أحمد.. صارت دنيا ليل وانة لو يذبحوني مايلكون قطرة دم بية خايف لا شكي يطلع صح وخاطفيهة مشيت شوية لكدام ضليت اصيح بصوت عالي شفت اضوية كلت بلكي هي هناك رحت شفتة بيت دكيت لباب وطلعتلي مرة جبيرة بالعمر .... سلام عليكم
هلا بوليدي وعليكم سلام
أحمد.. يمة اسالج سؤال شفتي بنية شابة شوية ضعيفة محجبة
أي يمة غير تقصد هاي لبنية أدخل شوفهة
أحمد.. دخلت للبيت شفت ريناد نايمة رحت ركض عليهة وحضنتهة والله كلبي راد يطلع من مكانة من مالكيتهة بالسيارة انسطرت.... خالة وين لكيتيهة
والله يايمة هي اجتي ودخلت لبيت من طلعتلهة كامت تعيط وخربت
ريناد.. بديت اصحصح شفت أحمد يم رأسي دفعتة بسرعة وكمت عبالي جاي أتخيل
أحمد.. ريناد أهدي أهدي شبيج لا تخافين انة يمج
ريناد..كعدت بالكاع كمت ابجي لن ليوم لشفتة ولخوف لي اكلتة طير نص عمري لحد هسة لخوف ولرجفة بية اجة أحمد حضني وأني اشهك وابجي من كل كلبي عبالي عافني وراح حتى كمت اهلوس من لخوف
أحمد.. كافي لا تبجين انة يمج ماعوفج والله
ريناد.. بجيت لحد ما أحمد هداني اجتي هاي لمرة مسويتلنة أكل
تعالوا يمة انتو أكيد جعتو تعالوا أكلوا
أحمد.. تسلمين والله ما عرف شلون اشكرج تعبناج ليوم
لا يمة شنهو لحجي لمساعدة لله وانتو يمة مبين ضيعتوا طريقكم
أحمد.. تسلمين خالة بس سؤال انتي ليش عايشة بهيج مكان وليش وحدج
لا يمة انة ماجنت وحدي جنت انة وأبو حسام وأبني حسام وهذا لبستان النة وعايشين بهيج لمنطقة لكدام
أحمد.. جا وينهم
أم حسام.. والله يايمة عمك بالحرب مال إيران انكتل وحسام جان وياا لجيش واستشهد وهاي انة ضليت وحدي ماتحملت ابقة بالمنطقة واجيت هينة
ريناد.. من صدك انقهرت عليهة خطية عايشة وحدهة
أحمد.. الله يرحمهم
ام حسام.. وهسة انتو تحجو جابكم هينة وليش هيج حالتكم
أحمد.. صدك تعالي انة مو كتلج لا تنزلين من لسيارة شنزلج وجابج هينة
ريناد.. حجيتلهم كلشي وشلون نزلت وضيعت لطريق أحمد من كتلة كام يرزل بية والله لما ام حسام كاعدة إلا ابجي من ورة لرزالة مالتة لن جنت واثقة راح احصل رزالة أو كتلة
ام حسام.. يلة ما صار شي انة أعتقد مزوجين جديد انتو موو
أحمد.. اي خالة جديد
ام حسام.. جا الله يوفقكم يمة ويرزقكم بولد الصالح
ريناد.. من كالت يرزقكم بولد باوعت على أحمد أبتسم ونزل راسة
