الغوغاء ....16 ...الاخير ...
بقلم ليلان العطواني ...
صعدت ويه جابر ابن حجي صويح وعفت زهوره تركض وراي وتصيح يمه اخذيني وياج ...
جنت مشدوهه كل فكري شلون اوصل المكان الانفجار واشوف مالك
جابر جان يسوق حيل بس يريد يلحك ابنه هم يشتغل بالسوك بس لهناك بسوك المخضر ...
وصلنا الشرطه والجيش ماخلونه ندخل بالسياره ..
نزلت وركضت كل حيلي وصيح يمه مالك وينك ...ياسامعين الصوت من شاف ابني ...
محد يرد عليه كلمن حاير يدور على مرته لو اخته لو ابنه لو اخوه لو ابوه
بقيت مرعوبه من المنظر الشفته جثث بكل مكان وحتى من ترفع راسك تشوف جثث مكطعه فوك عمود الكهرباء ...
انعميت وبعد ما اشوف ودخت وصرت حايره شلون بيه كعدت افرفح والطم بكل مكان مالك ماكو ..
اجاني شرطي سالني شبيج خويه
كتله وليدي يشتغل هنا ويه هذا ابو المحل ادور عليه ماكو ...
كال خويه خاف اخذوه للمستشفى روحي دوري هناك شالوا هواي بسيارات الاسعاف ...
كوه شديت حيلي ورحت افتر ادور سياره حتى توصلني للمستشفى ماكو
شفت رجال عنده تكسي واكف بعيد ويباوع رحت علي انتخيته ...خويه يابعد اختك بس وصلني للمشفي
الرجال ما قصر من شافني ملهوفه صعدني وطار بيه للمستشفى ..
من وصلت الرجال كال خويه ما اريد كروه شوفي ابنج وين ...
دخلت للمستشفى امشي حافي ما ادري بروحي ..
الا شويه ساحكتني الاسعاف ..من كد ما مشدوهه كمت اشوف كل الناس مالك ...
دخلت ع الطوارئ شفت موته بكل مكان بقيت ادور بنصهم على مالك جثه جثه ما دورت بنص المصاويب كأنما القدر يسوكني بس ع الموته ووصلت على ممر ...شفت شاب نايم ع السديه وبس ايده طالعه من الجرجف ...عرفته من المحبس اللابسه بايده اليمنى..
كشفت الجرجف شفت مالك سابح بدمه متمدد مضروب بصده ضربه جبيره ...
تخبلت من شفته صحت شكيت ثوبي شبكته ...ولك مالك اكعد
ولك يمه هاي مو نومتك هاي
ولك مو محله تعوفني وتروح ...ولك منو الي منو لاختك ..خويه يمه وليدي بس حاجيني ...ولك لاتعوفني ولك بيك شديت ظهري ..
ولك انه بنص عصابه لاتعوفني ..يمه من امده الموت الخذاك ...ياحريمة شبابك ياخويه ...ربي ليش هيج اخذت هالوحيد مني ...اجو المضمدين وخروني عنه وطلعوني ..
اجاني جابر ..اخذني هو وابنه كال خويه انتي كويه شدي حيلج ..
وتعاي ارجعي للبيت ...صحت ما اعوفه اخذه وياي ...كالي يمه سويلي سمج غده ...ولك مالك لاتعوفني ...
اخذني جابر رجعني للبيت وانه اصيح وفاقده دخلت صيحت ولميت الناس لاخليت شعر ولا خدود ...النساوين تريد تسكتني زهوره ماعت روحه ..
لليل ووحشة الليل اباوع لفراشه ما نزل من البوفيه بقه بمكانه ...
انام وافز اصيح مالك تعال ليه ولك المن عفتني خويه ...
ثاني يوم نعمه وازلام المنطقه استلموه هو وكم شهيد وياه ...جابوه ملفوف بالعلم دخلوه للبيت جانوا رابطين التابوت بحبل ما خلوني افتحه شبكت التابوت ردت افتحه ما كدرت نمت نيوم عليه رادوا يوخروني ماكدروا ...زهوره وكعت بالكاع ...
شالوا التابوت وانه النسوان لازماتني
حطوه بالسياره فلتت روحي وصعدت فوك السياره ونمت ع التابوت رادوا ينولوني ماخليتهم صحت اروح وياه ماعوفه ينام جوه التراب ...انام وياه ...
بس بهتت روحي وطحت بالكاع ..من رجعتلي واعيتي عرفت ماخذينه ورايحين ...
الدك واللطم مايرجع عزيز ولا يرجع احباب لطمت لطم كل ضربه بجسمي احسها كسرت عظم وبالاخص من صاحت الملايه ..حلوه ركبته بالعلم مطويه ...كطعت روحي تكطيع ...
خلصت الفاتحه ووره سبع تيام كفت الناس حاله وكلمن احتار بامره ..
دخل عليه واحد معمم شيخ والمحابس والسبحه بايده ..
لنه ينعى ويبجي باوعت عليه ..يااا من دهر فرك مسلم ...يااا ولك من حفظه الله صرحت ويه اية الله ...جهشت روحي ركضت عليه طردته بالشارع وضربته بطابوكه وصحت وراه انعل ابوك لابو اللبسك عمامه ياخايس انت وامثالك كتلتوا مالك صرت اصيح على زعاطيط المنطقه لميتهم كتلهم حاربوا طابوك هذا المنافق ...
هو من شافنه ركضنا وراه اخذ سيارته وفلت ...
زهوره تكسرت نفسيها ولابقه بيها حيل ...عافت الكليه سنه صارت لا تضحك ولا تسولف انطوت وانعزلت اثاري فكد الاخو مصيبه ...
عدت السنين وزهوره خلصت كليه وعينها نعمه ابن حجي رايح مدرسه بمدرسه قريبه علينه وجان ابراهيم ابنه ياخذها ويروح ...
حالي اصبح حال تغير وكعت وصحتي تعبت ...بس ايماني بالله جبير لان الله سبحانه وتعالى ...اذا احب عبدا ابتلاه ...
زهوره خطبها ابراهيم ابمن حجي نعمه انه رفضت لان وضعها يختلف مثل متكول الناس بت حرام وماردت تتأذه بعدين ...
لكن ابراهيم وابوه بقوا يلحون وتعهد كدام اهل القريه ما ياذيها ...
وافقت بسنة 2010 تزوجت وانه رحت كعدت وياها بنفس البيت همه رادوني اعيش وياهم ...زهوره ما خلت شي بنفسي حجيت وعمرت
وزرت سوريا والرضا ...ريحتني وعيشتني احلى عيشه ...ارتاحيت وشفت الدنيا بعد العذاب
لكن بقت غصه بداخلي ...غصة شبابي ..وغصة حسن ..وغصة ابوي البقه مدفون بأرض الحرام ...وغصة مالك المظلوم ...
بسنة 2013 سمعت حميزان اجه للقريه ويدور على خلفته وسائل هواي عنهم وعني ...بس اهل القريه طردوه وما انطوه حجايه ...
اجه على بيت نعمه استفسر منه ..
نعمه سولفله كل السالفه ..وكله اثنين من ولدك سياب وحده كاوليه وواحد من بعد البوك والعرك صارت معمم ..وماعدنه اخبار عنهم ..ومالك استشهد بمفخخه ...
وزهوره متزوجه ...وبعد ما الك حك اداعي بيها واذا تفتح حلكك وتتنفس اخلي الفلح يكطعونك وصله وصله ويدفنوك بهاي الكاع يافاين ...
حميزان راح وبعد مانعرف اخباره بس سمعنا حظيه ماتت من سمعنا صوت صياح بيت اهلها وبقت بالخارج دافنتها البلديه هناك ...ونصره محد يعرف اي خبر عنها لحد اليوم هذا ...
انتهت مأساة سنيه ...اشكر متابعتكم وصبركم ...اختكم ليلان العطواني
ملاحظه //اعتذر ع التاخير بس والله تعبتني القصه خاصه هذا الجزء من مات مالك كتبته واني ابجي ..لان اعرف شنو معناة فقد الاخ الله يرحم اموات الجميع ...
انتهت
