الزينه زينة بنات الفريق ،هاديه ورزينه وجميله جمال طبيعي لابودره لاروج ..والغمازات ال علي وشها كاسيات وشها روعه أكتر...
زولة بيت ساي وماعندها شدايد وطلعاتها بره البيت معدوده ،تمشي تودي الفطور لي ناس ابوها في الحواشات وتجي...
ولو حبت تفرق بتمشي لي اسماء صحبتها في الفريق القدامي ....ومرات بتجيها جارتها ، حاجه بتول الدايه
تقعد تتونس معاها وترفقها لحدي مايجوها ناس ابوها ..
الزينه هي البت الوحيده وعندها تلاته اخوان محمد وسعد وساتي...
سعد وساتي ناس زراعه وماعندهم شغل غير الزراعه مع ابوهم ..لكن محمد درس واتعلم واتخرج مهندس وشغال في المدينه مابجيهم الا زياره ...
امهم اتوفت بعد ولادة الزينه مباشرة وابوهم حاج التوم اكتفى بي تربية اولادو ومرعاة الزينه...
وفي يوم حاج التوم جابوهو اولادو من الحواشه تعباان، وقررو يسفرو المدينه ويعرضو علي اخصائي،بس هو رفض وقال ليهم خلوني اموت قبلي ...وقبل ما اموت داير اقول ليكم سر ، كنت ساكت عنو وداسيهو منكم لي سنين طويله والليله ما داير اموت بي سري دا..عشان كده انا دايركم تسمعوني كويس
انا زمااان وكت كنت بتاجر في المدينه عرست لي مره من هناك لكن طلقتها بعد شهرين ...وبعد سنه من طلاقي ليها عندي جماعه هناك رسلو لي قالو لي عندك ولد اسمو مصطفى
مشيت فتشت لي ولدي ، لكن لقيت امو ساقتو وسافرت بيهو بره البلد عشان كده انا دايركم تفتشو لي اخوكم مصطفى وتعرفوهو ويعرفكم وتدوهو حقو وماتظلموهو...
حاج التوم قال كلامو دا وطوالي سلم روحو...الزينه وسعد وساتي صرخوا بي حرقة لي وفاة ابوهم ...
عزاء حاج التوم استمر تلاته يوم ومحمد ولدو جاء من المدينه وجات معاهو طيبه خالتو وولدها سامي وقعدوا معاهم اسبوعين...
الزينه ماكانت بتعرف خالتها طيبه ولا ودخالتها اول مره تشوفهم .اتعرفت عليهم وخالتها كلمتها عن امها كتييير
وسامي بعد شاف الزينه بت خالتو عجبتو وقرر يخطبها من اخوانها لكن الوضع مامناسب قرر يكلم اخوها محمد بعد يرجعوا...
سامي وامو رجعوا لكن محمد قعد مع اخوانو عشان يشوف حكاية مصطفى اخوهم دي شنو..وبدو يجمعوا في المعلومات...
الزينه مشت تسأل حاجه نفيسه مرت ابراهيم صاحب ابوها وابراهيم ذاتو مات من زمان
لكن قالت احتمال تلقى ليها معلومه من نفيسه مرتو توصلها لي اخوها،نفيسه قالت ليها: بري والله اول مره اعرف انو ابوكم كان معرس
الله يرحموا طلع عينو زايغه.
يتبع.....
