مجنون سارة

part 36

الجزء السادس والثلاثين

ساره وهي في الطياره كله حزينه وما تتكلم ابد .. اما فهد فمستغرب وايد من ساره ومن قسوتها

فهد مغمض عيونه .. ساره ماقدرت تنام تحس انها السبب في مرض خالد ..
ساره سمعت من المضيفه انهم راح يوصلون بعد دقايق..
ساره تصد صوب فهد وتشوفه مغمض عيونه ونايم ..
ساره بصوت واطي " فهد فهد
فهد يفتح عيونه وهو تعبان : ها حبيبتي شو فيج
ساره : مافيني شي .. بس وصلنا يالله جهز الشنط
فهد يفتح عيونه وهو تعبان : ماشاء الله وصلنا
ساره : لازم ما تحس ماشاء الله من الصبح نايم
فهد يحك عيونه : والله قايم من وقت وفيه رقاااد وانتي ما نمتي
ساره بحزن : ما فيه نوم ..
فهد : يمكن من الفرحه لانج بتشوفين اهلج
ساره ابتسمت : هي والله مشتاقه لامي وايد
فهد : واخيرا شفت ابتسامتج .. من ركبتي في الطياره وانتي مبوزه ومطنشه
ساره : تذكرت اني بشوف امي
فهد : زين يالله عيل بروح انزل الشنط

ساره وفهد نزلو من الطياره
ساره اول ما وصلت مطار دبي.. خذت نفس وابتسمت
ساره : فديت دبي واهلها والله .. والله اشتقت حق دبي والامارات كلها
فهد : اكيد كل واحد مايقدر يستغنى عن وطنه
ساره : يالله ننزل
فهد : يالله ..

ساره وفهد بعد ما خلصو تجهيزات الرجوع في المطار ..

ساره وفهد وهم راكبين سيارة اجره وساره مستانسه لانها بتشوف اهلها بالذات لان امها ماتعرف برجوعهم..

##############################

في بيت خالد

الريم ونوره يعرفون برجوع ساره بس ما خبرو حد يعني يسوون مفاجاه ..

ام خالد وهي لابسه العبايه : نوره من متى وانتي تقولين لحظه ..يالله تاخرنا على خالد .. يحليله بروحه في المستشفى
نوره وهي تشوف الساعه : بس دقايق
ام خالد وقفت : انتي جنج ما تبين تروحين المستشفى
الريم : لا خالو بس دقايق ..
نوره ترمس الريم بصوت واطي : اقول مب تقولين حق اخوج ان خالد تعبان من يومين اذا سالج قولي من اليوم عشان فهد ما يشك في ساره وتكبر السالفه
الريم فتحت عيونها : ليش لا تقولين ساره ردت عشان خالد
نوره تبى تغطي السالفه : لا طبعا ... بس اكيد اخوج بيشك فيها ونحن ما نباهم يتضاربون
الريم : هيه صح زين منهم تزوجو .. ما بقوله
نوره وهي تشوف ساعتها : بس مب كانهم تاخرو
الريم : اخويه قال انهم بيردون المغرب يعني عن جريب ان شاء الله

هند تشوف نوره والريم يرمسون بصوت واطي وتشوفهم من عين وحده : ايه انتو بلاكم تصاصرون ..
نوره : وانتي شو راز ويهج
هند : ماعرف عنكم مطنشيني ولا كاني موجوده ..وراكم سر
الريم تضحك ..
نوره : والله مب لازم تعرفين
هند عصبت : اييييييه انتي بلاج دفشه اليوم
نوره : لازم منو اختي .. مدام انتي اختي اكيد بكون دفشه مثلج
هند تشوفها من فوق لتحت