#بنت_التونسية
#الحلقة_11
~~~~~~~~~~~~~~~~~~~~~~~~~~
لايكاتكم ياريت قبل
*******
وصلت ريما لحوش بوها فتحت الباب الخارجي وخشت ...
ومشت لباب الحوش الداخلي وحطت المفتاح في الفتحه وما قدرتش تفتح
انهارت تبكي علي عتبه باب حوش بوها
حظنت ولدها كويس ..وتتفكر في اخر يوم فيه قبل ترفع رنيم معاها وكيف كانوا يحظنوا في بعض ويعيطوا...ورنيم لما تبكي واتقوللها_ كيف ياريما بنصكروا خوش بوي ..كيف معاش بنجوه ..معاش فيه ماما خلاص...
بعد وقت وقفت تاني وفتحت الحوش وسمت بالله وخشت...
بدت تلف فيه حجره حجره وزاويه زاويه ..وتبكي وفي خاطرها ..اتقول_قبل ساعات كنت متزوجه من حبيبي صلاح وكان ايحبني ووفي ليا من ساعات كانت عندي صاحبه ورفيقه ...لو اتبيع روحها ماتبيعني كانوا سندي كانوا مل هلي وناسي...وتو انا في حوش بوي مكسوره مجروحه لااا مش مجروحه انا مدبوحه مدبووووووحه _تعيط دبحتوووووني دبحتوووووني الله لايسامحكم...الله لايسامحكم
خشت لدارها لما كانت بنت كل شيء مغطي والحوش مغبر...
طلعت دخلت شناطيها هيا و ولدها وطلعت مع ولدها لراس الشارع للمحل شرت الصابون والمنضفات والمكانس والسيقات مكنسة الحيط وجاباته اتكرر فيه ووصلت للحوش ولانه مهووووسة نظافه كانت مستحيل تأجل اي شيء لغدوه...
نضفت دارها هيا الأولى ....ولما كملتها حطت فيها ولدها خالد وعطاته شيشته ورقداته ...خشت للحمام سيقاته ونظافاته كويييس
وبعدها المطبخ ..وصالة الحوش ...واجلت الباقي الي غدوه سكرت الحوش وخشت جنب ولدها ...
وقعمزت تبكي ...
اتصلت بخالتي سهير وماحصلتها...بعدها بدت تحس بليه قويه تغطت علي سريها ورقدتها جنب ولدها ..بدت الليه تزيد وتزيد وبدي النزيف ولانها تعبانه ومش واكله شيء من اليوم ...صاخت ..
وبعد فترة فاقت لانه خالد كان قالب الدنيا بعياطه ...حاولت تنوض حست بدوخه وحست حوايجها مبلوله ولما شبحت لقت السرير كله دم...
انخلعت. .وجبدت تليفونها اتصلت بأميره
اميره/هلا ريما ويينك ..
ريما_بصوت ضعيف_لحقي عليا يأميره انا في حوش بوي بنمووووت...
اميره_شنو..ومافيش رد. ناضت وكلمت ياسر ولد خالها...
ياسر_شن اتقولي انتي...امتا صار هدا..
اميرة_كيف صكرت مني..
ياسر_تعالي انتي واختي هداية... معاي بسرعه انلحقوها...
...
وصلوا لحوش عمه خالد..
نزلوا البنات يجروا ...
طقوا ع الباب مافيش رد ويتصلوا بيها مافيش رد وصوت خالد الصغير يعيط بصوت عاااالي ...
نزل ياسر ونقز من السور فتح للبنات..ويدعوا انه باب الحوش الداخلي مش مصكر...
وصل ياسر غمض عيونه بالقوة وفتح الباب انفتح وخشوا البنات جري ايتبعوا في الصوت...
وصلوا لدار ريما هداية قامت خلود تسكت فيه..
واميرة مشت لريما ..لقت النزيف طاالع عليها...
اميرة_حي ياهداية .تعالي شوفي
قربت منها..
هداية _حييييي ايييييه كان مش اتموت..
اميره_ فال الله ولا فالك نادي ياسر..وانا بنلف عليها البطانية..
طلعت هداية لوسط الحوش
ياسر_شن صار
هداية_تعال قيمها مع اميره .دايخه ومابتش تنوض...
ياسر_هي اطلعي انتي بالولد واحني نلحقوك وشوفي المفتاح الحوش وين..
نحت هداية المفتاح من الباب وطلعت بخالد
خش ياسر وقام ريما بين ايديه وحطها في السياره وخدي المفاتيح صكر الحوش وطلعوا للمستشفى...
وصلوا دخلوها طول للعمليات
هدايه_كلم راجلها يا ياسر ايجي
ياسر_لاااااااااا مانكلماش الحيوان هدا
اميرة وهدايه مستغربات من عصبيته ...
شويه ورن تليفونه
قامه وابتسم
ياسر_الو عفراء
عفراء_الوو يابيبي
ياسر_ مستحيل تنسيها انتي هالكلمه السامطه..
عفراء_بلاش منها الو حبيييييبيييي
ياسر_يضحك ..هك احسن .
عفراء_ بصوت دلع ..انت ويين .ماتقولش ف العزي
ياسر_ لا ف المستشفى بنت عمي مريضه وجبناها للمستشفى وتو خشت للعمليات..
عفراء_ اووو حبي نغار اني من من بنات عمك هادي
ياسر_متزوجه هادي وعندها ولد ..
عفراء_ انا انغااار مانحبش اي مرا اتشوفك ولا تقرب منك...
ياسر_باهي تو. بنصكر الدكتور طلع من العمليات..
.....
صكرت منه
عفراء_هالبارد الجاف هدا وووووك مزط كبدي من انكلم منو ...منو....احمد ولا سيف ...لا انكلم عادل احسن منهم فيه جو ..
عفراء_الو عدووووولي
عادل_اووو غلاي متصل بيا مش دايره رنه..
عفراء_حرااام عليك هكي تقول تو مش عارف خوتي وبخلهم هما والله لو يعرفوا عندي فون يقتلوني..لا وياخدوه مني ايبيعوه باش ياخدوا بحقه حشيش..الله لا تسامحهم..
عادل_هاانت ياعمري هانت قريب انكمل حوشي وانجي نخطبك..لكن نبي انشوفك ثاني ووالله مستاحشك غلاي..
عفراء_ ان شاء الله قريب نتلاقوا..
عادل_تي نعشقك انا نعشششقك..
عفراء_حتى اني...هيا تو سلام خوتي جوو يدعدعواا
عادل_صكري ع روحك الباب وارقدي
عفراء_باه..تصبح ع خير
عادل_وين هكي جافه..
عفراء_ههههع تصبح ع خير حبيبي امووووووواه
عادل_وانتي من اهله امووووه
عفراء_ صكرت منه وبدت تبكي ..كذااابين كلكم زيه كذااابين ..عمركم ماحتعرفوا الحب ..كلكم خاينين زيه ...اليوم نحبك ونعشقك...وغدوه اتحب غيري وتعشقها وبعدها تتزوج وحده خاطبتها امك زي التافه الي خاطبني يلعبوا ع بنات الناس وبعدها ايجي يخطب يبي قطوس في شكاره...
انا مش نادمه بكل ..انعلقكم كلكم بيا وبعدها نتزوج ونحرقكم زي ماحرقني وباعني التااافه ..نكرهه نكرهه...وقعدت تبكي لين رقدت ..
نفس الحاله اتجيها كل ماحد يقوللها نعشقك ..تتفكره طوول..الخاين الي علقها ثلاث اسنين ف الثانوي وبعدها تزوج بنت عمها ... لتو قاعده تتوجع كل ماتسمعها نعشقك ...طلمه بسيطه قالها هو مره واثنين والف علقت هيا عليها احلام وبنت عليها حوش وسمت حتى الصغار...وفي يوم. كا
ل شيء انهد لما جت بنت عمها اتوري فيها في صورة خطيبها وتتكتشف ان حبيبها سيبها وخانها ..وعشقه وهيامه وكل شيء كان بالنسبه ليه هو تفويت وقت كانت بالنسبه ليها هيا الحياه الي تحلم بيها الأشياء الحلوة الي تستنى فيها
كلمه تافهه عند الشباب وعلاقة عابرة
والم وعذاب عند البنات ينتج هالنوع من البنات زي عفراء تو ..
......
عندي انا
ماما_وين ريما.. وين ريمااا
انا_ مانعرفش ياماما ريما لزتني ...لزنتي وسيبتني
ماما_ سنك ..يارنيم قريب طاحت... عالجيها من السوسه يارنيم قبل لا اطيح...
انا_ تعالي ياماما وين ماما ماااااامااااااا
رغد_ نوما ..اشبيك فيق فيق ...نومااا واتهز فيا
نضت عارقه ونبكي بالعبره وانعيط...
حظنتي رغد_اشبيك يابنت ....شنوو صار معاك..
انا_ماما يا رغد حلمت بماما. ....
حي ريما ...
نضت من السرير وخديت تليفوني وضربت رقم ريما كنت حافظاتها من كتر ما نكتب فيه وانجي بنتصل بيها وفي اخر لحظه نتراجع ..اما تو ويعد هالحلمه ..عرفت اني لازم نتصل بريما...
ظبح ..ظبح..وماردت....اتصل ثاني..ونفس الشيء..وبعدها اتصلت ب أميره
اميره_هلا رنيم..
انا_هلا...سامحيني ميرووو متصله ف هالوقت
اميره_لا عادي قاعده مارقدت شن فيه..
انا_انتي شوفتي ريما اختي اليوم
اميره_ مستغربه...اه..
انا_شن فيها ما ادسيش عليا حلمت بماما ومش مرتاحه بكل
اميره_ماهو انا تو ف المستشفى وريما كيف طلعت من العمليه
انا_عملية شنو...شن فيها
اميره _كانت حامل وصارلها نزيف قريب ماتت ..
انا_باه..وتو..شن حالها..
اميره_خسرت العيل وحالها تو كويس..
انا_ نبكي... احكي الحق كويسه هيا تووو.بالله ميروو ماتكدبي
اميره_والله كويسه والله احسن من قبل..تو صكري ياسر واخته جايين
انا_باه اول ماتفضي رني عليا نستنى فيك..
صكرت منها ..قعمزت نبكي ..اختي الوحيده قريب ماتت وانا راقده مانندري علي شيء هدا ماقعدلي من عيلتي ومانعرف عليها شيء كله من راجلها الله لاتسامحه ولاتربحه...
.....
ثاني اليوم سمعت كل العيله وكلهم جو لريما يتحمدوا في السلامه وبدلت اميره روحت و عاليه اختي من بوي وقعدت مع ريما
طلعوا الكل
عاليه_وين راجلك ماشفته
ريما_ كيف بتتكلم لين خش صلاح_ شبكت فيه _ اطلللع برا ..اطللع براااااااااا..
صلاح_حبيبي ..اهدي بس طالعه من الموت انتي ياعمري..
ريما_اقلب وجهك..اطلع برا يااريتني متت ولا عرفت اطللللع برا
عاليه_ غير استهدي بالله ياريما..
صلاح_معليش ياعاليه اطلعي شوي لو سمحتي
ريما_ماتطلعيش ..يطلع هو...
عاليه_شويه وجايه..ماتخافيش
ريما_مش خاايفه مانبيش نشوفه..
طلعت عاليه ..وصلاح قرب منها
ريما_أببببعد علياااا اطلع برا اطلع من حياتي ...
صلاح_حبيبي والله اسف والله ما يتكرر... حبي والله قريب جنيت امس وين روحت ومالقيتك..والله مارقدت الليل كله وانا بين المستشفيات والصبح لقيت اسمك اهني لاكن درتش انخش..حبي انتي ..والله مانقدر انعيش بلاك.. والله انحبك..لحظة طيش واسف عليها..
ريما_ ورنيم لحظة طيش حتى هيا....اطلع من حياتي انت واحد كداااب وخاين...ما ايشرفنيش نقعد ع ذمتك اطلللع...
صلاح_ تكلمي كويس...تي شرف ليك اني..وزي المرا الطيبه تطلعي من اهني لحوشك..
ريما_في احلامك ..والله ..والله ياصلاح..مانرجعلك...ولو توقف علي هدب عيونك..ولو تعظ شحما وذنك ...
صلاح_غصبا عنك.
ريما_ ماحد يقدر يغصب عليا..
..
وطلع صلاح يفتنر تلاقى هو و ياسر جاي..
ياسر_شن ادير اهني..انت
صلاح_جاي لمرتي شن دخلك انت
ياسر_ماعندكش مراه عندنا ..اطلع برا ومعاش اتجي..
صلاح_حلوه هادي احترم نفسك اكبر منك اني..
ياسر_الكبر مش بالعمر الكبر بالعقل..
صلاح_ شن قصدك ..وشده من حوايجه
ياسر_نزل ايدك لانك مش قده الشده هادي
صلاح_نعمم ياولد&٪$ يا &$٪٪ ونزل في ياسر ضرب
في الاول ياسر مايبيش يضرب لكن بعد كبر الكلام نزل علي صلاح ..ياسر كان بجسم رياضي وما ايدخنش ...عكس صلاح ..فكانت الغلبه ليه هو..
وطلع صلاح يتوعد ويهدد
خشت عاليه لقت ريما تبكي
عاليه_ خيرك ..شن فيه بينك وبين راجلك..
ريما_ بالله خلوني ف حالي خلووووني..
عاليه غير استهدي بالله مش كويس ليك البكي انتي زي النافس راه..
شويه وخشت هدايه لريما وجايبه معاها خالد..
خداته ريما منها وحظناته وبدت تبكي بالعبره ..شوي وبدي خالد يبكي معاه ..خدوه منها وجت الممرضه ضربتلها يبرة مهدي ..قعدت شوي ورقدت طلعوا كلهم روحوا ..وأيهم جاب أمل...باش تقعد مع ريما..
فاقت ريما بعد المغرب لقت جنبها امل ..
امل_تليفونك من بكري يشرين
ريما_ اها..من جابه..كان في حوش بوي
امل_ جاباته اميره من الحوش..لما مشت جابت حوايج لخالد..
ريما خدت التليفون ولقت مكالمات من العيله ومن صباح وصلاح ومن رقم دولي ..وبدايته مفتاح تونس..
عاودت عليه تحسابها خالتها سهير
... #najah_alhaj
عندي انا كنت طالعه من الدوش نسمع في تليفوني يشرين
رفعته لقيته رقم ريما..طول عيوني تعبوا دموع.. ورديت
ريما_الو خالتي..
انا_الو ..ريما ..انا
ريما _رنيييم ....وبدينا نبكوا.. شوق وعتاب وحنين واحتياج كله علي بعض
ريما_ وييينك احتجتك وما لقيتك...وينك...انا نبيك... انا مطعونه مجروووحه يانوما..
انا_.. استاحشتك...هلبا...شن صار معاك ..ماما توصي عليك ..
ريما_ صلاح يارنيم...صلاح خاني...
انا_كلب. اصلا مايستاهلكش. .تلقيها تافهه زيه
ريما_مع صباح يانوما..
انا_شنوووووووو
ريما_صباح يارنيم ..وتبكي بالعبره...رفقيتي..و وخيتي .الي ماجابتها امي ..
انا_كانه هو قالها ما اتصدقيشي. صلاح كداب ..
ريما_شفتهم بعيوني ..شفته معاها..
انا_ التافهه ..كيف اديري هكي فيك... كيف تلعب مع راجلك من وراك من قلت الرجاله خزيي...وجعتني اختي نعرف صباح شن اتكون بالنسبه لريما...انتيمات لدرجة الإدمان حتى بعد تزوجوا قاعدات احرف من قبل...
انا_ ماتبكيش عليهم مايستاهلووش..
ريما_ مانبكيش عليهم ..نبكي ع روحي..قعدت بروحي يانوما...قعدت برووحي
انا/مش بروحك..انا نكمل الشهاده ونرجع ونسكنوا ف حوش بوي..ونفتحوا مزين ماما..ولنعيشوا مع بعض ويكبر خالد و يونسنا..
ريما_يستر الله مايبيش يسبني ..
انا_ردي بالك تضعفي وترجعيلها والله مايستاهلك
ريما_انخاف ياخد خالد..
انا_مايقدرش الحضانه ليك تو..وبعدين هدا انخمموا فيه بعدين تو انتي اهتمي بصحتك وبخالد وتو نتكلموا مع جدي ونشوفوا الوضع..
ريما_قاعده في حوش طدي ف تونس ..
انا_اها قاعده مع خالتي سهير غير هالفتره قاعده ف العاصمه عندي كورس مع ديور..
ريما_اوووه كورسات وجو ..احسن بعدتي علي ليبيا احسن والله..
انا_طبعا ..الخيره ديما فيما اختاره الله يعني بعد طلعت من حوشك نحساب خلاص بنقعد اندور بشنطتي بين الحياش لكن ربي خيره ف الوجود كل شيء كان في البدايه صعبوتو الحمد لله اموري تمام وعرفت وتأكدت انه ربي ما يكتب لي الا الي فيه خيرتي..
ريما_فعلا ..صح توجع وقلبي يتقطع وخسرت البيبي لكن مش خير من قعدت زي الهبله انزقط في الصغار وهو زايط معاها..
انا_ايووه هكي نبيك قووويه كيف ماعودنا بابا رغم كل شيء قويات ما نخافوا شيء مادامنا مادرناش حاجه تغضب ربي ..
ريما_ان شاء الله..
انا_اوكي تو سلام تو نحكوا غدوه وماتحكي لحد من عمامي انك حكيتي معاي مانبي حد يعرف اني في تونس..
ريما_لكن امل جنب وسمعتني..
انا_نبهي عليها بس امل مانخافش منها.
ريما_اووكي..سلام تو
انا سلام..
....
وفات اسبوع وطلعت ريما قعدت ثلاث ايام عند جدي وبعدها رجعت لحوش بوي وصلاح كل يوم ايجيها يترجاها يحلف انه يحبها يحلف انه معاش حيكرر هالشي معاش حيخونها..
لكن جرح ريما كبيير.. الخيانه عند البعض شيء مايغتفرش بكل...وريما من هالنوع ع قد ما كانت تحبه ع قد ما الوجع والألم الي تحسيه بيه تو...طلبت من الطلاق وهو رافض
..اتصلت بيها
ريما_هلا نوما...
انا_هلا ريما شن صار روحتي لحوش بوي .
ربما_ايه من الصبح وجبت معاي شغاله ظماته كله و ظمت حتى المزين امتع ماما ..حنزيد اسبوعين هكي وبنشوف شن ناقصه وبنفتحه من جديد..ولما اتجي انتي ايكون جاهز ..
انا_تمام حتى هدا راي ..شن صار مع صلاح طلبتي الطلاق
ربما_ايه طلبته و رفضه ..تو بنقوله متنازله ع كل شيء بس يطلقني
انا_تتنازلي حلوه حتى هادي..اسمعي ريما ..قوليلها يطلقك ويعطيك كل حقوقك..ويكتب الشقه بإسم خالد ..ولو رفض قوليله حنرفعوا عليك قضية تحرش برنيم ونفظحوك وجدي وجدتي بيشهدوا معانا ...تو اتشوفي مان ما طلقش ..
ريما_شن تحكي انتي ..حي عليك وقتها حتنفضحي انتي..
انا_راجلك خوووواف والله الا ما ايطلق..
ريما_تو انفكر فيها كويس وانشوف
انا_لا..ماتفكريش انا فكرت كلميه غدوه واحكيلها خلي اتفض ..وعيشي حياتك وانسيه ما يستاهلش.
ريما_ما حكيتلكش
انا_شنو ثاني
ريما_صباح جت امس لحوش جدي وع اساس بتتعدر امست جدتي عواشي لزتها..
انا_حييي هههههه تستاهل..
ريما_بردت ع قلبي جدتي..لكن وجعتني ..صحبتنا..وايامنا..يارنيم..
انا_العيب فيها وفيه الغدر منهم هما ..ما يستاهلوش هما الي باعوك. معاش تحنيلهم ولا تفكري فيهم..
ريما_ان شاء الله ..هيا سلام خالد جعان..
انا_بوسيه ليا وعضيه استاحشته ..سلام......
...
عند معتز
بوفا_خيرك مضايق.
معتز_نبي نروح اختي مريضه هلبا
بوفا_كييف منو.
معتز_ اختي هاله.
بوفا_وقف وبان عليه الخوف_كنها..مش في بنغازي هيا..
معتز_استغرب من صاحبه..اها مع عمي تقرا عندهم لكن مريضه هلبا ..عندها فقر دم حاد وهبوط في الضغط..
بوفا_ يحاول يخفف توتره وخوفه_لا بسيطه هادي يضيفولها دم ويعدلوا الظغط..
معتز_ليها ثلاث ايام في المستشفى وباتي عدا لبنغازي وخايف عليه هيا عندها تحسس في الدم فخاف انه اي حد يتبرع ويعطوه لها فسافر عشان يتبرع هو وقال تعبانه واجد..
بوفا_بلكي انحصلوا زرقا يومين..
معتز_وانت علاش بتعدي..
بوفا_رجلي ع رجلك..
وطلع من جنبه..معتز_كنه هدا...
بوفا طلع للشارع...مش عارف وين يمشي..اتصل بأمه
امه_بوفا وليدي ياناعليا استاحشتك.
بوفا_كيف حالك يمه والله حتى انا استاحستك انتي وباتي وخوتي وخواتي..
امه_طيبين نرجوا في طلتك ..امتا اتجي
بوفا_ تو انشوفوا بلكي انحصلوا زرقه..يمه
امه_ادلل
بوفا_اخت معتز هاله ف المستشفى تقريبا مستشفى..الجلاء.نبيك اتعدي اتزوريها
امه/لاباس عليها اخته شقيقته هاله صح..
بوفا_ايه..تعديلها واطمنيني..
امه_عرفتك حاط عينك عليها من زمان.
بوفا_ابتسم..غيى ماتنسيش خودي معاك شكلاطه وعصير راوخ عنب..وخودي فاكهه واشوي كبده وطحال..وشيليهن معاك
امه_شنو ماشيه لنافس انا نشيل كبده
بوفا_دمها ناقص واااااجد شيليهن معاك تربحي..
امه_ادلل وليدي ادلل.. ماتوصيش علي كنتي..
بوفا_باهي تو بالسلامه سلمي ع الكل
..........#najah_alhaj
وحصلوا يومين مشوا لبنغازي
معتز مشي لاخته وبوفا لاهله
وف اليل معتز روح لحوش عمه..
وبوفا مشي لصاحبه ممرض دخله بالواسطه
هاله_كانت كيف بترقد طق الباب.._منو
بوفا_انا مصطفى صاحب معتز..
هاله_بوفا..!؟؟
بوفا_في خاطره..من امتا اسمي سمح هك_ايه..
هاله_خش تفظل..
بوفا_السلام عليك لاباس عليك..
هاله_وعليكم السلام الله لايوريك باس
بوفا_قرب منها وعطاها باقة ورد..
هاله_شكرا علاش تعبت روحك..
بوفا_شن فيها من تعب..
هاله_جيت مع معتز
بوفا_ايه..هاله
هاله/نعم
بوفا_ كم مازالك وتتخرجي..
هاله_سنتين عليش السؤال
بوفا_انتي عاجبتني ورايدك بالحلال ..نبي نخطب تو..والفرح بعد التخرج نبدا شطبت الشقه وبديت في العمل..
هاله_ ..متحشمه ووجهها بدي احمر
بوفا_ السكوت علامه الرصا معناها انكلم معتز
هاله_.ولا كلمه في الشك حتى النفس شاداته..
بوفا_خلاص تو نرجا ردك مع معتز..الف لاباس عليك..ومعاش تخوفني قلبي قريب وقف وين سمعت بمرضك..
هاله_الله لايورك بأس ..وشكرا ع الورد بوفا..
بوفا_ الورد للورد اصلا..
وطلع..
ورجعوا لدبي..
وفات الوقت وصلاح طلق ريما...
وانا قريت السنه الثانيه والثالثه...نجحت وبكرا بيجي جدي عشان يروح بيا ..
خ سهير حتسافر لفرنسا لخالي فترة ..نسيت انقول انه خالي تزوج وحده فرنسيه...لكن مسلمه..
خ سهير_ بتمشي خلاص
انا_والله بنستاحشك ...
خ سهير_ وانا بنتوحشك برشا برشا...
انا_من زيك بتمسي لفرنسا شهريين
خ سهير/اققعد معاي ونشيلك حتى لامريكا
انا_مانقدرش وعدت جدي وريما تستنى...
خ سهير_ربي يكتب لك كل شيء صالح..
انا_ان شاء الله..لو شفتي كيف ودعوني في المركز دارولي حفلة والمدام حظنتي وبكت لين بكت الكل معاها رغد زعلت مني ومابتش اتجي وفي نص الخفلة خشت لابسه اسود في اسود وبكت والله لين خفت عليها
خ سهير_ انت خليت الكل يحببك واكيد كلهم بيفقدوك ويتوحشوك..
انا_حتى انا والله
وجي ثاني يوم ووصل جدي الظهر مع ع فرج
وطبعا عمي يلوم ويعاود كيف نطلع من البلاد وما نحكي...
#يتبع
#najah_alhaj
أراكم وتعليقاتكم تهمني
غدوه فيه حلقة بإذن الله حنرجع ننشر من اول وجديد كل يوم ...
النت فاااصل وفاتحه بالمدار هدا وين شد معايا
