المره وقفت تعاين لي محمد وسامي باستغراب وقالت ليهم: انتو منو وبتعرفوا كوثر من وين؟
محمد قال ليها: انا بسأل من واحده اسمها كوثر كان متزوجها واحد اسمو التوم
المره اندهشت وقالت ليهم:معقوله ؟وانت بتعرف التوم من وين؟
قال ليها:التوم دا ابوي واتوفى من اسبوع وقبل مايتوفى وصانا اننا نفتش لي اخونا مصطفى ...
ابتسمت وقالت ليهم اتفضلوا...ودخلت جوه ضيفتهم وقالت ليهم:انا حياة ام كوثر وكوثر بعد اتطلقت من ابوك ساقت ولدها مصطفى وسافرت بره البلد وهناك اتزوجت راجل تاني وانا مشيت جبت مصطفى وربيتو هنا وبنسافر ليها كل اجازة...
محمد قال ليها :هسي مصطفى في ؟
قالت ليهو:ايوا الننادي ليكم...
محمد وسامي اتفاجئوا بنفس الشاب المستهتر بتاع العربيه ،جاهم مع حياة وهو ذااتو اتفاجئ بيهم..
حياة قالت ليهو: تعال يامصطفى سلم علي الشباب ديل
دا طبعا اخوك محمد ودا ود خالتو سامي ..
محمد وسامي مازالوا مندهشين بي مصطفى ومصطفى برضو مندهش ويعاين ليهم
حياة قطعت دهشتهم دي وقالت ليهم:انتو بتعرفوا بعض؟؟؟
مصطفى صر وشو وقال ليها:اي قابلتهم بره،وأشر بي اصبعوا علي محمد وقال ليها:بلله دا طلع اخوي!!!
حياة قالت ليهو:اي اخوك وفيهو شبه شديد من ابوك وقالت ليهو ابوك مات يامصطفى..
ولا اتأثر بالخبر ابتسم وقال ليها:بالله؟طيب انا المفروض هسي اعمل شنو ابكي ولا اعمل شنو؟؟
محمد اتغاظ منو وقرب يقوم عليهو يكفتو لكن سامي مسكو..
قعد وقال ليهو:ابوي وصانا انك لازم تمشي البلد تتعرف علي بقية اخوانك وتعرف حقوقك
قال ليهو باستهتار حقوق شنو وبلد شنو انا ما داير منكم حاجه خلوني في حالي..
محمد قام علي حيلو وقال ليهو: ولا نحن بنعترف بيك اصلا لكن بس بننفذ في وصية ابونا وبعد كده علي كيفك وقال لي سامي يلا...
حياة لحقتهم جنب الباب وقالت ليهم: ماتسمعوا كلاموا دا ماعارف مصلحتو وعاش طول عمرو بعيد من جو العلاقات الاسريه وريني انت مسافر متين وانا غصبآ عنو بخلي يسافر معاك..وادت محمد رقم تلفونها وقالت ليهو:وكت تكون مسافر كلمني عشان اجهزليهو يمشي معاك..
محمد وسامي طلعوا منها بخيبة أمل لانو مصطفى طلع مابستاهل...
سامي كلم محمد بموضوع الزينه وانو عايز يتقدم ليها،ومحمد قال ليهو :انا ماعندي مانع لكن انت لازم تسافر معاي عشان تاخد رايها وتطلبها رسمي من اخوانها الكبار...
وقررو يسافرو في العطله وكانوا متمنين انو مصطفى يرفض السفر معاهم..
يتبع....
