#حياة_امرأه
#بقلمي شمعة امل
هديل...
#الجزء التاسع والاخيييييير
حياة .........هوايه استفاديت من شغلي
بالسيراميك البارد
وشغل التماثيل الي من البورك
مواده سهله ورخيصه
ومن احتاج شي ...لو شغله مااعرفهه
اروح اتصل على اخويه ...كاظم ...هو عنده خبره هوايه بهيج أمور ....
من خلال شغلي ...
جنت اكدر اطلع مصرف بيتي وجهالي
وشغل الطرشي ماعفته
بقيت ادز للمحلات
وحتى من اكو شخص اريد اوديله فضل
هم ماادوخ اوديله حاجه من هذني الأعمال
بقينه على هاي الحال فتره طويله
والحمد لله وهذا الشغل فلوسه زينه
لحد ماصارت الانتفاضه الشعبانيه
وصارت نكبه جديده على رؤوس العراقيين
وصرنه كلنه عايشين بخوف ورعب
أكثر من قبل
صارت حسره علينه المي النظيفه
حسره علينه دبة الغاز
الطحين البيه حصو وكزاز ونخاله ...دمر معدتنه
البيوت بارده و ظلمه ....
جنه نخاف نطلع بالشارع اجتي أيام شفنه بيهه
الجثث تارسه الشارع
ومابيهه رؤس
ومحد يتدنالهه
ولد جيرانه بيت ام سعد خوش ولد
جانوا يفترون على البيوت ويلمون شكو دبات
ويرحون يجيبولنه مي حتى نكدر نشرب
همه كان عدهم كرابه ويحملون بيهه
وخطيه كنت اوصيهم اذا يلكولي حطب حتى اكدر اخبز
وهم استفاد من الفحمات الي يصيرن بالطبخ
اخليهن بالمنقله واركب
لان حتى النفط هم خلصناه وبعد منكدر نشعل صوبات
أيام متنوصف وصعبه على الغني والفقير
وياما اخذوا ناس وبعد محد يعرف عنهم شي
بيوم كالوا نريد جماعه يطلعون مناصرين لصدام
ولازم ميبقه ولا رجال بالبيوت
هذا كان كلام واحد من الحزبيين الي عدنه بالمنطقه
وصدك جاب سيارات وصعدوا وياه هوايه ناس
.........ولدي كالوا نروح
كمت املخ بروحي ...
كلتلهم اذا طلعتوا بره البيت احرك روحي
اندكت الباب
اني ماخليتهم يطلعون
اثاري الحزبيين ديفتشون البيوت خاف بيهه بعد رجال باقي
همزين من اندكت الباب
كلتلهم طبوا للحمام
وطببت شيماء وياهم وكلتلهم ولا نفس وكأنه شيماء دتخسل
تالي دخلوا للبيت وفتشوه
واني كمت اقره وجعلنا من بين ايديهم سداً ومن خلفهم سداً
سمعوا صوت بالحمام
كالوا منو هنا
حياة .....منو .....هاي بنتي دتخسل
.الجنود ......خلي نشوف
حياة .....ياااا شنو اتشوفون .....
دااكللكم بنتي دتخسل
شلون اتطبون اتشوفوهه بالحمام
