النهاية

الجزء العاشر

قصة #النهاية
الجزء العاشر...للكاتبة لينه سعد
💙💙💙💙💙💙💙💙💙💙💙💙💙💙💙

اتقدمت بخطوات متمايلة....
وكانما اكو شي ثكيل متكدر اتحملة
صعدت السيارة وهي اتباوع على سيد احسان بالمراية وتكول اله
_ اطلع

..... نار قوية اتحس بصدرها بدت تنوقد اشوية اشوية
ايدهة الي تهتز وترتعش وهي شابكة ايد على  ايد وضاغطة علية بقوة
متوقعت راح اتشوفها او تتخيلها هيج
مو مثل ماوصوفها سلام
جانت قوية....وواثقه بكلامها

...اكو دمعه محصورة بين جفونها  وتحاول بكل طريقه تبعدها عن النزول
الم جبير بداخلها ...متوقعت راح اتلاقي هيج الامر صعب
مجانت متخيلة كمية الالم الي صابها

... عيون سيد احسان اتابع كل صمتها الي ماتعود علية
جانت دووم مرحة بالسيارة وتنطي نصائح بهواي امور
الفضول عندة قوي وهو يريد يعرف ليش اجت لهذا البيت...

...ورة دقايق
نزلت سارة من السيارة وهي اتباوع على الكراج وتلاحظ سيارة سلام موجودة

...متوقعت يجي بهيج وكت
...التفتت لسيد احسان وكالت
_اذا سالك وين جنتو كلة بالسوك
...اتعجب السيد من كلامها اول مرة تتصرف هيج وياه وتحاول اتجذب
_ماشي ام نور

...بدت تدخل للبيت وهي اتشوفه كاعد على القنفه وبايدة نور ويلاعبة
بدة نور يضحك بقوة وكانما فرحان لوجود ابوه الي ابتعد عدة ايام

...اتذكرت صايرة مدة مكاعد يم نور ويلعبة
...اتقدمت وهي اتكول

_الله يساعدك...اشو جاي من وكت
...التفت وهو   متعجب
_اي خلصت شغلي..واجيت لان عندي شغلة...
وين جنتي؟؟...

_شغلة بالسوك
_اشو مااشوف بيدج علاليك

_ملكيت الي اريدة
_لو كايلتلي جنت ببغداد

_على الجايات....
...راحت بكل هدوء وهي ترمي نفسها على القنفه وكانما شايلة حمل جبير وعيونها وتفكيرها مو هنا
هناك يم الي كدرت اتحرك مشاعره مرة ثانية
وتخلي يفكر ويصفن وحتى يبتعد عن ابنه

.....سلام الي كاعد وهو يراقب هدوء سارة...وسرحانها الي متعود علية
بدة يخلي نور بالكاع واتقرب منها وهو متاكد اكو شي كلش جبير شاغل تفكيرها

_اشبيج سارة اشو حايرة
...رمشت اكثر من مرة وكانما كلمات سلام رجعتها من مخيلتها الي ودتها لابعد مكان

_لا مابية شي ....بس تعبت من الطلعه الظاهر
كبرت.....ابتسمت والالم بداخلها جبير

_ههههه شنو هذا الحجي....ترة اتزوج عليج
....كام وهو يضحك ويتشاقه بكلامه

...صفنت ومكدرت تكتم العاصفة الي بداخلها والالم الي بدة يظهر على معالم وجها
حست بالم ببطنها
...كمشت بطنها وبدت تتلوة