الصعود للأسفل

الجزء 13

الجزء الثالث عشر

أنا ضايق وبالي ضايق وجوي ضايق ضيقِ كايد
نفسي ملت وروحي ولت وعيني هلت دمع وايد~~

الساعه 8:00 الصبح

إحدى المستشفيات


تنهدت بضيج وانا يالسة على هالكرسي الي مول مب مريح لي خاصة وانا حامل ،

شفت ويه هزاع وهو نايم لين الحين ما شافني يمكن لما يشوفني يذكرني وترد له ذاكرته ،

تذكرت امس كيف حسيت بان صبوا عليه ماي بارده ما كان خوف على هزاع قد ما

كان خوف على حياتي وياه ، انسان ما يذكر اي شي كيف بفهمه كيف

كيف بفهمه على اسلوب حياتنا ، كيف بحسسه اني ما اكن له اي شعور ، ولا هو

يكن لي اذا الانسان الي ما يعرفنا يستغرب ان في ناس جذا ، كيف انسان فاقد الذاكرة بيرضى على نفسه

تذكرت كيف ييت بليل وشفتهم يصيحون وكيف يترجوني اني اساعده ان ترد له
الذاكرة ، حارب اخويه قالي ذكريه كل حياته وذكرياته وياج ، مسكين يا حارب
الموضوع وايد صعب لان بينا ماشي ذكريات

انتبهت على هزاع يفج عينه شوي شوي طالعني باستغراب


بلعت ريجي بخوف وابتسمت : صباح الخير ، حمدالله على السلامه

طالعني بنظرة شككتني بعمري ما كانت استغراب كانت نظرة ثانيه ما فهمتها نظرة

من نظرات هزاع الي ما كنت اهتم لها ولا افكر اعرف شو معناها لانه ما كان
يهمني ، ولا الحين يهمني لا تفهمون غلط ، بس هو فاقد الذاكرة ، ليكون ما نساني
، الحين الي يفقد الذاكرة ينسى كل شي بس يذكر الاساسيات يعني كل شي في المخ
له مركز يمكن ينسى الاشخاص بس يذكر معاني الكلمات يذكر الحروف سبحان الله

سمعت صوته : انتي فطيم

فجيت عيني وطالعته : هزاع تذكرني

طالعني باستغراب وهو يعقد حياته وبصوت تعبان ومبحوح : لاء

بلعت ريجي ليش مب مصدقتنك يمكن انا وسواسيه وايد : عيل كيف عرفت اسمي

عدل يلسته بتعب وببطء وقال وهو يتساند وبنفس الصوت المبحوح التعبان : قالولي
اني متزوج وعندي عيال وان حرمتي اسمها فطيم وانها بتي توقعت انتي يعني

طالعته باستغراب وتنهدت :هيه

تغيرت نظراته صارت تفحص تدرون ما ادري ليش توترت من نظراته حسيتها
تتفحصني اول مرة يشوفني هزاع بهالنظرات توترت وبديت اعصب بس تذكرت انه فاقد الذاكرة ومب قصده شي

طالعني باعجاب استغربت منه : انتي حرمتي كم عندنا عيال

شكلي بطول وياه طالعته بعدم اهتمام وببرود تعودت اشوفه بهالنظرة ما اقدر
اغيرها : واحد اسمه سالم وانا الحين حامل

ابتسم لي : انا كنت متزوج وحدة شراتج

عقدت حياتي بعصبيه : شراتي

طالعني بابتسامه : انتي وايد حلوة ، كيف خذتج يعني كيف تزوجنا عن حب

طالعته باستغراب وبداخلي ضحكة : لاء زواج تقليدي

هز راسه :مع ابتسامه : تقليدي منج انتي اشك قولي الصدق يكن اذكر


بلعت ريجي : هزاع نحن غير

قالي بتعب وصوت مبحوح وهو ينعس عينه : اكيد غير ، انا مب مصدق ان كان عندي حرمه بجمالج

تنهدت وانا ابتسم له بالغصب خله يرتاح بعدين بفهمه كيف زواجنا شكله ناسي كل

شي شفته استسلم للنوم ورد يرقد ما ادري كيف رد يرقد توه قايم من النوم لحق ؟؟؟

مليت امرر على قلبـي جراحاتـي
اوراقي مبعثره والوقـت يغرينـي
اخاف اطيح بمتاهه مـن متاهاتـي
مدري انا الصح ولا الصح مخطيني
مدري اناالعله اللي تزيـد علاتـي
محتاج اناظر لنفسي وامنع ايدينـي
عن طرف عيني وهذي هي معاناتي

9:30
الصبح