لعنة امي (باللهجة الجزائرية)

البارت7

العشرة في الليل لحق الاجتماع تلميت مع الموظفين كامل ونضحكو ونتمسخرو جا فايت هبط راسو لتحت لحق لوذني قالي اكي تعرفي بلاصتك ودخل دخلنا وراه قعدنا في الكراسا كان يشوف فيا نظرة احتقار وغل اكيد بغا يستولي على كلش وعمتو تقول غير هو الي مايطمعش فيا مبينلهاش برك قالنا حال لوتال راه ميعجبش ماشي كيما افي بال ناس اخرين راح ندخلو شريك ثالث امول اللوتيل ونطورو فيه جيت نهدر قال ماش اي واحد يهدر وجبد كرسيه وقف وخرج لحقت عليه لبرا قتلو هبلت ادخلنا شريك بلا ما تشاورني كيلني مليح وراح قتلو نقدر انا نمول لوتال ونكبرو دار ليا وقالي على شكون لعبتي مرة اخرى وانا نقول وين كنتي غاطسة غاضني الحال بصح بلعتها وسكتت قلت صفاء الضعيفة ماتت ولازم تخلق واحدة قاوية المشاعر مالازمش تتحكم فيا وهدرة الناس اخر حاجة تهمني ونفكر فيها منة اليوم
دخل لبيرو الحسابات دخلت وراه قتلو دراهم هاذو خلاتهملي عمتك ربي يرحمها هوما من حقي بصح راح نحاول نحققلها حلمها وانت خمم كيما بغيت قالي وزيد من فوق تسرقي ياويييلي منك ياربي واش من شريكة صابني بيها فاتو ايام طورنا شوية في الاوتال وبالمدخول زدنا طورنا اكثر وزدنا حمامات سباحة وملاهي وجاء يوم التدشين لبست روبة سواري في الاحمر طويلة مع الخمار اسود وكانت مفصلة ودرت ماكياج فونصي على الاخر بدات حفلة التدشين هبطت لقيت كل الموظفين لهيه حاضرين رحت قعدت مع ليندا وهارون علابالي فسدت قعدتهم بصح غير هوما الي جاو في طريقي قعدت ندور بعينيا نحوس على شوقي لمحت واقف مع زوج اصحابو امبعد جابهم ليا قالهم نعرفكم على شريكتي صفاء رحبت بيهم واحد منهم اسمو محمد طبيب عيون ماشاء الله طويل واسمر وباهي بزاف سهرة كاملة وهو لاصق فيا عينيك اهبلو عينيك يسحرو عينيك ذوبوني هههه طبعا طبيب عيون في واه راح يهدر وزاد فيا غير العينين خضورا مالقا مايشكر ههههه
كنت نشوف في شوقي يشرب ويزيد قلت في قلبي وزاد سكير فوق الغرور نتاعو وفات الحفلة والكل روح محمد عطاني نمروه وقالي تقدري تتصلي وقت ماتحبي وخرج جيت طالعة لفوق لبيتي وقفلي في الطريق قالي واش اللا زدتي لقيتي فريسة جديدة مفوتيش الفرصة جيت فايتة جبدني ليه وقالي مادام تبيعي روحك هاني هنا واش ممليتلكش عينك عطيتو كف وهربت قفلت الباب وهو قعد يخبط ويعاود جاء ليه هارون وموسى هزوه لبيتو وهو يعيط ويسب فيا وانا نبكي رحت نجري فتحت لقجر شربت زوج حبات دوا ورقدت نضت راسي ثقيل وعينيا عييت نفتحهم حليتهم لقيت ليندا بحذايا قاتلي يابنتي واش بيك من البارح في الليل راقدة وضرك راهي 5 نتاع لعشية سي شوقي اتخلع عليك امبعد كي لقا اباطة الدواء عرف بلي راقدة برك ضحكت بقهرة شوقي يخمم ويتخلع بركاي من الخرطي دخلت دوشت واهبطت ناكل حاجة قتلني الشر لقيتو لتحت قالي نقدر نحكي معاك قتلو علاه قفلتلك فمك قالي اسف خزرت فيه مستغربة قالي والله منيش امالف نشرب مكنتش فايق بروحي قتلو معليش صار خير واحنا نحكيو طب يدخل طبيب العيون ههههه صفاء لباس وجهك اصفر غير الخير قالو شوقي انت طبيب عيون واش راحلك في وجهها ضحك وجا قعد بحذايا قالي انا ثاني جيعان ناكل ومنو نونسك شوقي حسيتو الغاز طلعلو للراس خبط الباب وخرج وبعثلي ليندا تقعد معانا هههههه