وصفات طبخ سريعة

بيتزا سهلة

سلام البنات مهم بمناسبة رمضان المبارك غادي نبقا نحطلكم كل مرة وصفة ساهلة ولذيذة ونتمنا تجربوها وتردو عليا
#على بركة الله نبداو حم حم😜
*المقادير:
العجين:
250غ فرينة فورص (دقيق صافي) (او زلافة)
2معالق كبيرة زيت الزيتون
1كنور(ضامة البنة)
1ملعقة كبيرة خميرة الخبز (العادية)
ملح (حسب الخليط)
ماء دافئ للعجن
الحشوة:
2 حبات بصل مقطعين بالطول رقاق
2 حبات فلفل حلو مقطعين رقاق بالطول
1حبة طماطم مفرومة
صدر الدجاج مقطع مكعبات اوشرائح(تقدري تعوضي بأي شيء بغيتيه)
ملح
ابزار (فلفل اسود)
كركم( خرقوم بلدي)
زيت نباتية
فرماج (جبن مبشور) محكوك اي نوع بغيتو(انا كنديرها بالفرماج الاحمر ولا لبلوك لافاشكيري)
صلصة الطماطم:
2حبات طماطم محكوكين
نصف كنورة(ضامة البنة او مكعب مرق)
ملح
ابزار
خرقوم(كركم)
زيت
زعتر محكوك باليدين
*طريقة التحضير:
في قصرية نحط الطحين مخلط مع الملح والزيت ونضيفو كنور والخمارة بعدما نكونو ذوبناهم في الماء ونخلط العجينة بالماءالدافي حتى تتجمع ونخليوها ترتاح حتى تخمر شوية من15min حتى 20min ومن بعد ناخدوها وندلكوها شوية باش يخرج منها الهوى ونبسطها في صينية الفرن ونتقبوها بالفورشيط باش ماتنفخش ونطيبوها نصف طيبة
نشحر البصل والفلفل مع الملح والزيت مزيان حتى يطيبو ونزيد عليعم الابزار والكركم والمطيشة المحكوكة ونخليوهم شوية فوق النار ونطفي من بعد
نشحر صدر الدجاج حتى هو فالزيت والملح ولابزار
ومن بعد نشدو البيتزا ديالنا وندهنوها بالصوص بعدما نكونو طيبناها ونرشو نص الفرماج ومن بعد نزيدو الفلفل والبصلة وكذلك صدر الدجاج. نرشو شوية زعتر محكوك باليد (اختياري) ونعاودو نرشو نص الفرماج الباقي وندخلوها للفرن
وبصحة والراحة جربوها وردو عليا وتفاعلو معايا وعطيوني رأيكم فالوصفة