مجنون سارة

part 21

جزء الواحد والعشرون

بعد ما راحت ساره ويا امها بيت خالتها ام خالد الكل كان يترياهم وبالذات خالد اللي كان متخبل يشوفها لانه من مده ما شافها ..

ساره بعد ما دخلت الصاله الكل سلم عليها لانهم صدق مشتاقيلها وساره كانت مستانسه باستقبالهم ..

ام خالد وهي ماسكه ايدين ساره : وينج يا بنتي صدق لج وحشه .

نوره تغمز لساره : هاي وهي توها مالجه وما تبين ..لو معرسه متى بنشوفج ..

ساره اتضايقت ونزلت راسها وما قالت شي ..

اما خالد فكان معصب والعصبيه مبينه في ملامحه ..

خالد وهو يبتسم لساره : ساره شحالج ..صدق من زمان ما شفناج

ساره بخجل : والله الظروف

ام خالد : لين متى بتمون واقفين تعالو يلسو ..

الكل يلس ونظرات خالد ما ما تفارق ساره ..اما ساره فهي تحاول تتجنب نظراته بس قلبها طبعا يدق بسرعه لان خالد موجود معاهم ..

****

اما فهد فهو استغرب لانه ساره ما تصلت فيه ولا اعتذرت لانها لغت يوم ظهورهم ..واتصل فيها ..

ساره تشوف الرقم ويوم شافت رقم فهد طنشت وخلت الموبايل في الشنطه ..

نوره لا حظت هالشي : ساره ليش ما تردين

ساره بتوتر: ها ..لا ..مب متفيجه ارد

هند بدلع : لا يكون حبيب القلب ريلج وانتي تستحين تكلمينه جدامنا .

ساره انحرجت صدق.

خالد شاف نظرات حقد لهند وبعصبيه : هند بلا حركات

هند خافت من نظراته : شوووووووو انا ما قلت شي ..

نوره مسكت ايدين ساره وسحبتها : ساره تعالي بقولج شي

ساره ونوره قامو من مكانهم: عن اذنكم

خالد يشوف ساره وهو سرحان فيها ومنقهر لانها ضاعت منه ..

نوره وهي بغرفتها بعد ما قعدت ساره .

نوره : ساره بلاج ليش هالحزن كله ..

ساره والحزن مالي عيونها : تعرفين شو فيه

نوره : زين شو صار بملجتكم ..مرت الحينه تقريبا اسبوعين على ملجتكم شو ظهرتو ويا بعض كلمتو بعض ما صار شي

ساره : لا ولا شي ما اكلمه الا مره في اليوم وهو اللي يتصل فيه بعد مب انا

نوره فتحت عيونها : مره وحده بس غريبه

ساره : انا مب متفيجتله اصلا

نوره : بس ما باقي شي على عرسج الا شهر ونص يالله اتجهزي ما باقي شي