من أكون؟..من الماضي..

البارت السادس..الاخير

علي... قررت اساعد محمد والبنية اللي يريدها...بس لازم احضر كل اموري ما اريد اتعب وبالاخير كلشي يخرب...واتأكد كلشي يمشي صح...اول شي اتجه لابوي...ما اريده يعترض ونا اريده يوافق اريده بس لا يتدخل هذا اقل شي لازم احصله منه...بعد ما رجعت من كلية محمد رحت مباشرة للمضيف لگيت ابوي وعمي فاروق...سلمت عليهم...وكعدت يم ابوي...تقربت منه وگلتله عندي موضوع وياك...واريد استفسر منك..

ابو محمد...گول بوية اذا عندك شي هسة...ليش تأجله؟..

علي...لا بوية بعدين من نرجع من البيت...نحجي بيه وحدنا..

ابو محمد...بكيفك بوية...بس اليوم راجع من وكت خيرك؟..

علي...اخذت اجازة وطلعت من الكلية...جان عندي شغل...وهم من ارجع اگلك بيه...بقيت يم ابوي لحد ما صارت الساعة الـ12:30 رجعنا للبيت سوا...اخواتي اجو من المدرسة بس محمد بعده ما اجا...ابوي راح لغرفته ودز عليه...رحتله دكيت الباب ودخلت..

ابو محمد...تعال بوية علاوي...سولفلي شنو ردت مني؟..

علي...بوية اريد اسألك كم سؤال بخصوص محمد...واريدك تجاوبني الصراحة..

ابو محمد...تسألني عن محمد؟..محمد خيب ظني بيه وقهرني...ما حسب حساب لاهله وراح سوا عملته هاي..

علي...بوية هسة صارت وراحت...وان شاء الله يعدل هاي السنة...بس مو موضوعي نجاحه...موضوعي عن زواجه..

ابو محمد...شبيه زواجه؟..

علي...اريد اسألك انت معترض على البنية اللي يريدها محمد؟..

ابو محمد...بوية اني شنو اعرف عنها حتى اعترض؟..اذا بنت ناس طيبين كل اعتراض ما عندي..

علي...لعد شنو اعتراضك؟..

ابو محمد...اعتراضي على رسوبه هيج...وما اريد واحد منكم يتزوج وهو ما عنده شغل جوة ايده يسترزق منه...واذا عبالكم لان انتو ولد شيخ يعني بكيفكم...فتحلمون بالزواج..

علي... يعني بوية اذا محمد اشتغل وكون نفسه عادي يتزوج؟..

ابو محمد...عادي يشتغل ويكون نفسه ما الي بعد سلطة عليه...بس كون ما يترك دراسته هم..

علي...زين اني راح اسأل على البنية واشوف شنو اهلها ميخالف؟..

ابو محمد...براحتك بوية...واذا تريد اساعدكم باي شي عدا الفلوس...گلت كلمتي وبعد ما اكسرها..

علي...سهلة الفلوس تتدبر ويدبر الشغل هم وياه...بس اريد موافقتك..

ابو محمد...اني موافق اذا يعتمد على نفسه..

علي...ان شاء الله...يلا اني اترخص..

ابو محمد...تعال تعال اليوم ليش طالع من وكت من الدوام؟..

علي...غير رحت لكلية محمد اشوف البنية شلونها قبل لا اجيك..

ابو محمد...والله يا بوية انت ما تنغلب...بس غير كون اخوك يصير مثلك..