انتبهت ع غسان صافن باوعت وين صافن لكيته صافن على رنده طالعه من الحمام جنها لعابه بيضه حيل وخدودها حمر وشفايفها حمر وشعرها مبلل سرح مي اشقر وبيه خصلات ذهبي هي من الله هيج جان جمالها شايله جمال التركمان على بيبي ام امي ..وهي ممنتبه على غسان وطالعه تنشف بشعرها وتدندن طبعا هي دلوعه البيت الكل يموت عليها واني احبها حيل اختي الصغيره اعتبرها جزء من امي
مكان تفكيري بيه حقد وكراهيه لاختي لان غسان صفن عليها وعلى جمالها لان هذا الطبيعي اختي كلمن يشوفها يصفن عليها هالصفنه وهوايه هوايه خطبوها بس اهلي كانو يرفضون بحجه صغيره الاان عمتي اخت ابويه مزوجه بالكويت اجتلنا زياره وتخبلت على رنده وحجزتها لابنها
وبابا ميكدر يكول لاخته لا لان يحبها وكال هذي عمتها راح تخاف عليها ومتأذيها ومتخلي احد يأذيها..
صاحها ياسر رنود تعالي حبيبي سلمي ..
اجتي رنده تسلم وغسان مشال عينه عليها هي تسولف وهومندمج وياها حيل
وانتبهت عليها هي تسولف وتضحك واني لحد هسه كلمتين ماعرف احجيهم كدام غسان
رنده كلشي تريده يصير الها بابا يحبها بشكل خاص وهي متعلقه بيه بهالاثناء ماما كانت المفروض تبدل دم فراحت يسرى وياها للمستشفى وبابا وياسر وغسان راح وياهم
شفت اخوات غسان حابين رنده اكثر مني هم ماضجت لان هي اجتماعيه حيل وتعرف تحجي وتكسب الناس اني بقيت وي ام غسان اساعدها لان ماعرف اختلط بيهم
اجتلي رنده شافتني كاعده بالحديقه كالت الي نور غسان حيل محبوب شنو رأيج انتي ؟😒
كتلها هو طبعه هيج وي الكل تره يشاقه ويسولف جان تكلي بس اني حسيته نظراته مختلفه اليه اني اعرف الي يعجب بيه
كتلها ماعرف !
ظلت رنده تسألني عنه واني صدك ماعرف عنه شي حاولت اتهرب منها بس هي متعلقه بيه ماكدر اتركها
كتلها تعالي خل نصلي وندعي لماما يكومها بالسلامه
رحنا صلينا واندعينا لامنا
شويه واجه غسان وكال انو امي ح تضل بالمستشفى كم يوم لان محتاجه لتحاليل
وبقينا بيت ابوغسان شفت غسان بهاليومين حيل مهتم برنده يجيب الها مجلات مال ازياء لان هي تهتم حيل بمظهرها ولبسها غسان كام ميشوفني كأنو انعمى عن وجودي ..
غسان اني جنت راجع لبيتنا واليوم ياسر يجيب باقي اهله ليمنا فرجعت البيت وعرفت انو الحمام مشغول داسولف وي غسان ومندمج وماشوف الا كأنو حوريه طالعه من الحمام تدندن وشعرها السرح الذهبي نازل على وجهها مبلل منظرها طفولي بجمال يفتن اي شخص جذبتني الها ارتبكت ماعرف شصار بيه ومن اجت تسولف وتدلع وي اخوها
جانت مزيج من طفوله على انوثه على رقه ودلع كلشي بيها حلو
صرت انسى كلشي بحضورها وصرت احب كعده البيت علمودها
وجبت الها مجلات ازياء لان هي تهتم بناحيه المظهر وجدا انيقه
راحت ام غسان وبقوها كم يوم علمود التحاليل واني استغليت الفرصه حت اكون وي اميرتي ..
اي اميرتي دلعتها بيني وبين نفسي
نور.. اهتمام غسان برنده الكل بده يلاحظه كثرت كعداتهم وي بعض واني دائما عازله نفسي
مره من المرات جنه كاعدين العصريه واجوي بيت عمة غسان وياهم بناتهم وبناتهم هم مقاصرات بالجمال بس كانت طريقه كلامهم مو مثقفين ابدا .
كانت عمه غسان تحب غسان حيل وعرفت انو هاديه بتها اله وهو يكول اني معتبرها مثل اختي وممفكر بالزواج وجان وياهم ابنهم عينه موحلوه وين ماروح يذبلي حجي وغزل واني مانطي مجال لهالتصرفات مااحبها
بنات عمة غسان تخبلو من شافو غسان مهتم برنده اساميهن عذراء وحنان واخوهم اسمه حسين
كامن حجن وي حسين يردنه يضايق رنده بس حسين يحترم غسان ويخاف منه لان يعرفه ميقبل بهالامور
اني صدفه ودافوت للمطبخ اسمعهن يحجن براسه لك شوف رنده شون جمال واناقه تخبل ليش متحاول وياها يمكن تقبل بيك وتخطبها كال الهم مستحيل غسان حاط عينه عليها وكالي هذي ح تكون زوجتي المستقبليه واني حاط عيني على نور عاجبتني اني من سمعت هيج طكيت بجي
اني ماعرف شنو معنى حب
دخلت للحمام فتحت الدوش حت ميسمعوني من ابجي
وكمت ابجي بعلو صوتي متحملت حاسه بوجع بگلبي كلش قوي معقوله احبه لغسان وهذا هوالحب
سبحت وطلعت من الحمام ومبين عليه التعب كتلها لخاله ام غسان اني رايحه انام واني دافوت اصعد لفوك اسمع ضحك غسان ورنده وبقيت اكول لنفسي اني يمكن لو بجمال رنده جان حبني غسان بس هالشي موذنبي
كعدت صليت ودعيت الله انو يهديني ويصبرني ويسويلي الاصلح الي
حاولت انام معرفت حسيت نفسي بردانه تغطيت مع انو الدنيا صيف وحر
ورا شويه اجتي رنده شافتني صايره نار اهلي متعودين عليه من اصخن اكوم اهذي
لانو اني بيه تيفو علطول يروح ويجي كل سنه وقلبي ضعيف مااتحمل ودائما انشمر من الصخونه
وماما جانت تخاف عليه حيل حتى متخليني اداوم بالمدرسه هوايه ومفهمه المدرسات مالتي انو يديرون بالهم عليه لان اوكع بأي لحظه وخاصه اذا خفت او انقهرت
خطيه لكيت رنده كاعده يمي واسويلي كمادات من الصخونه وغسان جايبلي علاج ومخبوصين بيه
بس رنده تعرف شنو علاجي فدارت بالها عليه حيل وماتركتني ولالحظه
..
يتبع ...
