حوش بنات ود العمده

الجزء 18

جلست محاسن في الكرسي الملاصق لسرير السرة بتوتر تنبئ عنه حركة قدميها المتقاطعتين اللتين تهتزان بعنف .. كانت ملامحها المتجهمة ونبرة صوتها الحادة تدلان على غضبها ..

- اعمل شنو يالسرة .. ابو عمار حلف عليّ طلاق لو ما جيت معاهو نخطب بت نعمات لكن انا اصريت اجيك الاول واوريك الحاصل عشان ما تزعلي مني ...

نفخت السرة دخان سيجارتها بعصبية تبعتها سعلة قوية .. وعلت وجهها ابتسامة متشنجة ساخرة ..

- شنو قصة حلفان الطلاق الواقعين فيها الرجال ديل اليومين دي ؟! هم قايلين روحهم بمسكونا من يدنا البتوجعنا ؟! ومالو الطلاق .. لا حرام ولا عيب .. الطلاق حق بنات الرجال ...

- سجمي يالسرة !! طلاق شنو البتتكلمي عنو بعد العمر دة ؟! دي فضيحة تقعد لينا لجنى الجنى .. والناس تقول طلقونا بعد ما بقينا حبوبات .. انا برّيت قسم ابو اولادي وجيت معاهو .. لكن رجلي ما بشيلا اوديها لبيت نعمات .. بقعد معاك هنا عشان اوريها اني ما دايرة بتها .. انا بس لو عرفت قشيرة دي سوت للولد شنو ؟! .. بقى ما شايف غيرا وقال يا هي يا بلاش .. ولا كمان يالسرة ياختي ما شفتي الولد التاني المفعوص المسجّم جاني بعد عرس رحمة وقال لي يا امي ما شفتي فاطنة بت ابراهيم بقت سمحة كيف !! عليك الله ما تخطبيها لي .. قلت ليهو والله ياهو الفضل كمان .. دة يكون آخر يوم في عمري كان خليتك تعرس بت حبيبة ..

كانت محاسن تتكلم باندفاع .. لكن نظرة خاطفة الى ملامح السرة انذرتها بالخطر .. فقد تحولت تعابيرها من الغيظ الى الغضب .. ضاقت عيناها وارتفع راسها الى اعلى بتحد ... وخرجت كلماتها هادرة لتؤكد انفعالها

- محاسن .. انتي قلتي لولدك ما يفكر يعرس بت ابراهيم ؟! ليه ياختي مالا فاطنة ؟! هو انتي اديتي الكبير لبت المرة الخطفت راجلي ومستخسرة التاني في بت ولدي ؟! ..

- اجي يا يالسرة !! انتي نسيتي امها منو ؟! جدها وحبوبتها منو و خيلانا منو ؟! عاوزاني ادي ولدي لبت الخادم ؟! على الاقل بت نعمات حرة ومرة واصلها ما فيهو كلام .. لكن بت حبيبة ..

قاطعتها السرة بحدة جعلتها تبتلع بقية كلماتها

- هوي يا محاسن هوي ... اوعي لروحك وشوفي انتي بتقولي شنو .. فاطنة ما بت حبيبة فاطنة بت ابراهيم ولد ابراهيم ود حسن الامين العمدة ... حبيبة دي قربة وفرغّت ... والبيابا بت ولدي الواحد معناها اباني انا زاتي .. يا اختي يا بت امي وابوي يا العاملة فيها متضامنة معاي .. جاية تقولي لي بت نعمات حرة ومرة ؟! .. سمح وقت كدي المقعدك هنا شنو ؟! ما تقومي تمشي ليها..

-انتي بتطرديني من بيتك يالسرة ؟! دة جزاي الابيت امشي مع ولدي واول فرحتي عشان خاطرك؟ سمح ياختي ..كتر خيرك .. لكن انتي ما غلطانة .. انا الغلطانة العملت ليك خاطر اكتر من راجلي وولدي