#حياة_امرأه
#بقلمي شمعة امل
#الجزء السادس
.....حياة .....بعد ماشفت المنظر كدامي
ظليت صافنه من الصدمه
وراح كل عقلي وتفكيري انه صلاح وياهم
وأنه اطفالي اصبحوا أيتام واني اصبحت أرمله
حسيت الدنيه سوده بوجهي
وبعد ابد متضحكلي
راح فكري بهذوله الأطفال شراح اكللهم من راح يسالوني على ابوههم
شلون راح اكبرهم واربيهم وحدي
شلون راح اصرف عليهم ومنين
اني ماعندي مورد مالي وحتى صلاح جان يشتغل نجار بالمحل مال ابوهم
بقيت جامده بمكاني واحس الدنيه ثلجت
وظهري ثكل وكأنه شايله جبل على ظهري
بعدين شفت جهالي الزغار اجوي يمي
ويصيحون جوعانين
بدون وعي شبكتهم وبقيت ابجي بحركه
همه شافوني هيج خطيه خافوا وكاموا يبجون ويايه
كوه كدرت اسكت روحي
بقيت شابكتهم
كلتلهم لاتخافون ماكو شي ....
بس انلوت رجلي وكامت توجعني
خطيه ظلوا يبوسون بيه وكعدوا يفركولي
متحملت شكلهم كعدت بالكاع وشبكتهم وبقيت ابوس بيهم ودموعي تجري
وادعي من الله أنه صلاح ماراح ويه الاسرى
اجوي جهالي من الدوام
صبيت اكل للجهال غديتهم
ومن خلصوا اخذتهم ورحت لاهلي
سولفتلهم الي شفته بالتلفزيون
ابويه يحجي ويكلي جذب لاتخافين هسه يرجع
وجدي هم يحجي ويطمأن بيه من صفحه
وامي
واني عيني على الجهال اشوفهم شلون يلعبون وكل البرائه بوجوهم
ياربي بعدهم زغار على اليتم
يارب يرجع ابوهم سالم ...
متحملت روحي طلعت بره كعدت ابجي والطم
وجان تجي امي كوه سكتتني ودخلتني للبيت
جدي ......بنتي ليش هيج تفاولين على رجلج
كولي ياالله ...
خلي يجون اخوتج واخليهم يسألون عليه
بلكي يعرفون عنه فد خبر
حياة ...جدو شيصبرني لحد ميجون
جدي ......بنتي ....الأعمار بيد الله
والغايب حجته وياه وانتي رجلج لحد الآن ماوصلج عنه فد خبر موزين لا سامح الله
يعني بعده بخير
حياة .....إن شاء الله بخير جدو ..
الله يسمع من حلكك
جدو ...بنتي كومي اتوضي وصليلج ركعتين لوجه الله
وادعي من الله أنه رجلج يرجع عن قريب
يله اني اروح للجامع
حياة .....ادعيله جدو
جدي ....إن شاء الله بنتي ....
حياة ....طلع جدي راح للجامع ....
واني هم على حجايته رحت اتوضيت وصليت ركعتين لوجه الله
وكعدت اقره قران لحد مااذن المغرب
صليت وكملت
امي ماقبلت اروح للبيت ...
كالت خلي الجهال يلعبون بالبيت يمهم
وهم لان باجر جمعه ماعدهم دوام ...
بقيت يم اهلي ...
كلهه نايمه واني عيوني ابد مااخذت نوم
افكر بمصير رجلي وجهالي
وحياتي ...الي مااعرف شلون راح تصير
ثاني يوم الضهر رجعت للبيت ......
كعدوا جهالي يقرون واني بالي وكأنه بغير عالم
وبغير دنيه عايشه
مر يوم وره الثاني والثالث واسبوع
وكل يوم اشوفه اصعب من الي قبله
لا ليلي ليل ولا نهاري نهار
