الحلقة الثانية :
بصح نكرههم و مانسامحهمش و أنا خير منهم و خيرت نهنيهم من همي و نراهنكم أنهم ما حوسوش عليا خلاااااه .
لقاني راجل كبير نهار مطر و ريح الناس كامل في ديارها و لابسة قشها و أنا كنت عريان و حفيان و نرجف تحت المطر ...حن قلبو عليا و داني معاه ... "عمي الساسي" كان يخدم سراق و علمني كل شيء علمني نقرأ و ننجح و نكذب و نسرق و نولي راجل و نعول على روحي علمني معنى تمرض و عبد يسهر عليك يخاف عليك و يحبك أكثر من والديك ...
عمي الساسي العام كي لقاني كان عندو وليد خوه مات في أكسيدون و الصدفة قدي في العمر مابلغش على وفاتو و عشت طول عمري بالهوية تاعو ...قريت و كبرت و وليت راجل و درك عمري 17سنة عمي الساسي مرض و حبس الخدمة (السرقة ) و مابقالناش بواه نعيشو ...
كبرت و أنا نسمع في عمي الساسي يقول السرقة في السراق حلال و يقلي يا جهاد ولدي النهار الي تسرق ماتسرقش زوالي كيفك أسرق واحد يسرق في صوارد الزواولة و قعدت هدرتو في راسي دور ...
حتى جاء النهار الي قررت ندير أول سرقة كبيرة ليا ... ولازمني نخير عبد مشهور بالفساد تاعو و ماكلت مال الزواولة ...
جهاد : شوف لكن راح تضربك الخلعة غير قلي درك و ماتروحش معايا خلاااه ..
أمين : خسارة عليك شريكي رانا ليزوم ...
جهاد : بللللع قالك ليزوم و انت تشوف الدولة تخرى على روحك ....بصح المرة هذي مادير والو... أوقف في الباب تشوف واحد داخل بيبيلي ...فهمتي ؟؟
وصلنا لباب الدار تاع رئيس البلدية الي خلااااها و كلاها كل في كرشو وواحد ما خذا معاه لا حق لا باطل ظالم و حڨار و ناس البلدية كل شاهدين أنو عبد رخيس ...عسيت دارو حتى عرفت أنهم رايحين للعرس ستنيتهم يروحو و يرقدو ....طفاو الضواو و كانت الساعة 12تاع الليل دخلت بعد ما حليت الباب الصغير تاع الدار الي جاي على جنب أمين واقف يعس...و أنا كانت ليلة سعدي ... دخلت نحوس على صوارد ولا ذهب المهم الحاجة الغالية الي تسوى ... نشوف نلقى الكوفر تاع الذهب معبي و محطوط فوق طابلة في الصالون خرجو عينيا من راسي و أنا نشوف في هذاك الذهب كل ...هزيتو و أنا طاير بالفرحة جيت خارج حتى نتلاقى طفلة صغيرة هي تشوف و أنا نشوف معاها ترسمت صورة هذوك العينين في مخي جات تحل فمها تعيط ضربتها بحاشية الكوفر طاحت و خليتها في نص دمها غارقة خرجت نجري كنت هاز في يدي قيمة مليار ذهب بصح عقلي خليتو في الدار عند الطفيلة الصغيرة هذيك ...
الحلقة الثالثة :
أمين : واش عملتي ؟؟
جهاد : والو هيا نروحو ...
أمين : واش فيه ؟؟
جهاد : فارغ حسبتو فيه بصح لقيتو فارغ ..
أمين : هات نشوف ...
جهاد : نحي رب يدك روح قود عليا روح تروح قتلك فارغ ...كنت رايح للدار و الخلعة في قلبي نكون قتلتها ؟؟
عمي الساسي : جهاااااد هذا أنت ؟؟
جهاد : هيه أنا ...
عمي الساسي : ڨدم عندي واش بيك واقف في الظلمة ؟؟
دخلت عندو ووجهي يمد الخبر ....كنت نرجف و هاز الساشي الأكحل هذاك الي في نصو الكوفر و نخبي فيه من وراء ظهري ...
عمي الساسي : واش بيك بسم الله الرحمان الرحيم تقول قاتل روح ...؟؟ وواش في يدك ؟؟
ماحسيتش بروحي كيفاه تربعت في الأرض و حطيت يديا فوق راسي و بديت نبكي ...قتلتها ....
و الدقيقة هذيك عمي الساسي تنطر من بلاصتو وقف و حكمني بيد وحدة و لصقني مع الحيط (ماقلتلكمش عمي الساسي راجل ضخم و كي تشوفو من بعيد تخاف ) شكون قتلتي ...
جهاد : والله ماقصدت والله غلطة ماعلاباليش إذا ماتت ولا لا والله موش بالعاني ....
فهمني يلعن والديك واش عملتي وواش الي في يدك ...نحالي الساشي من يدي و فتحها و صرالو ماصرالي كي شاف الذهب هذاك كل ....منين جبتيه ؟؟
جهاد : سرق بيت المير و قتلت بنتو....
والله هي الي جات في طريقي ضربتها للراس و خليتها في دمها و خرجت ...
عمي الساسي : بالشوي أحكيلي ...ماتت ؟؟
جهاد : ماعلاباليش ضربتها بالكوفر للراس المهم خليتها طايحة في الأرض و ماتحركتش خلااااه ...
عمي الساسي : أسمعني مليح و حل عينيك ووذنيك مليح مليح ... أنا الي سرقت و أنا الي ضربت و أنا كل شيء ...هذا إذا حكمونا هيا لم حوايجك نروحو ...
جهاد : بصح وين ؟
عمي الساسي : أمشي قدامي و أربط فمك كبرتي و عدتي دير في رايك و ما تخبرنيش في الطريق نتفاهمو .... +kao_risa الحلقة الرابعة :
لميت شوي قش و شوي حوايج حطيناهم في المازدا و مشينا أنا و عمي الساسي كانت طريق طويلة عمي الساسي الي طول عمرو يقول هنا يموت قاسي هجر دارو و حبابو و صحابو على خاتري .... وصلنا للحدود التونسية و بما أنو عمي سراق كبير يعرف الناس في كل مكان و يعرف المهربين ....تفاهم مع واحد يهربلو شوي حوايج من بينهم الفور الي حط فيه الذهب هذاك كل و قفل عليه من غير ما يحلب المهرب كان الفجر كي وصلنا للديوانا باه نخرجو لتونس ... فاتت الإجراءات سلامات و خرجنا ...وصلنا لتونس العاصمة تلاقينا بالمهرب مدلنا الحوايج و مشينا ..وصلنا قدام دار تبان في قلب تونس العاصمة كبيرة و قديمة جبد عمي الساسي مفتاح من جيبو و فتح الباب و بقيت حاير ...
جهاد : تاع شكون الدار ؟
الساسي : تاعي ...
دخلت معاه و أنا ساكت خاتر كان قلقان مني و يهدر معايا كلمة و مايزيدش ...
الدار تبان قديمة و عندها سنين مافتحها حتى حد من طبقات الغبار الي نازل .....طلعنا لبيت لفوق نفضنا الغبرة شوي شوي و كانت العشرة تاع النهار عمي الساسي غطى على راسو و رقد و أنا مازالت خزرت العينين الزرق هذوك بين عينيا ندمت أني دخلتها الدار هذيك ....بقيت طالع و هابط في الدار و نشوف في تصاور بزاف عباد و كلهم أبيض و أكحل و مافهمت فيها حتى شيء تاع شكون الدار هي ؟؟....تقلبت هك و هك و ماجانيش النوم نستنى في عمي الساسي ينوض يفهمني واش راح نعملو و كيفاه راح تكمل الحكاية هذي ...
ناض عمي الساسي مع العشية ...
جهاد : فهمني ماتخلنيش كيما هك علابالي غلطت علابالي ماشاوتكش بصح .ً....مابقالناش بواه نعيشو و المير يستاهل السرقة و كثر ....
الساسي : راح نبقاو هنا عايشين حتى تفض حكاية الذهب الي سرقتيه و تبان الطفلة حية ولا ميتة ....
في دزاير ..(ليلة السرقة )
الو الإسعاف بنتي ضربوها على راسها و دايخة ...
مرت المير :ياااااه نندب وجهي ذهبي ذهبي كل شيء راح كل شيء سرقوه آآآ (داخت )
وصلت الإسعاف و هزت مرت المير و بنتها ...وصلوهم للسبيطار و عملولهم الإسعافات اللازمة ..
أنت تقرأ
#سرق-منزلي-ثم-سرق-قلبي
Fiksi Remaja.# #فرنديقاتي-فرندقائي ......والعودة من جدييييد لكتابة الكرونيييييك #safa--------* نعمممم انها كرووونيك دزيرية مشوووقة مممتعة هاااايلة يعني اقل مايقاااال عنها تحفة قصصية كرونيكية عشقية درامية اربطوووا احزمتكم و حطو جام وكمنتار مكاش تفاعل والله منح...
