الصعود للأسفل

الجزء 18

الجزء الثامن عشر ~~


خالد


شفت ويه ابويه تغير

خالد: شفيك أبويه

بوخالد: البنت صغيرة عليك

عقدت حياتي : كيف يعني صغيرة

بوخالد: توها 18 وانت تقريبا 26

خالد: لين ما تتخرج بتكون 22

بوخالد: وانت بتكون 31

قمت من مكاني متنرفز: ماشي فرق وايد

بوخالد: يعني بينها وبين راشد الفرق اقل ثلاث سنين يمكن او اربع ، بس وياك الفرق كبير ست سنين

قمت من مكاني متنرفز: يعني انت حاط عينك عليها لراشد

بوخالد: ما حطيت في بالي انك رايدنها

ما حسينا الا بدخله راشد علينا

صديت صوبه بحقد

حتى هو طالعني وهو يرفع حياته ويسأل ابويه بعيونه ( شوفيه )

بوخالد: تعال راشد

طالعت ابويه بعصبيه عمري ما طالعته بهالنظرة : مافي داعي انا حاط عيني عليها وانتهى الموضوع

يا راشد بهدوء ويلس

بوخالد: راشد اخوك يبغي يخطب شما

شفت نظرات راشد متفاجأة :

تأكدت لحظتها ان راشد حاطنها في باله سكت للحظة وبعدها سمعت صوت رشد

راشد: خالد بيعرس

بوخالد: هيه ويبغي شما

طالعني وبعلامه استفهام : شمو ، قصدكم شمو قلت وانا اشاور بأيدي بصوب بيت عمي

بوخالد: هيه بنت عمك

راشد : زين الحين تخبروني ولا تشاوروني

بوخالد : نشاورك

صديت صوب ابويه مستغرب كيف يعني نشاوره منو هو

راشد: ليش مش المفروض تشاورون البنت

بوخالد: نحن نشاورك اذا انت كان لك خاطر بها


فجأة ضحك راشد: لاء طبعا شما شرات اختي

حسيت مثل ثلج انحط على صدري : يعني انت موافق

طالعني وهو رافع حياته : اشوفك متعذب

طالعتنه وطالعت عمري شو هالنرفزة الي مالها معنى ، شو السالفه ؟

انفج الباب ودخلت وحدة بهمجيه : السلام عليكم

لما صدينا كانت شما

فجت حلجها ما توقعت ان كلنا موجودين

سمعت ضحكة ابويه وراشد يطالعونها

مسكينه انحرجت ظنت يضحكون على دخلتها المفاجئة ما تدري انهم يضحكون لانا كنا نطريها

قمت من مكاني وانا ابتسم وطلعت برع الصالة ضحكاتهم ضايجتني

اول ما طلعت برع الصالة حسيت مثل العصرة في قلبي

اول مرة احس بهالاحساس ، دقيت على صدري بالخفيف


وقلت وانا ابتسم : شفيك اعقل اعقل


الساعه 5:00 العصر
بيت هزاع
فطيم



رحت اشوف الياهل اول ما طاحت عيني عليه ملامحه هزاع ، غريبه سالم كان فيه شوي مني بس هذا ابدن كله هزاع


تنهدت وأنا اذكر هزاع الي بيعرس قريب


أول مرة في حياتي احس مثل عصرة في قلبي ، من شدتها غمضت عيني وصرخت على الخفيف

شو فيني ، يا ربي شوفيني

انتبهت الباب انفتح ودش هزاع

ما صديت صوبه وهو بدوره ما تكلم ولا شي كل الي سواه شل فوطته وراح يسبح


حطيت الياهل في منزه ، وسرت اشوف عمري في المنظرة ، شفيني ، يت ربي ليش تغيرت

صفعت عمري كم كف خفيف اصحي شفيج

طلع هزاع من الحمام وغير ثيابه نشف شعره على السريع وفر الفوطة في ويهي وظهر

فجيت عيني وانا أطالعه اشفيه هذا ؟؟؟





بيت مبارك