صفا:
رجع الولد للبيت واني انقهرت من هيج رديت علي رغم هو جان كلش لطيف وكلامه مابي اي ازعاج بس اني كل ما اتذكر ذاك اليوم اعصابي تتلف احس بذنب لان ما كدرت اطلع مصطفى بس هو ما جان يستاهل كل اللي سمعه مرت ايام وهو ما يباوعلي ومن اصير كدامه يدير وجهه لغير مكان طبعا هو بده يساعد بالشغل ويانه بالبستان وبالحلال وبالزرع وحتى الكل كامو يرتاحون اله حتى امي اللي كلش طائفيه ومتشدده(بسبب موت اخوها باسباب طائفيه ) بديت احسها تحبه وتعامله مثل اخوتي وهو هم يصيحلها يوم بس ابد ما يحاجيني ولا فد يوم شال عينه الي لحد ما يوم المغرب جنت راجعه امشي عثرت ورجلي التوت من الكاحل وضليت الوب وما اكدر اكوم هو جان بالبستان ورجع من نفس الطريق وشافني ابجي اجاني ركض وشالني للبيت بس ما باوع بوجهي بس حسيت نفسي ريشه بحضنه ومن وصلنا تلكتنا امي وطبعا رزالة زينة الي لان خليته يشيلني وانو اني ثولة وما اعرف امشي بس اتعثر ودائما اركض مثل الزعاطيط فلذلك استاهل كسر ركبتي مو بس وكعة خفيفة هههه وهذا كله كدامه من الفشلة ردت اموت . بعد يومين كدرت امشي وارجع للزرع وهو جان وحده شفته من بعيد ورحت عليه
صفا:صباح الخير
-صباح النور هلو!!!!!
-اممم مرتضى شكرا هذاك اليوم ضوجتك
-لا بالعكس لا تكولين هيج اني ما سويت اي شي عالاقل اجازي تعبكم وياي
-اسفه كلش ضوجتك يمكن بس تره اني اعتذر عن كلامي اللي كلته الك اني شوية اعصب من اتذكر الحادث اعذرني
-لا صفا ما صار شي ويمكن اني لحيت بالسالفة
-لازم امشي لا يجي احد يشوفني واكفة هنا
-واذا يعني ما مسوين شي غلط بعدين انت ليش هلكد تخافين
-لا مو مسألة خوف بس احترام لابوية ولنفسي واني اشكرك لان وصلتني للبيت
-تدللين ما صار شي
مرتضى :
راحت صفا واني ضليت اتمنى لو تبقى للابد بقربي كلش حبيت قربها من تجيني احس الدنيا كلها ملكي بس شلون والظروف ما تسمح ابين اي شي بس نضراتي اللي تتبعها وين ما تمشي
صفا:
مر 4 اشهر على وجوده وصارت رجله كلش زينه وبدوا يتفقون ويحجون شلون يهزموا ويرجع لأهله بس بهاي الفترة الدواعش كاموا يفترون عالناس وياخذون منهم فلوس وذا عدهم حلال ياخذوا بحجة دعمهم واحنا جان كل خوفنا لا يعرفون امر الضابط وكلنا نروح بيها واستعجلوا حتى يهزموا هالايام وقبل ما نهزمه دخلوا الدواعش للبيت وختلوا الضابط بالغرفة مالتي بحجة غرفة البنات وكعدوني لابسه عباية وهو جوة السرير وصار مصايح وصوت عالي بعدين سمعنا رمي بره وضليت ابجي بس ما اكدر اطلع ابوية ما يقبل خوفا عليه منهم لحد ما سكت الرمي وسياراتهم راحت طلعت ويا ريت لو ميته وما شايفه المنظر كاتلين ابوية وامي تصرخ كعدت ولطمت لحد ما سودت الدنيا بعيني وما حسيت
يتبــع ؟؟
_________________________
البارت السادس
مرتضى:
دخلوا الدواعش للبيت وكتلوا الحجي واخذوا كل الغنم على ان هي غنائم وسرقوا كل الفلوس ولو ابو نور موجود يلقى نفس المصير راح واخذ اهله لغير مكان يم اهل زوجته .... دفنت الحجي بالحديقة واني دموعي تجري طبعا الحجية تلطم وتملخ بنفسها وصفا من شافت المنظر اغمى عليها وشلناها وضلت ساعات فاقدة الوعي ومن كعدت مصدومة وضلت اكلها كلش قليل وامها مكابلتها وتبجي خافت لا يصير بيها شي هنا اني جنت محضر كل شي حتى انهزم بس من شفتهم لازم اخذهم وياي ما ضل الهم احد ابو نور اخذ ابنه لان مريض وطلعوا على امل يلاكون مكان يعالجوه بي قررت احجي ويه الحجيه واخذهم وياي ولو مو ضامن اني اكدر اوصل لاقرب مكان مسيطرين عليه الجيش.
مرتضى: حجية اني اكول لازم نطلع من هذا المكان كلنا وترحون وياي ما تضلون هنا
-يمه ما اكدر شلون نطلع ووين نروح
-انت خليها علي لازم اخذكم منا ما يصير تبقون وهذول الانجاس اكيد يرجعون
-واحنا شبقى عدنا حتى يرجعون الفلوس اخذوها والحلال كله راح
-باوعت على صفا ونصيت صوتي ولو هي بغير عالم جانت من صدمتها........ خاله انت وصفا نسوان وحدكم ما الكم احد وهي شابه والحجي الله يرحمه جان كل همه هي لازم نطلع
-اي والله يا يمه خايفه عليها هاي اذاهي ما تخبلت وراح عقلها
-لا حجيه شتكولين اسم الله عليها هاي صدمة واللي شافته موقليل
طلعنا ثاني يوم من الصبح طبعا صفا بغير دنيا ماكو فاصلة شوط تبجي وشوط تضحك مرات تصيح على اخوها مصطفى وابوها عبالك يمشون وياها وتسولف وياهم و ومرات تعاند ما تمشي اشيلها ومن تضوج تكوم تضرب بيه وامها تتعذر مني بس اني من قهري عليها وشلون انكسرت اتمنى تموتني اذا هالشي يردلها عقلها وتعهدت اخذ بثارها من كل داعشي قذر تسبب باذيتها واذية اهلها وكل مدة اتذكر شلون جانت مثل نسمة الهوا الباردة بيوم مشمس حار قبل لا يجون هذوله الكلاب اخذوها من حياتها كلبي معصور اول مره اميل لمرأة بعد زوجتي احبها بس ما كدرت اكولها وتأكدت من حبي بعد ما شفتها بهاي الحال.
بعد مسيرة يوم كامل وصلنا لمكان يسيطر عليه الجيش وطبعا رادوا يكتلونا لو ما الله ستر ظنا منهم احنا دواعش بس بعد ما عرفت نفسي وتأكدوا بالاتصالات من هويتي وبقينا ساعتين وصل الخبر لأخويه سجاد وماكو ساعات هو يمي طبعا لقاء اخ يأس ان يلتقي اخو يبجي مثل النسوان نسى رتبته ونسى عمره اخذنا وبوجهنا للعمارة لان امي كلبت الدنيا بالاتصالات وبالطريق سولفتله على الناس اللي ويايه واتصلت بامي واختي حتى يحضرولهم مكان وملابس والتساؤلات اللي ما تخلص ولما وصلنا تلكتني امي مفرفحة روحها ام مضيعة ابنها ولكته 2
ام سجاد: ولك يمه وليدي اويلي همزين رديت والله يمه عيوني عميتها من البجي اخذت روحي وليدي فدوة اريد اشمك اخاف حلمانة
-يا الغالية لا تبجين مو هاي اني رجعت بس عاد كافي
-ولك متت اريد بس خبر ماكو كالو راح وراحت روحي وراحتي وياك هذا الليل اني ما اشوف بي نوم ولا حطيت راسي على مخدة اذا مو انت كبالي اتخيل صورتك
-هسه رديت حبيبة سكتي كافي تره ما اتحمل دموعج
- يمه راح اسكت بس شوفتك تسوالي دنيا بحالها بس تعال هنا منو هالبنت الحلوة الجايبها
-هههه يمه قلبنا من البجي للتغمز هاي اسمها صفا وهي سبب حياتي بعدين نسولف بس ارتاح
يتبــع ؟؟
أنت تقرأ
قــصــتي مــع نهہر دجلهہ
Roman d'amourالجزء الاول نهر دجلة ماي اطيب من العسل ريحته اطيب من المسك ينطينا احسن رزق والخير بي ما يخلص بس حاله مثل كل نهر مثل ما ينطي ياخذ ومرات اللي ياخذه اغلى واعز من عطايا لسنين وسنين.
