انا يا ابن ادم ابن ادم
بية حنية حمامة وبية من الهور شمرة
وحتلوا نشفوا گلبي وشيعوا جرفين روحي بكل بلم تلگالي ذكرى
الگصبة لمن فارگتني الوادم يسموهه ناي
وهيه من فراگي حسرة
وانت يابن ادم ابن ادم
بيك من الله السوالف كلهه طيبة وكلهه شوگ وكلهه فطرة
وبيك فرحة گلب جاهل جابله واحد هدية بيوم عيد واهله فقره
وبيك ريحة مستحة امي ولون ماشايفته عيني
ريحتك لونك شفتهن خبزة سمرة
وانت تدري وانا ادري
انا وانت وانت وانا
عشنا دنيا شطولهه ومرت ثواني
بس شسوي لابخت روحي لگاك ولا بخت روحك لگاني
وانت تدري وانا ادري
الصاحب الينكرله موقف ماله صاحب
واليخون بصاحبه عيب يتعاتب
والملح والزاد شارة
الخانهن باجر تعثره
وحتى لو عذروا اهلهن رب اهلهن مايعذره
والمهم والاهم ندري
شما كبر بحر الحزن لازم نعبره
وندري بالدنيا حلمنا شما كبر لازم تصغره
وحتى لو صارلنا واهس
لازم الدنيا تكسره
وما اگلك غير شكرا
والف شكرا
شفت وياك الصدگ تسمى عشرة
