غاليتي

البارت 20

ومشن #يومين ابتاع العزاء
وجت ثالث ليله وجو زحمة ناس وكملنها بكاء وعياط
11:30 م
ايمن مصبي مع ابتاعين التشاركيه يلمو في الخيم
: مد يالمنجي الرواق الي تالاك
المنجي يشيل في الرواق : خليه يلم خيمة الصبايا ويخلي رواق ع الباب ليوم الاسبوع
ايمن : قتله رواق وكراسي بالزايد للحوش
المنجي : نمشي انشوف خيمة الصبايا انقوللهم يفضوها كان فيها حد
منجي مصبي قدام الخيمه يسمع في صوت وحده تبكي
قعد يضبح : ياهناء ياهنااااء
صفاء تباوعاته ماسكه مكنسه : هناء جوا
المنجي ابتسم : شن جونا توا تمام
صفاء : الحمدلله على كل حال
المنجي : قوليلهم يفضو الخيمه نبو انلموها
صفاء : مافيها حد الخيمه الا غاليه
المنجي تباوعها : باهي خلاص خشي توا انشوفها
صفاء خشت
ومنجي خش للخيمه بحت فيها
لقاها مقعمزه ع الكرسي في التركينه وتبكي بصوت عالي
قرب منها ومسك ايديها صباها
غاليه عزقت روحها عليه : بابا يامنجي باااباااا
منجي حضنها بالقوه : انتي اقوى من هكي حبيبي ماتقعديش ضعيفه
غاليه حاطه وجها في صدره وتبكي : كيف اندير بلا بابا كيف انعيش بعده
المنجي يحضن فيها بالقوه : ادعيله بالرحمه هذي الي تنفعه في قبره
غاليه تبكي : ياربي خذيته مني ياربي حرمتني منه ياريتني مشيت قبل مانحضر هاليوم
المنجي قعمزها ع الكرسي
وطبس قعمز على ركبيه قدامها : حرام الي اتقولي فيه والله العظيم ايتعذب
غاليه تبكي : كيف جاكم قلب اتغطوه بالتراب كيف قدرتو اديرو هكي لبابا
المنجي تنهد وطلع منديل يمسحلها في وجها : هضا حال الدنيا ياحبيبي انا عهدي بيك ايمانك قوي بربي هضا ابتلاء من ربي ولازم نصبرو عليه
غاليه تبكي : نااااار يامنجي في صدري مابت تبرد
المنجي : ربي يختبر في الناس بالنقص في المال والانفس والثمرات وهضا ابتلاء لازم نقعدو قده بابا كان راجل مؤمن وانتي عارفه كيف يأمن بالقضاء
امينه طلعت للخيمه بحتت فيهم
جت تمشي جابت كرسي وحطاته احدا غاليه
المنجي يحكيلها : بحتي فيااا هنااا بحتيلي
غاليه تبكي واتبحت فيه
المنجي : قولي الله يرحمه هياا
غاليه ماقبل حوتها قالتها وهي تبكي : الله يرحمك ياحبيبي الله يرحمك يابابا
المنجي : اييييوه هكي نبيك
امينه قعمزت ع الكرسي : كبدها ذابت هالبنت ثلاث ايام هضا حالها لا وكال لا شراب
المنجي بحت في غاليه : مش وعدتيني تاكلي ؟؟ كيف صار كله كلام طلع
غاليه تبكي : كيف ناكل وكيف تجيني نيه
امينه حطت يدها على شعرها : يمي لازم تغصبي روحك عشان تسندي امك وخواتك ديما انقول غاليه بمية راجل وقويه شن صارلك توا
غاليه تبكي : انا كنت قويه بيه كان دايرلي مكانه حتى قدام خوتي و دايرلي قدر وعداااا وخلاني خلاص
امينه عيونها دمعن : ديما يقول عيالي في كوم وغاليه في كوم بروحها
المنجي صبا : من مزال في جوا ؟
امينه : ماحد الي هضا روح اليوم قاعدين نا وجارات واخت سعاد نعيمه ومرات خوها بس
غاليه تمسح في دموعها وصوتها مبحوح : تحسابيهم زعلانين عليه اصلا هما الي قتلوه وجاي للعزاء بكل صحة وجه عمي عبدالقادر وهو لما بابا عدا يساول في عادل لزه
المنجي : الواحد يدير بأصله ؛ اهم جو وخذو القدر كله وعمك الجنازه كملها بكاء يقوله سامحني ياخويا
غاليه تبكي : الله لا يسامحه !! و حسبي الله ونعم الوكيل مات وهو مش مسامحهم
هناء طلعت جايبه سندوتش في يدها مداته لغاليه : هاكي كولي انتي راك تموتي
غاليه هزت راسها بمعنى لالا
منجي خذا منها السندوتش وطبس يحكيلها : وراسي انا تاكليه هياا
امينه اتبحت فيهم وساكته
غاليه ادف في يده : والله ماعندي نيه
المنجي بحت فيها : قتلك وراسي انا
غاليه خداته من يده وكلاته
منجي بحت في هناء : جيبيلها كباية عصير
هناء : حوش عزاء اين عصير
منجي : توا نطلع انجيبلها مالدكان الي في الشوكه المهم تاكل
امينه ابتسمتلها : باهي الي كليتي طيب فيك وجك قاعد صايف بلا وكال
هناء حطت كرسي وقعمزت : كرعياااا خلااااص
غاليه بحتت فيها : انصبيلك في فرحك ياهنيوه ذبتي في الحوسه
هناء فنصت فيها : بطلي طروح وراس امك فكيني مالدراما
__________________
‎1:00 ص
امينه طالعه مالحمام تمشط في شعرها : عجبكم الرز اليوم يارجب
رجب : الخيمه كلها تسأل من الي داره
امينه ابتسمت : اليوم ثالث ليله نا الي سويت مكان نعيمه
رجب رقد و تغطى : لا مكرونة امس شينا
امينه : لا نعيمه مش شاطره في التسواي غير هي دايرتها شريني قدر امس واول امس قالت نا نبي انطيب
وسعاد متحشمه اتقوللها خلي امينه اطيب
رجب ضحك : وكيف قدرتي عليها
امينه خشت للسرير وتغطيت : جيت دويتلها قلتلها طيبتي مرتين خليني انطيب انا اليوم خير ماناخد الحشمه مع سوعيده و ماحوتك ماطلقتلي المناصب
دق باب الدار امينه قعمزت : خش
المنجي من ورى الباب : وين باتي
رجب : خش كنك
المنجي خش ماسك فلوس في يده : هذينا مدوهن ليا الجيران للعزاء مزالن زي ماهن مادرت بيهن شي
رجب : كم الي معاك
المنجي : 1500
رجب : بكرا عطيهن لأمك تعطيهن لعمتك سعاد بالك ادير بيهن حاجه
المنجي حطهن ع الشيفونيرا : خلاص قاعدات اهنا
وطلع وسكر الباب ...
فتح دار هناء لقاها فاضيه
بحت في المطبخ لقاها مش قاعده
رن عليه التليفون لقاها اميره
المنجي فتح الخط : ايوه
اميره : اهلا شن جوك
المنجي : تمام الحمدلله
اميره : تعشيت ؟؟
المنجي : كليت في العزاء عليش ؟
اميره : كان الساعه 7 عشاهم اركب تعشى مع احمد وهناء تلحق ولا ماتلحق
المنجي ضحك : صار خيانه اني جاي
احمد ياكل : شن صار
اميره فتحت الباب وخلاته وردت قعمزت : اهو جاي
هناء تصب في قازوزه : بطني نشفت مالرز والمكرونه سلم ايديك
احمد : تي انتو في العزاء بايتين وانا كل يوم في الليل دلع يوم قلايه يوم مكرونه جاريه يوم دارتلي حاجه صح بكل مقليه سلحوبيه
هناء تضحك : شنو هي به
احمد ضحك : كراديم هك والله ماني عارف
اميره تضحك : كفتة دجاج مقليه درتله فلوكه قعمز عليها بروحه تعشى بيها تقول ياكل في سبول
المنجي دق الباب
احمد : خش ياراجل عليش جو البرانيه ادق وجو شين
المنجي ضحك وخش بحت في الطاوله : تي وين قلايه وسلطات
اميره مدتله خبزه : هياا ابدا
المنجي قعمز ياكل وبحت في هناء : نحسابك بايته غادي
هناء : معش قدرت غادي مانرقدش ينوضن فينا مالفجر صبايا خوت ابله سعاد الباردات
احمد بحت في منجي ويحكي لهناء : ليش ماجبتي غاليه باتت معاك
المنجي ياكل ومش معدل
هناء تضحك : نعنجد نخليها تسيب حوش العزاء
اميره تضحك : حرام عليكم خلوه ياكل توا يغص
المنجي يشايرلها بيدها : خليه يبرد على خاطره
_______