حبيبي انا نبغيه جامي نسمح فيه

5

فاق بابا وتكلف لي بشاهدة طبية والمسائل ديال الخدمة وأنا بقيت فدار لمدة 15 اليوم وكل نهار كيهضر معاية يوسف فاليل ويسولني كيف بقيت وشنو درت تعلقت بيه بزاف وليت كنتسنى ليل فوقاش يوصل باش نسمع صوتو وخا معمري سولتو على حياتو هو عرف علية كلشي كان عندي اتجاه واحد الفضول قد الدنيا مي كنحس أنه ماشي من حقي نسولو حيت هو كيبغي سارة لي شفت معاه بغيت نقولو متعودش تهدر معاي حيت انت عندك علاقة مع بنت أخرى مي خفت يقولي أصلا كنهدر معاك حيت كنحسبك بحال ختي بقيت هكاك حتى وصل النهارلي غادي نحيد الجبس داني بابا بطوموبيل حيدت وليت لاباس كنت خايفة إلا تكون عندي شي حاجة كبيرة. فالعشية لتحقت بالخدمة فرحو بيا البنات دوزت وقت زوين سالينة الخدمة وخارجة معهوم الدموع كيهبطو لي بضحك هزيت عيني لقيت يوسف بقيت كنحمار وكنصفار غي بوحدي جالس فالبرك فوق موتورو ولابس جاكيط كوير فالمغون معا هو زعر شوية جا كي شي تويكس لبنات بقاو كيتناغزو وانا زدت جيهتو مقلت ليهم تا بسلامة ترفعت. يوسف: عاش من شافك أنا: شكرا كيف داير نتا لاباس يوسف: أنا لباس ومالكي نتي كتبكي أبوخنونة. أنا: أنا بوخنونة محشمتيش تقولي هد الهدرة جاي باش تعايرني (درت وبقيت غادة) يوسف: (تابعني وشد فيا) لاباس مبقيتش كتبكي وليت قوية هاكك نبغيك أنا: واش حمق شوية يوسف: إيه عاداتني وحد البنت والمهم على سلامتك لادبا راكي لاباس وخا بقيتي عرجة شوية ولاكن مقبولة . أنا: واش بصح كنعرج. يوسف: هههههه كنضحك معاك متبقايش تيقي بيا. أنا: أنا غدي نبقى نتيق بيك ولاكن انت متكدبش عليا (يوسف بقا ساكت وكيشوف) كيخليني نرتابك بدوك شوفات دابا غي الله يحفظ مع الله يستر مشيت ندير شي كارثة جمعت راسي وقلت ليه بسلامة غدي نتعطل وزدت تا كنحس بيه شادلي فصاك باش منمشيش وأنا كنجر وهو عايني أ عايني مال راسك قاصح حلفت لادرت وهو يقولي واغادي تطيري لي المرايا ضرت لقيت الصاك مشدود فالمرايا حششششامت قلت ليه سمحلي عافاك قالي هانية. عارفة داك الموتور بحال عينيه مكرهش كون ضربني على راسي فديك اللحظة…

 دازت شي يوماين وعيط لي فليل يوسف : البكايا لاباس أنا: لاباس وانت؟ يوسف: حتا أنا لاباس بغيت نقوليك واش تمشي لواحد الرحلة للشمال لحد جاي منظمينها المدرسة ديال سارة أنا: لا يوسف: لجواب واجد وعلاش لا أنا: غير مبغيتش وصافي. انت غادي يوسف: ايه ولامبغتيش نمشي بلاش ههه أنا: كتطنز عليا شكون أنا ليغادي نقوليك سير ولا جلس، راك موانس مع سارة أنا مشغولة دابا سمحلي وقطعت. تكونيكتيت مع فاطمة ز وعاودت ليها كلشي قالت لي بالعكس سيري بحرا تسدي هاد الموضوع وتكرهيه ملي تشوفيه قدامك معاها قلت لها صافي بشرط إلا غادي تمشي معايا قالت لي واخا مي يمشي معايا حبيبي كريم ههه أنا: دغيا رجع حبيبك دور دور وترجع المكدور هههه بقينا كنضحكو. وأنا بقيت كنفكر الصاحبة لي عوالة عليها تونسني هاهي غادة تمشي مع حبيبها وتخليني مي المهم غدي تكون قريبة لي شوية. صونيت على يوسف أول مرة. جاوبني وباينة فيه كان ناعس وفيقتو حشمت قالي واش عندك شي مشكل أنا: لا يوسف: ومالكي معيطة لي دابا أنا: سمحلي غي غلطت. يوسف: ياله قولي شنو بغيتي غي كنضحك معاك عيطيلي الوقت لي بغيتي غي بغيت نرد ليك ديال قبيلة ملي قطعتي علية وهدري متقوليش ليا كتبكي عاود ألبكايا. أنا: لا غي كنتصنت ليك يوسف: كنغني عبد الحليم حافظ أنا ياك. أنا: هههه وسمع راني غادي نمشي لرحلة وحتا صاحبتي ولد خالتها. يوسف: اممم واخا. أنا: سمحلي وتصبح على خير. يوسف: هانية أل….صافي تصبحي على خير.أنا: شنو أل…. غي كملها متخافش منبكيش يوسف: سيري تنعسي صافي. المهم مشات يام ودازت يام وصل نهار ديال الرحلة سيمانة وأنا كنفكر شنو لبس وخا عارفاه غدي يكون مع وحدة أخرى المهم بغيت نبان تأنا راني عندي حقي. لبست أحسن ماعندي ومشيت تلاقينا كاملين سارة جات وسلمت علية كتبان ظريفة وقالت لي يوسف لي قالكوم تجيو وهو صبح ناعس نطقت فاطمة ز ماشي مشكيل. مشات سارة، أنا: شتي ياختي باش عرفاتو صبح ناعس فاطمة ز: إوا حيت مجاش مالكي ضبعة  ما لها بايتة معاه أنا: منعرف ياختي البارح هدر معاي غي شوية وقطع.