مساء الخير والمحبه
#عشق_الطوائف
البارت الاول
-
# مـدري شكسرو بصـدري
مشو مثل شمس الغروب
لا فادت تعالو ولا نفع صبري
هوا الما يحب ربحان
مو مثلي الرسايل فرهدت عمري
اني ملاك حاليا عمري 20 سنه و5 اشهر بس قصتي بدت من جان عمري 12 سنه اني بيضه وشعري طويل عيوني عسليه .جسمي حلو مرتب مو كلش..اخر العنقود بالعائله. يعني المدللهه
اني من ديالى بس والدتي من بغداد عندي 3 اخوان (احمد وامير وحسين) بس احمد متزوج منهم وعندي اخت (حنين) متزوجه ابن خالي وعايشه ابغداد امي وابويه من طائفتين مختلفه امي شيعيه وابويه سني بس ابد هذا الشي مأثر عليهم وحبهم ينضرب بي المثل ......
المكان: بغداد بيت اختي حنين
الزمان:21/6/2009
جنت ناجحه للسادس ابتدائي اني ما اطلع هوايه مخلصه وقتي من البيت للمدرسه بس بالعطله الصيفيه اجي يم حنين اتونس واطلع وهم اساعدهه بأبنهه كلش وكح ...جوارين اختي عدهم بنيه بنفس عمري اسمهه زهراء صارت صديقتي نكعد سوا نلعب ونسولف فد يوم كاعدين بالباب فوكعت عيني ع ولد اسمراني وطويل صاحب نظره حاده باوعلي اني استحيت كبل درت وجهي بعد لحظات ورجعت باوعتله لكيته هماتين ديباوعلي ويبتسم اني خجلت وجهي صار احمر 😍😍
اجاني احساس لأول مره بحياتي يعني اني صغيره ممجربه هيج شعور ابد ..لأول مره احس عندي كلب 💕 وهذا الكلب بي نبضات
زهراء: هاي شبيج ملاك شو وجهج صار احمر ودتضحين ويه روحج؟؟
جاوبتهه واني ابتسم :مابيه شي
زهراء: بس عيونج تلمع احجيلي شبيج؟؟
خجلت بالزايد : خلص زهراء مابيه شي.. اشرتلهه عليه 👈🏻شوفي ذاك الولد عبالك اعرفه من سنين بس اني هاي اول مره اشوفه
زهراء: لج هذا علي صديق اخويه حيدر ...
علي: اني علي عمري حاليا 25 سنه لكن من بدت قصتنه جان عمري 16 سنه مجنت مراهق متهور وطايش بالعكس يعني تفكيري سابق عمري بهوايه فد يوم واكف دنتظر حيدر صديقي فشفت بالدربونه مالتهم بنيه صغيره فدوه لله نازكه ورقيقه ماعرف حسيت بأنجذاب الهه مكدرت اشيل عيوني عنهه نظرتهه الي جانت احلى من الخيال بحيث من باوعت بعيني حسيت كلبي رح يطلع من صدري
.
.
ملاك: نزلت عيني بس كلما اباوعله الكاه يبتسملي بهذا الأثناء طلع حيدر من بيتهم اتقرب من علي بس علي ولا منتبه لأي شي هو بس جان ديباوعلي ..حيدر: هاا حبي خوما تأخرت عليك؟؟ 😒😒 الوووو شبيك علاوي وين صافن اني من شفته هيج ديحجي وياه ضحكت ودرت وجهي وهم الاثنين طلعو من الدربونه وراحو واني عفت زهراء و طبيت للبيت .
حنين : هاي شكو يا ستار طبيتي تضحكين ...اني حظنتهه وبستهه كتلهه ليش اليضحك يكلوله يا ستار ؟؟ حنين : لا ملوكه حبي اضحكي يا ربي متفاركج الضحه . اني ماكو ابالي غير علي وكل شويه اتذكر نظراته وابسامته واضحك خلص اليوم وصار الليل واني للصبح كاعده بس افكر بي عزااا بعيني اني شبيه صار الفجر خل انام يعني بهيج عمر مراهقه جنت واكيد سامعه شي عن الحب والأعجاب ضليت افكر خفت كلت خاف حنين تعرف اكيد مرح ترضه ولا زوجهه بعدين اني وين رحت بتفكيري بعدين منو يكول هذا الولد معجب بيه يجوزخل انسى الصار وبلا مشاكل ثاني يوم ضليت بالبيت مطلعت دنتفرج ع المسلسل اني واختي فجأة اندك الباب راحت اختي دتفتحه.....حنين :هلو زهراء ادخلي حياتي ملاك كاعده جوه سلمت زهراء ع اختي ودخلت اني استقبلتهه ..زهراء:ليش مأجيتي اليوم عليه ع بعدنه احنه حايط ع حايط انتي بذاته اله اني اجيج اني ضحكت وجاوبتهه لا بس دتفرج مسلسل كلت من تخلص اجيج ...زهراء: خلص عوفيني اني اكو شخص يريد يشوفج هو مكلي بس اني حسيت ....كتلهه منو؟ مقبلت تحجي جرتني من ايدي وطلعنه برا ..باوعت لكيت علي واكف بنفس مكانه. من شافني ضحك....اني دخلت للبيت
زهراء: ترا علي معجب بيج يا حلوه
اني ضحكت كتلهه لا مستحيل يا اعجاب هو البارحه شافني ...زهراء: اي خل نشوف هي الايام تثيت....مرت الأيام وعلي كل يوم يجي للدربونه بس حتى يشوفني صار مثل خيالي وين ما اروح الكاه موجود اذا اروح للمحل او للفرن وين مجان اكثر المرات يحاول يحجي وياي بس اني اتجنبه اخاف احد يشوفنه ويحجي لعمار زوج اختي..هيج مجرد نظره منه تكفيني ماريد يحجي وياي .بقينه ع هل حال تقريبا شهرين فأنتبهت النفسي اني مو معجبه بعلي اني احبه تعودت اشوفه وين ما اروح يعني من ادخل للبيت احس بفراغ مرات اشوفه من شباك الغرفه الفوك خطيه شهرين هو واكف بنفس مكانه المهم تقريبا العطله بدت تنتهي ولازم ارجع لديالي لبيتنه فكاعده بالباب اني وزهراء دنسولف
زهراء: رح اشتاقلج حرامات رح ترحين
حياتي اني هم والله رح اشتاقلج بس شسوي الدوام بعد ضحكت زهراء جان تكول مو بس اني رح اشتاقلج 😉😉
اني ضحكت :ماكو احد غيرج
زهراء : وهاي المزهريه خطيه يريد بس يحجي وياج ومتقبلين اني جريت نفس بحسره : واني هم رح اشتاقله تعودت عليه بس ماكدر احجي وياه اخاف
زهراء:بس اني ما اخاف 😉
جاوبتهه :لا عفيه لتحجين شي وياه ..ثاني يوم دجيب صمون لكيت علي بوجهي بس شكله ضايج اني ضليت امشي ومنزله راسي جان يوكف كدامي اني خفت احد يشوفنه..عفيه علي عوفني خل اروح لزمني من ايدي بقوه ونظراته بوقتهه مرح انساهه ابد جان ضايج ..علي: مو كافي؟؟؟ رح ترجعين البيتكم بعد وين اشوفج ليش تتهربين مني اني سحبت ايدي كتله ممتهربه بس اخاف... علي: قبل مترحين لازم تعرفين اني احبج ولو مو ترحين لديالى لو لأمريكا اضل وياج.
اني كلبي كام ينبض بقوه وجسمي كله يرتجف : علي خجلتني عفيه خل اروح ماريد اتأخر
علي: ملاك صح متحجين بس انت تحبيني ودشوف هل شي بعيونج اني استحيت شحجي وياه ماعرف شكله هو شكله فاهم ويعرف كلشي بس اني استحي عفته ورحت مجاوبته .صار الليل اجت زهراء لبيت اختي
زهراء: ملاك علي يكول هذا رقمي خل تاخذه وتتواصل وياي اني خفت شلون اتواصل وياه ماعندي فون واخاف استعمل فون امي لأن عصبيه واخاف منهه المهم اخذت رقمه وضميته رجعت البيتنه ورجعت الامور الطبيعتها يعني مدرسه وامتحانات مكدرت اتواصل ويه علي بس بالي كله يمه اخاف اخابر من فون امي وتحس عليه...
...........................
يتبع 🌺..........
