Bakit ito ang iyong ibinungad sa aking pagdating? Hindi mo na ba talaga kaya ang lahat ng pagsubok na darating? Bakit ika'y sumuko? Hindi mo na ba talaga kayang tiisin ang sakit sa isang sulok?
Sobra na ba ang sakit na iyong dinaranas? Kaya't hindi ka na makapaghintay at iyong winakasan? Ang mga tao sa iyong paligid ay puno ng pasakit at panghuhusga Na kanilang ibini-bigay at idinadagdag sa iyong buhay
Bakit mo ito nagawa? Ni sa hinagap, hindi ko inaasahan ang bagay na ito mula sa 'yo Bakit pinili mong ikabit ang iyong sarili sa tali Imbes na kayanin ang pagpapasakit?
Ako'y lubos na nanghihinayang para sa iyong buhay Dahil ngayon ang iyong mukha ay puno ng lumbay Ninais mo na ba talagang matulog na matigas na higaan? Sapagkat ngayo'y tinakasan ka na ng hininga
Hindi ko mang masabi na tayo'y malapit sa isa't isa Ngunit, ika'y naging parte na din ng aking buhay at lubos kong pinahahalagahan Ni hindi kita kayang tingnan Ni tumapak sa iyong kinahihigaan ay hindi ko magawa
Ang aking puso'y lubos na kumi-kirot Sa kaalamang ang iyong mundo'y hindi na muling iikot Hindi ko kayang tanggapin na ang iyong mga ngiting puno ng saya Ngayo'y hindi ko na muling makikita
Ang tanging hiling ko lang sana'y matahimik ang iyong kaluluwa Sa kabilang buhay ay hindi na sana dumanas muli ng kalupitan Kalupitan ng mga taong tina-tawag mong pamilya Ngunit, kahit kailan ay hindi ka inaruga
At sana sa iyong paglisan Patawarin ka sana ng Diyos, dahil sa iyong kasalanan At sana'y sa kabilang buhay ay hindi ka na masaktan Pagka't alam kong pagod na pagod ka na sa pakikipag-laban
Paalam na sa 'yo Paalam na sa iyong mga tawa't panunudyo Hindi ko man nais ang iyong paglisan Ngunit, alam kong kahit kailan ay hindi kita malilimutan
Sana sa iyong muling pagkabuhay ay hindi mo na maranas ang pait Ang mga pagmamahal na kanilang ipinagkait Sa bawat bagay na aking masdan ay may nagpapa-alala Na minsa'y may nakilala akong kagaya mong ka-mahal-mahal.
Oops! Ang larawang ito ay hindi sumusunod sa aming mga alituntunin sa nilalaman. Upang magpatuloy sa pag-publish, subukan itong alisin o mag-upload ng bago.
