من أكون؟..من الماضي..

البارت الثالث..

محمد...مر شهر كامل بعد رفض منى الي واني اول مرة احب بحياتي واول مرة اجرب هيج خيبة بحياتي... جنت اسمع اليتعذبون بالحب بس جنت اضحك عليهم وعلى عقلياتهم...بس رب العالمين راد يسويها بية لان اضحك على الناس...اباوع لمنى من بعيد واراقبها وما صارت عندي الجرأة اقترب اكثر من هذا...اخاف الرفض والاكثر اخاف تكوم تكرهني...اتمنيت عندي عقلية علي من يفكر خارج عن المألوف بس اني عكسه بهذا الشي امشي ورا مشاعري...وهسة مشاعري بس خوف وقلق...
مؤيد...محمد...محمد...ههوي محمد هل تسمعني...هذا رايح بالتفكير ولا يمي...لا وصارلي ساعة اسولفله مشكلتي وهو كلشي ميسمع... بديت احس نفسي خبل واحجي لوحدي... الحل وحيد ينتبهلي هو...ضربته راجدي خليت الناس اليمنا تفز من صوته...
محمد...هااا ليش تضربني؟..
مؤيد... ولك كلب صارلي ساعة انبح لوحدي وانت ما ترد علية ضايع بافكارك عن الاميرة منى..
محمد...مؤيد عوفني رحمة لاهلك...والله ما عندي خلك لشقاك..
مؤيد...انت تظل هيج مهزوز؟...ترا هي مو النهاية ولا هي اخر بنت بالدنيا... راح تلگي احسن منها...هي خسرتك مو انت خسرتها...
محمد...ما يهمني منو يخسر ومنو يربج...كل اليهمني اريد هاي البنت...ما اكدر افكر تصير لاحد غيري...
مؤيد...البنية رفضتك قابل تغصبها تتزوجك؟..
محمد...لو بيدي اغصبها...بس ما اريد تكرهني...وما اريد اشوف زعلها..
مؤيد...لعد انساها...وانتبه لنفسك انت ما شايف شلون وجهك صاير من الضعف...شكلك كله متخربط... حتى لو تحاول مرة ثانية راح ترفضك بسبب شكلك..
محمد...اوووف...تحسرت حسرة بس الله يعلم شنو بگلبي..اكو طلاب يحاولون يتقربون الها ولصديقتها...ودمي يفور من وراهم اريد اتدخل بس خايف من رد فعلها..
مؤيد... اباوع على محمد بس يتحسر ويتنهد...محمد مثل اخوي وما اكدر اشوفه هيج... حتى مستواه بالدراسة قل...احس اني السبب باللي صار...لان طلبت منه بذاك اليوم نشوف المرحلة الأولى...لو مرايحين ما جان صار اي شي من هذا...فكرت اروح لصديقة البنية لان هو دائما يسولفلي يگلي هي تدبر لقاءهم بينهم...

رقية...ما اعرف شكد صار من رفضت منى محمد...واشوف الولد يومية يتغير شكله...والله قهرني... ولج منى شفتي محمد اليوم؟..
منى...اي ليش؟..
رقية...اي ليش؟...هو هذا رد...ما تشوفين شسويتي بحاله... الولد يحبج وما اعرف شنو شاف بيج..
منى...ولا اني اعرف اكو هواي احلى واحسن مني..
رقية... شكد قاسية ولج...ما ربيتج هيج...هسة لو يحبني اني جان وافقت من اول مرة..
منى.....
رقية...شو تسكتين؟...اوف منج...منى كاعدة على الستيج ومنزله راسها تكتب وابد ما رفعته واني احجي وياها...ولا كأنها مهتمة...
منى... شنو تريد مني رقية احجي واني گلبي هم محروگ عليه واريد ابجي...قابل اني گلتله يحبني...ما ردت توصل هيج الامور وياه وگلت ارفضه من البداية... وحتى لو وافقت اهلي ما يرضون وابوي ما يقبل اتزوج كائن من كان...حتى اكمل دراستي... واني ما اريد اتعلق بيه وانتظره 4 سنين وبعدها يمل ويتركني...بس شلون اخليه ينساني...والله احس بيه ومن يمر من يمي عيني تبقى وراه تتبعه بدون ارادتي...ما يسهل عليه اشوفه هيج...يا ربي وفقه وريحه من همة..
رقية...اني يم منى واجت بنية من المرحلة تگلي اكو ولد مرحلة رابعة يريدج ومنتظرج برا...گلت بگلبي هذا محمد يمكن يريد يحاول وياها مرة ثانية...رحت بسرعة بس طلع ولد ما اعرفه... شنو يريد مني بس لا يصارحني...خلي اخلص منه بسرعة...بس شكله مو غريب علية...تفضل اخي...اذا تريد تصارح اني اعتذر منك...ما احب هيج سوالف...
مؤيد... انطي مجال يمعودة منو يصارح... اني صديق محمد واجيت احجي وياج..
رقية...اعتذر والله مو قصدي عبالي من ذولة بس يصارحون..
مؤيد...لا لا عادي اجاني اول بوري بحياتي تايه ما اعرف منين واني بعدي صغير..
رقية...هههه...اعتذر والله مو قصدي..
مؤيد...كلتلج عادي...وانتي ما سامعة المثل يگول يجيك البوري وانت نايم...بس اني اجاني واگف..
رقية...وين اكو هيج مثل؟..
مؤيد...لا مو هذا تحوير عن تجيك التهايم وانت نايم...بس بالتصنيع استخدمت البواري..
رقية...هههه..
مؤيد...خلينا من الشقة اجيت بخصوص موضوع محمد..
رقية...اي شفته محمد متغير...شلونه هسة؟..
مؤيد...نبقى نحجي بباب القاعة والطلاب تباوعلنة... خليني اعزمج على النادي نحجي براحتنا..
رقية...لا لا تصير زحمة وما اريد اكلفك...
مؤيد...تحجين صدك شنو مكلفتني ما يغلة عليج شي..
رقية...مشكور...اخذني للنادي وكعدنا..
مؤيد...تاكلين شي جوعانة؟..
رقية...لا شكراً مو جوعانة..
مؤيد...لعد راح اطلب عصاير...
رقية...بكيفك...راح جاب العصاير واجا كعد مقابيلي..
مؤيد...تريدين الصدك حال محمد كلش مو حلوة...وتعبان من يوم رفضته ولحد الان..
رقية... والله اعرف...يوم عن يوم اشوفه متغير...بس صديقتي راسها يابس..
مؤيد...لا تزعلين مني بس ما اعرف شنو شاف بصديقتج ورادها...صحيح حلوة بس اكو احلى منها...ومحمد البنات بالكلية كلها تتمناه...هم اخلاق وهم شاطر وهم ابن شيوخ...ابد ما يتعيب...
رقية...لا ما ازعل...وگلتلها كل هذا قبلك...بس هي تگول أهلي ما يوافقون لان يريدوني اكمل دراسة...
مؤيد... خلي تكمل دراسة بس مو ترفضه نهائيا..هو ينتظرها..
رقية...اني اعرف ليش هي سوت هيج ولو اني بمكانها هم اسوي هيج...هي خايفة تتعلق بمحمد وهو يتركها خلال الانتظار ويجرحها... صديقتي واعرفها واحنا جنا صغار..
مؤيد... محمد هم صديقي واعرفه مستحيل يسوي هيج..
رقية...هو صديقك وتثق بيه...بس احنا ما عرفناه الا من شهر وشوية... ما نكدر نثق بيه مثلك..
مؤيد...حقكم وما اكدر اجبركم على شي...بس كوليلها محمد عنره وحياته ما حب بنية... ومن حب حبج انتي...اول وحدة بحياته...وهذا خبل يسويها آخر وحدة بحياته وما يحب بعد وراها اي بنية..
رقية... راح اوصللها هذا الكلام...واشوف شنو ردها..
مؤيد...يا ريت...ترا محمد وردة وما تلگه مثله وگلبه طيب... وعمري ما شفته حقد على احد حتى على اللي يأذيه..
رقية...اعرف بيه سألنا عنه هواي بالكلية والناس كلها تمدحه وتمدح اخلاقه وطيبه...بس گلتلك هي تخاف على نفسها ما تريد تتأذه بعدين ولا تريد تأذيه وياها...
مؤيد...حاليا ما شايف محمد هيج متأذي قبل...بس كوليلها لا تخلي رفضها قطعي... ميخالف ترفضه وقت دراستها بس هو راح ينتظرها تتخرج ويخطبها ويتمنى منها توافق..
رقية... والله اوصل كلامك كله مثل ما هو..
مؤيد...فرصة سعيدة التقيت بيج وتعرفت عليج...الي الشرف بمعرفتج..
رقية...الشرف الي...حلو اشوف صديق مهتم هيج بصديقه...
مؤيد...محمد مو صديقي... محمد اكثر من اخوي..
رقية... الله يديملكم هاي الاخوة..
مؤيد.. آمين... واعتذر اخذت من وقتج..
رقية...لا بالعكس حلو الكلام وياك...اني اترخص عندي محاضرة..
مؤيد.. براحتج... راحت رقية وبقيت افكر اللي سويته صحيح لو راح يزيد الطين بلة...شلون يا ربي...كل الصار بسببي واذا صارت الامور اسوء ما اعرف شلون اواجه محمد...ادعي تقتنع وتقبل ينتظرها...ما اريدها تحبه او تحجي وياه ولا اريد منها اي شي...بس تگول موافقة ينتظرني ويخطبني بعد الدراسة..

رقية...رجعت لمنى ولگيتها وحدها بالقاعة وصافنة على السبورة...وعيونها حمر...مبينة باجية...هاا منى خيرج شبيج؟..
منى...لا ما بية شي...ليش؟..
رقية...يا ما بيج شي عيونج صايرات دم...
منى... كلتلج ما بية شي..
رقية...اي ما بيج شي... بس قبل شوية جنت ويا صديق محمد اسمه مؤيد...من گلتلها اسم محمد غيرت كعدتها وباوعتلي...مو مثل قبل شوية جانت ما مهتمة..
منى...اي وشصار؟..
رقية...محمد كلش تعبان وحتى بالدراسة نازل مستواه...گلتلها هيج شو هاي بدت تبجي..
منى...تبجي... والله مو قصدي أأذيه...ولا اريد أتأذه وياه اني هم...
رقية... اخذتها بحضني وخليت راسها على صدري...ادري حبيبتي انتي ما تأذين نملة...بس شنسوي الظروف عكسنا...قهرتني هاي البنت فطيرة وما تعرف تتصرف...وتخاف على اهلها يتأذون اذا صار شي...يلا حبيبتي اليوم نغير طريقنا من نطلع اكو شارع كله حدايق ورا الجامعة خلينا نتونس شوية..
منى...بكيفج وين ما تريدين اروح وياج..
رقية...يلا كافي بجي...راح نطلع وهسة يشوفج محمد تبجين ويتأذه اكثر اذا شافج هيج..
منى...راح اروح للمغاسل اغسل وجهي..
انتظريني..
رقية...اني اجي وياج..

مؤيد...رجعت لمحمد لگيته صافن مثل العادة...شبيك يمعود صفناتك صارت عددهااكثر من ذاك..
محمد...مؤيد كافي تحشيش علية...ولك اريد اموت..
مؤيد...على كيفك خوية تموت شنو؟...اذا الله قاسمها الك محد يكدر يفرقكم..
محمد...انت وين تحجي؟..آني متعجب على نفسي...جنت اضحك على الناس وهسة خالي صارت اسوء منهم...اريد الله يخلصني من هذا الشعور..
مؤيد... الله كريم...تخلص وتهون بس اصبر انت...يلا خلص الدوام خلينا نطلع...سيارتك بقت برا الجامعة اليوم خلي نشوفها خاف يصير شي..
محمد... بعد ما اهتم لا سيارة ولا فلوس... كلشي ما اريد غيرها..
مؤيد...ديلا كوم عبالك ام فاقدة ابنها... اخذته وطلعنا...كل مرة نطلع بطريق بين الحدايق يعني نطب حديقة ونطلع من حديقة...هذا طريقنا بس اني وياه هيج نسوي عادتنا من 3 اسنين...واحنا جاي نمشي بالحديقة قريبة من الشارع الخلفي مال الجامعة...سمعنا صوت بنات يصرخن...ما احس الا محمد يركض كدامي...ركضت وراه...
محمد...واني مهموم وخلك ما عندي...سمعت صوت بنات يصرخن...بدون تفكير ركضت على الصوت...بس تفاجئت باللي شفته...