مجنون سارة

part 17

( الجزءالســـابع عشر)

وبعد اتصال سالم لهند وتحديده موعد قدومه لخطبتها ..هند ما عرفت كيف تصرف وكانت طايره من الفرح لان حلمها راح يتحقق وراح تزوج الانسان اللي حبته ..

أما محمد فما قدر ينام بعد ما سمع كلام أمه ورفضها للريم وإجباره انه يتزوج بنت عمه شيخه .. وكان محتار ما يعرف هل يطيع قلبه او امـــــه..

وفي اليوم الثاني ..

في بيتكم خالد....

الكل كان نايم ومرتاح الا هند م قدرت تنام الا ساعه من كثر التفكير

.. خالد كان نايم بسابع نومه ..لان البارحه هو بعد ما قدر ينام لانه اكيد يفكر بساره والقهر مالي قلبه ..

خالد وهو نايم محمد اتصل فيه ..

خالد يرفع السماعه وهو تعبان ونايم ..

خالد من غير نفس وتعب :الو

محمد ( متضايق): الو خالد

خالد: خالد عيل ابوه

محمد: اشحالك يا خالد

خالد : كيف تبى يكون حالي وانت مقومني من النوم...

محمد : اسمحلي خالد بس اتحريتك واعي

خالد وما يقدر يتكلم عدل لانه فيه نومه: ليش الساعه كم ألحين ؟

محمد يشوف ساعته : الساعه 8 ونص

خالد فتح عيونه: بلللللللللللللللل الساعه 8 ونص وانت مقومني ليش؟؟

محمد: ما قدرت أنام يا خالد

خالد : زين يوم انت ما تقدر تنام ..خلني أنا على الاقل انام ..أنا ما صدقت ان اليوم الخميس عشان أنام زياده..

محمد : خااااااااااالد والله أبي اقولك شي .. خلا النوم عنك الحين.

خالد قام وقعد عالسرير : خير شو في

محمد : انا قلت لامي عشان سالفة الريم واني ما ابي بنت عمي

خالد : أنا قول ليش ما قدرت تنام ...زين شو قالت ؟

محمد: بضيق وحزن: ما وافقت وعصبت ..

خالد : اكيد بيكون ردت فعلها جذي.

محمد : زين شو الحل يا خالد..

خالد : والله ماعرف شو اقولك ..بس تعرف شو

محمد : شو \

خالد: خلا السالفه شويه تمر ..وبعد اسبوع تقريبا فاتحها بالسالفه مره ثانيه ..عشان تعرف انك مصر على رايك

محمد : ما اعتقد توافق

خالد: انت حاول مره ثانيه وثالثه وان شاء الله خير

محمد: جذي رايك يعني

خالد : ما عندي والله حل ثاني ..والله يسهل امورك