سامي شعر بالإحباط والفرحه الكانت ماليه عيونو،دخلها حزن عميق وبقى يفكر انو يلغي عرسو من الزينه لانو مابرضى لي نفسو يعرس واحده لمسها زول من قبلو وكمان حامل...
بس رجع وقال:الزينه بريئه والحصل ليها دا جريمه والمجرم اخوها انا كيف اتخلى عنها وهي وثقت فيني وكلمتني بهمها من دون الناس كلهم !
سامي افكارو كلها اتشتت وماعارف يتصرف كيف وعاين للناس لقاهم مبسوطين بعرسهم هو والزينه وقال معقوله اتراجع بعد الفرحه الفي عيون الناس دي؟
واقول ليهم شنو؟
انا خليت اختكم عشان اخوكم اغتصبها؟مستحييل اخذل الزينه واعمل ليها بصمة عار قدام الناس
بس وين حقي انا وانا ذنبي شنو؟
سامي دخل في تفكير عميق مع نفسو وبقى قاعد مع الناس جته من غير روح ،لحدي ماجاهو احمد وقال ليهو: ياعريس الماذون دا جا مالك قاعد مهموم من هسي ،العرس اصلو ورطه وهم !!
قوم للعقد ...سامي قام متردد وتم العقد والناس فرحت ليهم وساق الزينه وسافرو المدينه والزينه مندهشه من تصرف سامي،كيف يتزوج ليهو واحده حامل ؟
واول ما وصلو قالت ليهو:سامي طلقني !
عاين ليها بشفقه ولانو كان متأكد من ردة فعلها دي قال ليها:وحتمشي وين وتقولي شنو لاخونك وناس حلتك ؟
انتي يا الزينه بت خالتي قبل ماتكوني زوجتي يعني انا ستر وغطاء ليك والبمسك بمسني وماذنبك انك تحملي بالغلط من اخوك بالعكس الذنب كلو علي مصطفى اخوك الخلاك وثقتي فيهو وعاملتيهو زي بقية اخوانك،ومصطفى دا حسابو عندي حشيل ليك حقي وحقك منو !
انتي هسي دا بيتك واخدي راحتك زي ماعايزة
الزينه شعرت براحه بعد كلام سامي بس قالت ليهو:طيب والفي بطني دا اوديهو وين والناس لو شافو بطني دي وانا لسه عروس يقولو علي شنو؟
قال ليها:ماتشيلي هم انا اصلا بيتي دا براي ومستحيل اخلي زول يجينا ويشوفك قبل ماتلدي حتى امي بلقى ليها عذر يمنعها من شوفتك..
المهم كوني مرتاحه وماتفكري في شيء كلو بتحل بإذن الله
الزينه لأول مره قلبها تدخلو السعاده مما اتوفى ابوها وبالرغم من موقفها الصعب .. انزاح منها هم تقيييل ونامت مرتاحه..
ماصحت الا بسامي بصحيها عشان تشرب الشاي ،لقتو لابس وطالع قالت ليهو :ماشي وين؟
قال ليها:ماشي افتش لي مصطفى وان شاء الله القاهو
اتوترت وخافت وقالت ليهو:خليهو لي الله وماتضيع نفسك عشان واحد مابسوأ
قال ليها مستحيل وطلع وكان الشر باين علي وشو...خلاها قلقانه وتدعي ان شاء الله سامي مايلقى مصطفى
يتبع...
