بيت المجانين - Houes Of The Crazies

Chapter "7"

الحرامي خارج من الاوضة بضهره وهو بيشاور بإيده ..

الحرامى :"اطلعولى انتو التلاتة."

يطلع كريم وامير وبوسى من الاوضة وهما رافعين ايديهم لفوق ..

الحرامى :"يا حلاوتكم .. عارفين لو سمعت صوت حد فيكم."

امير :"بقولك ايه شوف انت عايز تسرق ايه وخلصنا وامشى."

كريم بخوف :"اه والنبى ياعم امشى امشى هششش هششش."

بوسى :"هششش هششششش."

الحرامى :"هطير انا كده يعنى .. فين الفلوس."

يبص التلاته لبعض ويرجعو يبصو له ..

امير :"فلوس ايه."

الحرامى :"انت هتستهبل عليا فين الخزانه."

امير :"كمان خزانه."

كريم :"خزانة مين ياعم."

الحرامى :"ااااه شكلكم هتتعبونى."

يلف حواليهم وبعدين يقرب لـ بوسى ..

الحرامى :"حلوه المزه الي معاكم دى."

امير :"هو انت جاى تسرق ولا تخطب .. ابعد عنها احسن لك."

الحرامى :"هههه ايه هى المزه تبقى الوزه بتاعتك ولا ايه."

بوسى :"... ؟!."

امير :"وزه ومزه فى جمله واحده ولمين لـ بوسى."

كريم :"يا سبحان الله بوسى بتتعاكس."

الحرامى يمسك بوسى جامد :"انتو هتشتغلونى بقولكم ايه لو مطلعتوش الفلوس هخلص عليها قدامكم."

بوسى :"هما يطلعو الفلوس وانت تخلص عليا وانا طيشه كده فى النص."

◾◽◾◽◾◽◾◽◾◽◾◽◾◽◾◽◾◽◾◽◾◽◾◽◾◽◾◽◾◽◾◽◾◽◾◽◾◽◾◽◾◽◾◽◾◽◾◽◾◽◾

ماهر قاعد فى البيت بيكلم سالي فى التليفون ..

سالى :"حبيبى هو التجربة ال انت شغال عليها دي لسه فاضل عليها كتير."

ماهر :"لسه والله يا سالي والمشكله ان مفيش فيها اى تطورات حالتهم زى مهى."

سالى :"طب الا قولى صحيح هما ليه كده يعنى هما اتولدو كده ولا حصلت لهم صدمه ولا ايه."

ماهر :"مفيش حد بيتولد مريض نفسى اكيد فى ظروف خلتهم كده مهو انا لو اعرف اللى حصل ليهم اعرف اقدم ليهم العلاج اسرع واحسن لكن هما التلاته مش عايزين يرجعو للماضى مش عايزين يتكلمو حتى التجربة واخدين انها لعبه مش علاج ساعات بحس انهم مش عايزين يتعالجو اصلا."

سالى :"هو فى حد بيحب يبقى مجنون ده العقل زينه."

ماهر :"بس فى ناس بتتمنى تبقى مجنونه عشان تعرف تعيش."