اسيرة العشق

الفصل الثالث

انهت عملها وخرجت من المطبخ وهي حزينة شاردة تعصف بها الافكار كرياح شديده في يوم خريفي ممطر وفجاءة اصطدمت بإياد
ملك بخجل: انا اسفه انا فعلا اسفه ماخدتش بالي
اعطاها اياد احدي ابتساماته الساحرة وتحدث بهدوء
اياد :محصلش حاجه ياملك انا اللي مكنتش مركز علشان كده خبطتك انا اسف
ملك باسف :انا اللي اسفه مره تانيه
كنت محتاج اي حاجه
اياد مازحا :دي التالته علي فكره مش التانيه ثانيا اه صراحه هو فين التويلت هنا
ملك باسمة :تاني ممر علي ايدك الشمال تالت باب
اياد بهدوء :شكرا ياملك
ملك باسمة :العفو
سار عدة خطوات فاخذت ملك تطالعه كم يسير في ثقة وانفة
ولكنه فجاء توقف وعاد اليها مرة اخري
اياد بهدوء :ملك
تسارعت نبضات قلبها عندما سمعته يناديها باسمها وشعرت بالخجل الشديد والتوتر
ملك بخجل :نعم يا باشمهندس اياد في حاجه
اياد باسف :انا عاوز اعتذرلك جدا علي اللي حصل النهارده
ملك باسمة :محصلش اي حاجه انت مكنتش تعرف
اياد:انا فعلا ماخدتش بالي بس علشان شوفتك في المطبخ و.....
ملك بهدوء :و الله انا مزعلتش حصل خير
اياد باسماً: ريحتيني جدا
ملك:عن اذنك بقي علشان اشوفهم لو محتاجين حاجه
اياد: اتفضلي
مرت عليهم فوجدتهم منخرطين في الحديث
والمزاح والضحك فشعرت بان وجودها لن يحدث فرق
فذهبت الي رفيقتها في ذلك الوقت مكتبتها الصغيرة
التقطت كتاب وجلست تقرأه اندمجت بشده معه حتي انها لم تشعر بالوقت
وبعد وقت طويل
تناهي الي مسامعها اصوات مرتفعة غاضبه
فتركت كتابها وهبطت مسرعة للاسفل
عبد الحميد بغضب :احنا اه دلعناكي وبنسكتلك انما توصل لدرجه انك تقولي انك انتي اللي عامله كل حاجة دا كتير
انجي ببرود:انتو عاملين حوار ليه علي موضوع تافه كده
فريد بغضب :مترديش علي جدك يا انجي
تأففت بضجر
انجي :متعملوش فيلم علي موضوع صغير مره من نفسي قولت اننا اللي عامله حاجه
ملك بهدوء :خلاص يابابا خلاص ياجدو حصل خير وانجي مش هتكرر دا تاني
التفت انجي لملك بغضب
انجي بوقاحة : متعمليش فيها البريئه الله يكرمك انتي كمان
رفع فريد يده ليضربها
فوقفت ملك بينهما لتحول دون ضرب اختها كما تفعل منذ صغرهم
ملك بهدوء :صلي علي النبي يابابا خلاص
خلاص اللي حصل حصل
تطلعت لشقيقتها بامر
ملك:ريم كرم طلعوا انجي اوضتها
انصاعا وريم وكريم لكلمات شقيقتيهما فصعدا سويا
ملك بهدوء :خلاص يابابا حقك عليا ياجدو انا هفهمها بالراحه
فريد باسي : انا اللي بوظتها
ملك بهدوء :متقولش كده يابابا كل دا مش هيرجع اي حاجه
ثم تابعت باسمة بحتان بالغ
احنا اتفقنا علي ايه ادعيلها ياحبيبي
اومأ عبد الحميد براسه في اسي
عبد الحميد:فعلا مفيش في ايدنا غير الدعاء
ملك بهدوء :انا مش زعلانه والله خلاص احنا مكناش داخلين مسابقه يعني
وهي كان نفسها تسمع كلمتين حلوين فخلاص مش مشكله
عبد الحميد باسماً :ربنا يكملك بعقلك يابنتي يارب ويهديها
ملك باسمة :اللهم امين
يلا بقي روحوا علشان تناموا وانا هطلع لانجي
فريد بهدوء : ماشي يا بنتي
*************
في سيارة اياد
منار باسمة :انجي بجد عسوله
زي القمر ماشاء الله عليها وكمان اكلها حلو واجتماعيه جدا شكلها
كانت انجي تشغل كل تفكير اياد وقتها
اؤما براسه في اعجاب
اياد :فعلا ياامي انجي بجد جميله
منار بضيق :مش زي ملك
ميرا بغضب :مالها ملك بقي ان شاء الله انا مش فاهمه اصلا انتو مالكوا كده طالعين السما باللي اسمها انجي دي ليه دي واحده بشعه بجد رخمه جدا ومحبتهاش ملك برقابتها عسوله اوي ياماما وطيبه جدا
زمت منار شفتيها بحنق
منار :يابنتي دي مقعدتش معانا غير شويه صغيرين
وسابتنا وقامت قعدت معاكوا ودا عيب جدا ولا كانها بتستهزأ بينا
ميرا بحنق : يمكن علشان بتتكسف مثلا وعرفة انه مينفعش ان الرجالة والستات يقعدوا مع بعض كدا
منار بسخرية :وعرفتي كل دا عنها في قاعده واحده
ميرا:واكتر بس للاسف مكنتش اعرف انكوا سطحيين كده ثم اشاحت بوجهها للناحيه الاخري فقد شعرت بالضيق لهذا الحكم السطحي علي ملك لماذا يحكمان عليها هكذا وهم لا يعرفانها
أ لانها تختلف عنهما ؟
***************
في فيلا عبد الحميد
صعدت ملك الي غرفه شقيقتها وهي علي اتم استعداد لتلك الحرب التي ستندلع بعد قليل
فدلفت الي غرفة انجي فوجدتها جالسة علي الفراش وريم وكريم بجوارها
توجهت ملك ناحية الفراش والتفتت لشقيقيها
ملك بهدوء :ريم كريم لو سمحتوا سيبونا لوحدنا شويه
ريم :حاضر ياملوكه تصبحي علي خير
ملك باسمة :وانتو من اهل الجنة
خرجا الاثنان من الغرفة واغلقا الباب ورائهما
فالتفت ملك لانجي
ملك بهدوء :بصي يا انجي انا متكلمتش علشان الناس وكده ومعنديش مشكله ابدا في اي حاجه بس مينفعش ننسب مجهود غيرنا لينا
حابه كل الناس تشكر في اكلك ادخلي ياستي المطبخ واعملي كل اللي انتي عاوزاه وانا وعد مني مش هدخل غير في الطوارئ
انجي بدهشة :ومين اللي قالك اني عاوزه ادخل المطبخ اصلا
تابعت بازدراء
انا حياتي مش زيك يا ملك ولا عمري هبقي زيك
انا عندي حاجات اهم من شغل البيت والطبيخ وكل الهبل دا ....انا مش انتي ياملك انا انجي ملكه الكليه ملكه الحفلات....اجمل بنت في society بتاعي انا مش انتي ياملك
لم تعرف ملك لما تألمت لتلك الدرجة
ملك بالم :يارب تكوني احسن مني يا انجي
ثم نهضت عن الفراش بهدوء وتركت الغرفة وتوجهت لغرفتها
اخذت دموعها في الانهمار وكلمات انجي تعصف براسها
وقفت تطالع هيئتها في المراءة
تشبه والده 7 اطفال منهكة شاحبة لا تهتم بهيئها حقيقة لا تهتم باي شئ الا المنزل ووالدها وجدها واشقائها
تمتمت وهي تطلع لمظهرها بازدراء
ملك : هي مش انتي
هي مش دافنة نفسها بالحياة زيك كدة
دا منظر انسة لسة عندها 26سنة شكلك يقول انك عندك 40 سنة
ايه اللي انتي فيه دا هتفضلي كدا لحد امتي
اهتمي بنفسك شوية زي البنات اخرجي واشتري لبس روحي كوافير حتي يا شيخة
وبعد وقت من التفكير قررت ان تقطع اجازتها
وتعود مرة اخري لتدفن نفسها في عملها
وتنسحب كعادتها من ارض المعركة
ملك بسخرية : اه كالعادة هو دا اللي تقدري تعمليه ترجعي الشغل وتدفني نفسك بين المرضي والعيانين وتهربي
علشان انتي ضعيفة انتي جبانة وضعيفة
القت وسادتها علي الارض بجوار المراءة ثم دفنت راسها في احد الوسائد واخدت تصرخ باكية بصوت مرتفع حتي انقطعت انفاسها
وبعد وقت قصير نهضت من فراشها وعلمت انه لن يهدئها سوي الصلاة
فذهبت لتتوضأ وتصلي كي تبث همها للرحمن الرحيم فهو القادر الان علي مداواة جروح قلبها
وبعد وقت قليل خلدت الي النوم وكالعادة لم تتركها احلامها بذلك الفارس الذي لم يعد غامضا الان فلقد قابلته وتحدثت معه ....ولكن الفارس قد اختار اميرة اخري غيرها
فماذا كانت تظن انها مثل سندريلا سيظهر اميرها من العدم وياخذها الي مملكته.......لا انها علي ارض الواقع في الحياة العملية ليست في عالم الاحلام والحكايات......ليست بطلة لاحدي القصص او الروايات يجب ان تتخلي عن احلامها وتثبت قدماها علي ارض الواقع