جايتهن جايتهن
صفاء ومروه قعمزت قدامها ويسمعن فيها ??
هناء : اول ماخشينا للحوش طبعاً صلينا بعدها غيرت دبشي
صفاء : لبستي روب ??
هناء ضحكت ؛ اها ؛ بعدها انا جعت قتله نبي ناكل و لقينا عشاء ع الطاوله تعشينا .....
_______
سعاد بحتت في امينه : مافش اخبار من المنجي
امينه اضايقت : يااريت يااسوعيده لا رن لا دز لا شي
ولا لقيناله رقم انحصلوه عليه معلومات
سعاد تنهدت : لا حول ولا قوة الا بالله غير شن درتيله بس انتي
امينه عيونها دمعن : شي نقاش تافه بيني وبينه مش مستاهل يسافر ويسيب الحوش
غاليه جت بسفرة القهوه لقت امينه تبكي
هناء حطت البكلاوه ع الطاوله : كنك ياماما
سعاد بحتت فيها : قلبها شاغلها على منجي
غاليه شافتها تبكي عيونها دمعن
امينه بحتت في غاليه : مايحكش معاكي ياغاليه النبي شن حاله ؟
غاليه انصدمت وارتبكت : لالا
هناء بحتت في غاليه : ماتندريش عليه بكل ؟
غاليه : والله لا من قبل مشيته بيوم مانعرف عليه شي
امينه : هو يوم الي تعارت نا وياه
سعاد : لا حول ولا قوة الا بالله
هناء : هو رن على وسام من يومين وحكا معاه بس وصاه مايعطي الرقم لحد وانا خديته من وسام وحكيت معاه امس ويحلف فيا مانعطيه
غاليه بحتت فيها وشوشتها : حتى انا قالك ماتعطش ليا ؟
هناء سكتت وماردتش عليها
امينه تبكي : هنيوه انا امك الله يربحك عطيه لياا
هناء : حاضر ياماما توا نعطيه لكي غير ماتبكش الله يربحك بس نزحتي دموع
غاليه عيونها دمعن وصبت خشت للحمام
سكرت على روحها الباب قعمزت ع الارض قعدت تبكي
(( لستُ أشتكي منَ فُقدآن أيامي الجَم?لة ، !
إنمآ منَ غربة قلوب ؛ بدَأت تبتعِد عني وكَأننَي لمَ أكُن ?ومآ معهآ قَريب ~ ))
____________
‎10:00 م
رجب ايتفرج ف الصاله
احمد خش وفتح الباب : السلام عليكم
اميره ابتسمت : خير ياعمي
رجب : وعليكم السلام
امينه طلعت تجري : جبتلي الرصيد
احمد مدلها كرت : هاكي 10 كويس ؟
امينه خدت منه الكرت : اميره عبيه ليا سلم بنتي والله مانعرف كان يعبي فيه ليا منجي ومرات هناء
اميره خداته منها واتعبي فيه
احمد بحت فيها : كنك فرحانه شن تبي فيه الرصيد توا
امينه ابتسمت : حصلت رقم منجي من هناء
احمد بحت في رجب : من وين حصلتيه ؟
امينه : من هناء
كلهم سكتو
اميره : هاكي ياعميمه عبيته لكي
امينه قعمزت احدا رجب واترن الخط يضرب
امينه : اس اس يرن اهو .... المنجي ماردش
امينه عيونها دمعن : مايردش اكيد عرف رقمي
رجب مدلها تليفونه : هاكي رني مني توا يرد
امينه : باهي ننقل الرقم
رجب : عندي الرقم
امينه انصدمت : كيف عندك يعني اتكلم فيه وانا مانعرفش
رجب : الراجل مايبش يكلمك وانتي عارفه روحك شن دايره خلاص مش قلتي كان ياخدها نطلق هو مايبش يخرب بيتك
امينه تبكي وبحتت في احمد : وانت يكلم فيك
احمد بحت في اميره وسكت
امينه : شكرا صحيتو كلكم الي هذا طلع يكلم فيه وساكت وداسين عليا وماحد فيكم يبي يطمني
رجب ماسك التليفون ويتصل
منجي فتح الخط : ايوه ياباتي
رجب : خير ياباتي شن حالك ؟
منجي : تمام شن جوكم شن دايرين
رجب : رنت عليك امك كنك ماترد عليها
المنجي اضايق : توا ياباتي وصيتك وحلفتك
رجب : خلاااااص انهي ورد عليها توا اترن عليك غير انا رصيدي يبي يفصل
المنجي : اوكي ياباتي ...
رجب سكر وبحت في امينه : رني عليه توا يرد
امينه تبكي : الله يسامحكم حرقتو قلبي اسبوعين وانتو تحكو معاه
ومسكت التليفون اترن
منجي فتح الخط : ايوه
امينه تبكي : حبيب امك يامنجي ليش هكي يمي ادير فيا
منجي متضايق : كيف حالك انتي صحتك تمام
امينه تبكي : والله ماني كويسه بلاك تنشد عليك غاليه قلتلها يروح المنجي نجو نطلبوك كنك ماتكلم البنيه
المنجي انصدم : كييييف ؟؟؟ شن غير رايك وكيف تصرفي من راسك تقوليلها نطلبوك
امينه تبكي : تعال بس وكل شي تبيه حاضر ورحمة امي ماتاخد الا غاليه غير تعال سلم وليدي ماتوجعلي قلبي
المنجي : باهي ساهل غير معش تبكي
امينه : لا قولي انك جاي طمن قلبي الله يربحك
رجب كر منها السماعه : ها ياباتي
منجي : ايوه ياباتي
رجب يضحك : اهي الخطه ابتاعي جابت نتيجه وامك رضت انت وعدتني انك مادير شي بلا رضاها واهي توا راضيه روح هيا خلينا نفرحو بيك
المنجي ضحك : الله لا يغيبك ياباتي ربي يدومك تاج على روسنا
احمد بحت في امينه : كلها خطه من باتي را هو الي قاله عدي وقدامك دار روحه مايندري على شي
امينه انصدمت : باهي يارجب وانا مانندري وانت الي مخطط
رجب سكر الخط وضحك : انا قتله انصبي معاك لكن المهم رضا امك و انتي كان قعد قدامك مش هاترضي عارفك
احمد ضحك : صدق الي قال ابعد اتغلا شكلي حتى انا نبي انسافر
امينه تسمح في دموعها : والله مانخلي واحد منكم يمشي ويخليني غير يروح خوك ديرو الي تبوه المهم ماتغيبو عليا انتو الاربعه روحي فيكم
احمد : من الاربعه
امينه : انت وخوك وهناء واميره والله مانقدر انباعدكم علياا
اميره باست على راسها : ربي يخليك لنا ياعميمه توا شويا ونقعدو خمسه تجي معانا غاليه ??
_____________
‎12:00 ص
غاليه في فراشها وتبكي بلا صوت
وتسمع في اغاني
حاطه اغنية سيف عامر #موجوع_قلبي
(( موجوع قلبي ؛ والتعب بيا ..
من اباوع على روحي ينكسر قلبي عليا ..
تعبان وجهي ؛ وعيوني قهرتني ..
دنيا شلت حال حالي ؛ وبحياتي كرهتني ??
كرهت الحب ؛ ما أريده دورني
طيب اني وادري طيبي لـ هالحال وصلني ??
....
ما أريد كلشي ؛ بس انام وراس بارد ..
انا من هسّه بحياتي ؛ ماعندي ولا واحد ??
ما أريد اتعب ؛ تعبي يطلع مو نصيبي ??
عاجبني اسمي ؛ لا أحد يقولي حبيبي ?? ))
فجأه انقطعت الاغنيه تليفونها رن
غاليه مسحت دموعها بسرعه وبحتت
لقاته رقم دولي
فتحت الخط وردت وقعدت ساكته وحابسه بكيتها
المنجي : ايوه
غاليه قعدت تبكي وماردتش عليه
المنجي اضايق : يعني انغيب انغيب وانرن نلقاك تبكي ؟
غاليه تبكي : ليش ادير فيا هكي
منجي : عشان اتأدبي وتعرفي انك بالجو الي اديري فيه انا معش هاتلقيني
غاليه تبكي : اتسيبني عشان انا انحبك وانغار عليك
منجي : انتي عارفتيني كويس انا شنو وعارفه اني مانشوف في غيرك والجو الي اديري فيه مش غيره هذا شك وانا الجو هضا يخنق فيا
غاليه تبكي : اتسيبني اسبوعين كاملات مانندريش عليك عشان غرت عليك ؟؟
منجي تنهد : توا اسكتي واهديلي مروحلك بعد بكرا توا انتفاهموا
غاليه تبكي : لالا روح بكرا
منجي : ماحصلتش حجز توا كنت انشوف في المنضومه ع النت مافش الا بعد بكرا
غاليه : باهي دزلي ع النت نحكي معاك فايبر
منجي : تم سكري توا اندزلك ..
__________________
#بعد_شهر ??
امينه وعيشه وامباركه مرات سلفها عند سعاد
وسعاد عندها اختها نعيمه
امينه : عارفتك حزينه ياسعاد وانت مش وقت هالخبر لكن خلاص ياحنه ماراجيناك الا واجد و ولدي مستعجل
سعاد ضحكت : عاطك الخير ياامينه
امينه تضحك : خير من زيادة الكلام انتي مانك برانيه عليا بلكي اقربلي حتى من عيشه اختي الي جايبتها معايا هذ نبو غاليه للمنجي و انتي عارفه ياسعاد وموافقه وبلا كلام زايد ومبروك علينا وعليكم
سعاد تضحك : خلي ناخدو راي البنت به
امباركه غمزتها : ياحنه تبيه يبيها خلاص مبروك عليهم
عيشه : كان اتشوفي كيف يبرم ف الحوش مالصبح تقول يرجا في حالة ولاده اليوم
سعاد : نجيلي وليدي ياربي
امينه : اسمعي ياسعاد قدام الي قاعدين رجب حلف بطلاق خاطي دبشها ماتجيب حاجه معاها
ويوم الي يسكر مختار الله يرحمه السنه انديرو الفرح دغري
سعاد : الله يرحمه ويسامحه ان شاء الله وانتي طيبه
نعيمه مسكت مترد الشكلاطه : هياا خودو الحلو على سلامتهم وان شاء الله بهناهم ومبروك عليها
امينه تاخد في شكلاطه : توا رجب يمشي لعمها جمال يطلبها منه رسمي عشان مايقولو سعاد عطتها من ورانا
نعيمه : هي صح عشان حتى هم محسوبين هلها
سعاد : المهم عبدالقادر ماتقربوه ولا نبو خلطته
امينه : لا قال توا يمشي هو وخوته لجمال وياخد انس معاهم
غاليه في المطبخ هي وخواتها وهناء
هناء : امك تضحك وخلاص ياخياا محلاها
غاليه ضحكت : تهيالي تحب المنجي اكثر مني
تليفونها رن
فتحت الخط : ايوه
المنجي : شن صار عطوك ليا ولا مزال
غاليه تضحك : انت ماما ماعندكش فيها مشكله شوف بكرا شن يصير مع عمامي بس
المنجي يضحك : لا خير ان شاء الله ماتشيلي هم شي عمك جمال تعرفت عليه في العزاء نزيك وعياله جوهم نزيك ويفهمو في الجو
غاليه : يارب يابيبي
منجي : غير تريحيلي و روقي نبيك فرحانه بس الباقي كله محلول
غاليه بصوت واطي : انحبك
منجي ضحك : انطلقنا وقعدنا انقولو فيها بروحنا هذينا بوادر كويسه ماشاءالله
غاليه تضحك : بطل انتحشم
منجي يضحك : باهي ياقلبي انا مخطم على استيقاف توا نحكي معاك بعدين
غاليه : اسمع اسمع
منجي : نعم
غاليه : ........
__________

توقعاتكم؟؟

رايكم؟؟

مع السلامه ❤❤❤