الجزء الاول من (سلسله اوراح عاشقه) حوريه قلبى

12

بسم الله الرحمن الرحيم
لا تدع القراءه تلهيك عن الصلاه
الفصل الثانى عشر
________________________________________
فى اليوم التالى
فى غرفة حوريه
كانت حوريه تجلس على المقعد المواجه للمرآه وكانت نورهان تقف خلفها وتقوم بترتيب شعر حوريه بينما يجلس ايمن على الفراش يراقبهم
نورهان:وهى تنهى عملها :انا كدا خلصت ايه رأيك بقى
حوريه:وهى تحرك رأسها للجانبين:الله يا نورهان تسلم ايدك بقى جميل اوى
نورهان:انتى اللى جميله علشان كدا القصه بقت حلوه عليكى...دا ادم هيتجنن لما يشوفك
حوريه:بخجل:بقى كدا ماشى يا نورهان
ابتسمت نورهان لها وقالت
نورهان:انتى مكسوفه منى ولا ايه ..ولا فاكره انى مش واخده بالى من نظرات ادم ليكى دا بيبقى كأنه هيأكلك بعنيه
خجلت حوريه اكثر من حديث نورهان ونظرت أرضا بينما هبط ايمن من الفراش واتجه إلى حوريه وهو يقول
ايمن:انتى شكلك حلو اوى يا حوريه …
حوريه:وهى تقبله:شكرا يا ايمن انتى اللى عنيك حلوه يا حبيبى
ابتسم لها ايمن واحتضانها فبادلته الاحتضان وهى تقول
حوريه:ايه رأيك نروح نقول لفتحيه تعملنا ايس كريم
ايمن:بسعاده:بجد يلا بينا بسرعه
حوريه:هههههه حاضر يلا بينا
________________________________________
فى فيلا احمد
كان أحمد يجلس مع جلال يتحدثون
احمد:بس هو ده كل اللى حصل بس الحمد لله اطمنت عليها
جلال:الحمد لله ...المهم دلوقتى هى العصابه مكلمتكش تانى
احمد:لا كلمتنى امبارح بالليل وطبعا انا فهمتهم انى خايف على اختى وانى خايف منهم ذى ما اتفقنا
جلال:كويس اوى ...طلبوا منك ايه
احمد:طلبوا منى خمسه مليون دولار على شنطتين
جلال:انا مستغرب ازاى تكون جنه مش معاهم ولغاية دلوقتى بيطلبوا منك الفديه
احمد:ما انا بردوا مستغرب لانى لو نفذت ليهم كلامهم هيرجعولى جنه ازاى وهى مش معاهم اصلا
جلال:عارف الموضوع ده ليه تفسير واحد عارف هو ايه
احمد:ايه
جلال:انهم مكانوش هيرجعولك جنه اصلا ….دا معنى كلامهم
احمد:وهو يحرك أصابعه فى شعره:تفتكر ...الحمد لله ان جنه هربت منهم وأنها دلوقتى فى أمان بعيد عنهم
جلال:ربنا يستر وحمزه يعرف يقبض عليهم وانت بتسلمهم الفلوس لأنهم طول ما هما بعيد عننا جنه فى خطر
احمد:ربنا يستر …
________________________________________
فى الشركه
كان محمود يجلس مع فؤاد فى مكتبه يتحدثون عندما دلف ادم الى داخل الغرفه
فؤاد:تعالى يا ادم عملت ايه فى ورق الصفقه الجديده
ادم:خلصت مراجعة الورق وانا شايف أن الشركه دى ورقها كله سليم
محمود:يبقى تمام توكل على الله يا بابا وكلم مدير الشركه وحدد معاه معاد علشان نمضى العقود
فؤاد:تمام ...وانت يا محمود عملت ايه فى موضع السكرتيره بتاعتك
محمود:والله تهانى بتقول انها قدامها لسه شهرين وتولد وفى الوقت اللى فاضل ده انا هعمل اعلان اطلب فيه سكرتيره جديده وتبقى تهانى تعلمها كل الشغل قبل ما تمشى
ادم:اهم حاجه تكون عندها خبره علشان احنا الشغل عندنا مفيهوش هزار
محمود:ايوه طبعا
فؤاد:تمام ...وانت يا ادم مش ناوى ترجع البيت بقى مش كفايه كدا
ادم:لو سمحت يا بابا انا مرتاح كدا
فؤاد:طيب ونروهان اللى عيد ميلادها اخر الاسبوع دى هتفضل بردوا قاعده معاك
ادم:انا مش مانعها من أنها تمشى يا بابا هى قاعده معانا بمزاجها ولو على عيد ميلادها اكيد كلنا هنحضر يعنى
فؤاد:والله انا احترت فيك على العموم اللى انت عايزه اعمله
________________________________________
فى شقة ادم
عاد ادم من الخارج وجد أن الشقه هاد ئه فعلم أن الجميع نائمون فأتجه ببطء إلى غرفة المعيشه فوجد حوريه مستلقيه بهدوء على المقعد الموجود امام التلفاز يبدوا أنها ذهبت فى النوم وهى تشاهد التلفاز فأقترب منها وعلى وجهه ابتسامه هادئه وجلس أمامها أرضا فلاحظ شعرها الذى التف على وجهها بشكل هادى فرفع بأصابعه خصله من شعرها واقترب منها ليستنشقها وفى هذا الوقت فتحت حوريه عينيها وجدت ادم الذى ينظر اليها بحب ومازال ممسك بخصلات شعرها فأعتدلت بخجل بينما ابتعد عنها ادم ببطء وهو يقول
ادم:ايه اللى نيمك هنا ..رقبتك كدا توجعك
حوريه:معلش اصلى كنت يتفرج على التلفزيون وعينيا راحت فى النوم حمد الله على السلامه
ادم:بأبتسامه:الله يسلمك ...ايه الجمال ده شعرك بقى حلو اوى
حوريه:وهى تتلمس خصلاتها بخجل:نورهان هى اللى قصت شعرى كدا قالت إنه كدا احلى
ادم؛بحب:انتى جميله فى كل حالاتك …وحشتنى اوى
خجلت حوريه من نظراته وحاولت تغيير مجرى الحديث فقالت
حوريه:على فكره فتحيه استأذنت انها متجيش بكره علشان ابنها تعبان شويه وانا قولتلها ماشى معلش مكنش ينفع تفصل مستنياك علشان استأذن منك 
ادم:تمام...انا وانتى واحد متفرقش استأذنت من مين فينا
حوريه:وهى تقف:روح غير هدومك وانا هحضرلك العشاء...هى فتحيه مجهزاه فاضل بس أنه يتسخن
ادم:تمام انا موافق بس لو هتأكلى معايا
حوريه:بخجل:حاضر ..روح بس انت غير هدومك
ادم:حاضر ...بعد اذنك
اتجه ادم إلى غرفته وهو يشعر أن قلبه ملىء بالسعاده وأخرج من سترته الخاتم الذى سيهديه لحوريه عندما يطلب منها الزواج وقبله ووضعه مره اخرى فى سترته وهو يفكر أنه سيتقدم اليها عندما يعود غدا من زيارته لاحمد
________________________________________
فى اليوم التالى
فى فيلا كريم
كان كريم يجلس فى الحديقة عندما تقدم منه يحيى وهو يقول
يحيى:هاه رجالتك عملوا ايه فى موضوع البت
كريم:متقلقش دول راحوا يجيبوها دلوقتى كلها نص ساعه ويكونوا هنا
يحيى:المره دى مش عايزين غلطات اول ما البت تيجى تكلم اخوها تسمعه صوتها واول ما يتطمن ويحدد معاك معاد علشان نستلم الفلوس تقتلها فاهم ولا لا
كريم؛فاهم طبعا دول خمسه مليون مش لعبه علشان نسيب البت دى تبوظ  كل حاجه لو افتكرت
يحيى:عندك حق هى لو مكانتش شافتنا كان زمانها رجعت لاخوها سليمه بس بنت الكلب عرفت احنا مين ولو افتكرت هتقول لاخوها علينا ووقتها مش هنخسر الفلوس وبس لا هنخسر الفلوس و الشراكه اللى بينا وبين اخوها وهندخل السجن
كريم:يبقى ذى ما اتفقنا لازم البت دى تموت
يحيى:ايوه لازم تموت
________________________________________
فى شقة ادم
كانت حوريه تجلس فى الشقه تنتظر عودة نورهان وايمن من الخارج عندما سمعت اصوات بالقرب من باب الشقه وقبل أن تقف كسر الباب واقتحم الشقه ثلاث رجال ضخام الجثه ملثمين ... صرخت حوريه برعب وركضت بأتجاه غرفتها وحاولت إغلاق باب الغرفه عليها ولكنهم اقتحموا الغرفه وقام أحدهم بحملها على كتفه على الرغم من صراخها ومقاومتها وقام الآخر بحقنها فى رقبتها فخفتت مقاومتها وغابت عن الوعى واتجهوا بها إلى الخارج ليهبطوا  بها إلى أسفل المبنى السكنى ويضعوها فى السياره لتنطلق بهم مبتعده

________________________________________