OUR LOVE(COMPLETE👍)

Part7

Yess yess ini hari last sa ikut syarat si bos. Lepass tu sa dapat suda telefon sa balik. Yeeeaahhh.

"Woii, termenung lagi ko sana, kita mau sampai suda di hotel nie". Bilang si Bibi. Yakann sekejap pula sa rasa sampai. Lepas kami bayar tambang bas terus kami masuk di hotel. Ohh yaa lupa sa kasih tau kamurang kan. Kami pigi kerja naik bas saja..hihi.

Baru kami mau masuk di hotel tiba2 ada orang terlanggar bahu sa. Sa mau marah suda tapi satu kali sa tingu sepa yang langgar sa, terus sa peluk dia.

"Astagaa antii Raniah pula nie, kita jumpa lagi sini. Siou sa inda nampak ko tdi anti". Sa bilang sambil sa puyai2 belakang dia. Inda tauu kenapa sa rasa senang betul sama ini anti. Kalau sa nampak dia terus sa rindu diurang mama di kampung huhu.

"Eyaa mandak. Siou juga anti inda nampak ko, tingu sa terlanggar suda bahu ko". Bilang si anti.

"Ehh inda apa anti, salah sa juga ba nie sebab kelam-kabut mau jalan". Sa senyum2. Lepas dari pelukan sudah ahh..hahaha

"Jadi kamu pigi mana ini? Chek in sini hotel?". Tanya si anti.

"Ehh inda laa, kami kerja sini baa ini anti". Bilang si Bibi yang diam membatu dari tadi.

"Ohhh kamu kerja sini, apa kerja kamu sini?". Si anti bilang dengan nada yang separuh terkejut.

"Kami cleaner saja sini anti sementara tunggu panggilan sambung belajar baa nie kunun. Anti pula pigi mana? Cek in? ". Saya.

"Ohh ok laa baa tu begitu ada usaha kan. Anti pigi tempat anak anti baa ini mau pigi tingu2 dia". Si anti.

"Ohh anak anti pun kerja sini juga kaa?". Si bibi bilang.

"Eyaa. Baa anti jalan dulu ahh.. Pelan2 kamu kerja". Si anti bilang terus dia jalan masuk di hotel. Sa mau tanya baa tu sepa anak si anti tapi inda sempat suda sebab si anti jalan suda gimaa.

"Sepa anak si anti arhh?". Sa bilang sama si bibi.

"Entahh". Bilang si bibi sambil dia angkat bahu dia. Lepas tu kamii pun masuk pigi hotel juga inda sabar suda sa mau pigi tuntut telefon sa yesss..

******

"Bibi sa pigi hantar dulu ini kupi tempat si boss ahh". Sa bilang sama si Bibi. Macam besa laa rutin sa selama seminggu tukang buat kupi si boss. Nasib bilik dia suda sa pigi kasih bersih tadi. Jarang gea dia di bilik tu jadi inda juga semak terlampau.

"Uissshh semangat juga ko ini hari Bella, jangan2 ko suda poling in lop ini sama si boss kan haha". Si bibi bilang sambil dia ketawa2.

"Yaaiii inda juga sampai begitu ahh bibi, sa semangat ini hari sebab last suda sa buat begini nie, terus sa dapat suda telefon sa ini hari". Sa bilang lagi.

"Ohh ok pigi laa dulu ko hantar". Bibi bilang.

"Ok". Sa bilang terus sa jalan.

Inda lama sa sampai suda di pejabat si boss.
Baru sa mau ketuk pintu tiba2 sa dingar sesuatuu....

"Kenapa bie?? Kenapaa!". Sa dingar suara si bantaton marah dari dalam. Eyaa memang sa kenal suda suara dia tu.

"Sorry Nadia. Kita memang inda dapat teruskan lagi ini hubungan. Sa suda cuba untuk cinta ko Nadia, tapi sa inda boleh. Tolong faham sa". Sa dingar si boss becakap. Aikk kenapa juga diurang ini, takan mau break suda. Sa bilang dalam hati. Dan baru sekarang sa tau, Nadia pula nama si bantaton tu. Nadia@Bantaton, ok chaannteeekkk..

"Tapi kenapa Azril?? Ko ada perempuan lain suda kaa?". Bilang si Nadia lgi. Teda suda panggilan2 manja diurang, teda lagi suara2 manja si Nadia tu. Kotoh la haha..

"Ada teda tu tak penting Nadia, tapi yang pasti sa inda dapat teruskan lagi hubungan kita". Si boss bilang lagi. Kali nie suara dia kedengaran tegas.

"Kalau ko inda cinta sa Azril, kenapa selama ini ko terima sa??". Bilang si bantaton lagi. Mau menangis suda suara dia sa dingar.

"Itu sa terpaksa Nadia. Sebab bapa ko yang beria-ia mau kita sama2. Sebab sa hormat dia sebagai rakan kongsi sa, jadi sa cuba untuk cinta ko. Tapi sa inda boleh. Sa inda boleh paksa perasaan sa Nadia. Lagi pun ko juga yang deluan2 mau sama2 kan bukan sa". Panjang lebar si bos menerangkan. Ohh rupanya si Nadia pula yang mau2 sama si boss. Dasar bantaton. Ngam juga laa sa panggil dia si bantaton. Ehh tunggu, kenapa juga sa yang emosii ini budu..haha

"Ko jahat Azril! Jahat!. Ok inda apaa. Sa akan pastikan hidup ko inda bahagia ko tingu laa!". Bilang si Nadia. Teriak2 suda dia. Baru sa mau kurik dungot sebab gatal suda hidung sa kan. Tiba2 pintu kena buka  dari dalam. Sa nampak muka si Nadia tingu sa tajam. Sa mau lari pun inda bulih suda sebab kana nampak suda kan. Jadii senyum saja laa. Hihi.

"Ko buat apa pigi sini perempuan kampung!". Tiba2 dia teriak sa. Silakaa bikin terkejut juga laa.

"Aarrhh anuu, sa mau hantar si boss nina". Sa bilang sambil sa angkat kasih tingu dia ini kupi.

"Issshhh. Mungkin sebab ko laa bf sa kasih tinggal sa kann!. Ko pigi goda2 dia. Dasar inda tau malu!". Dia teriak lagi sa. Siaall.

"Aikk. Kenapa juga ko mau tuduh2 sa ini. Sa tukang hantar kupi saja bukan mau pigi goda2 si boss. Teda makna laa sa mau buat semua tu, dengan jelasnya di ulangi.. TEDA MAKNA". Sa bilang lagi sambil sa becakap kasih dekat muka sa di muka dia.

"Jangan ko menipu sana. Ko pura2 kan kunun mau hantar2 ini kopi supaya ko boleh tingu2 bf sa". Si Nadia bilang lagi.

"Arhh maaf. Bf kaa ex bf? Sebab tadi sa dingar ko kana kasih break suda. Opss sorry". Sa bilang. Pura2 kunun sa tutup mulut sebab terlepas cakap, padahal sa mau kasih panas2 dia. Hahaha.

"Kurang ajar ko!". Baru si Nadia angkat tangan dia mau tampar sa, tiba2..

"Nadia stop! Cukup laa. Pigi laa ko pulang". Sa tingu si boss pula yang jadi hero menyelamatkan sa dari tamparan si Nadia. Padahal sa sedia suda tadi tu mau tumbuk muka dia kalau dia tampar sa. Tapi apa2 pun tq boss kuu ..hihi

"Isshh. Ingat cakap sa Azril. Ko inda akan bahagia!". Bilang si Nadia terus dia jalan. Dia hentak2 lagi tu kaki dia macam kuda isshh.

"Ko buat apa pigi sini". Bilang si boss. Peluk tubuhh saja dia ini oh sa bilang dalam hati. Kalau senyum inda apa juga, ini tedaa..

"Arhh hantar nina kupi untuk boss sekali gus mau ambil telefon sa". Sa bilang.

"Ok masuk". Si bos bilang. Sa ikut saja dia masuk di pejabat dia.

"Ok sebelum sa bagi ko ini telefon, sa mau ko kasih terang dulu pasal diri ko". Tiba2 pula si boss tanya begini.

"Aikk. Perlu kaa juga boss". Saya

"Mesti laa perlu, ko itu pekerja sa. Jadi ko mesti jelaskan diri ko". Si boss

"Bukan sepatutnya boss tau suda kaa pekerja sini semua termasuk sa?". Sa tanya si boss.

"Jangan banyak cakap bulih kaa, sa cium juga ko ini inda lama telampau betul banyak cakap". Si boss bilang. Isshh bikin takut juga si boss nie tiba2 pula jadi gete. Bikin takut sa bilang dalam hati.

"Apa yang boss mau tauu?". Saya

"Nama, umur dan tinggal sama sepa ko". Bilang si boss lagi. Ingat kan banyak dia minta tahu.. Haha

"Ok. Nama sa Sandra Bella bulih panggil sa Bella saja. Umur sa 19 tahun dan sa tinggal sama kawan sa kami menyewa bilik saja". Panjang lebar sa kasih tau.

"Okk naa telefon ko". Sekarang ko bulih keluar.

"Aikk tu saja boss mau tau?". Sa bilang. Sebab sa heran tu saja pun mau tau.

"Yalaa. Jadi ko mau sa tanya apa lagi? Ko mau sa tanya ko sda kawin kaa belum". Bilang si boss sambil dia tingu sa tajam.

"Arhh inda boss.. Ok tq boss. Jangan lupa minum tu kupi". Sa bilang terus sa keluar. Takut sa kana rogol di sini. Isshh perasan betul kana mauu .haha..

Dalam perjalanan mau pigi bilik rest kami. Tiba2 sa dingar nama sa kana panggil...