OUR LOVE(COMPLETE👍)

Part20

Semua kaki tangan di hotel ini kana panggil pigi bilik meeting termasuk kami yang cleaner. Ini laa yang si Bibi cakap sama sa meeting besar-besaran tu.Diurang bilang ada hal penting yang boss besar mau kasih tau. Boss besar tu Dadi si Azril laa haha.

"Ko rasa apa sebab kita meeting besar-besaran nie Bella?". Si Bibi tanya sa.

"Entah laa Bi. Kita tingu saja laa nanti". Saya.

"Tak kan laa laki ko inda kasih tau kau". Bilang si Bibi lagi.

"Ko ini Bi. Macam inda tau saja hubungan kami macam mana". Terus sa jeling si Bibi.

"Hihi. Yalaa sorry". Senyum2 si Bibi becakap.

"Selamat pagi semua". Kami dua si Bibi terus tingu depan. Kami tingu dadi si Azril pula yang becakap. Terus semua menjawab pagi juga.
"Sa berada di sini inda lama ah sebab lepas nie sa ada meeting hal lain. Sa terus kepada hal yang mau di sampaikan ". Bilang dadi di Azril lagi. Sa fokus tingu depan kunun.
"Sandra Bella". Terkejut macam munyit sa kena sebut nama sa. Kenapa lagi nie. Sa bilang dalam hati. Sa kasih panjang2 leher sa mau kasih nampak muka sa.
"Bella sila ke hadapan sekarang". Terus sa betingu sama si Bibi.

"Bella. Ko kana panggil tu". Bilang si Bibi. Sa pelan2 bangun terus jalan pigi depan dekat dadi si Azril.

"Tujuan sa memanggil dia kehadapan ada laa untuk mengumumkan bahawa mulai hari ini, dia merupakan bos kedua di hotel ini. Jadi sa harap kamu semua dapat beri kerjasama terhadap dia". Bilang dadi si Azril. Sa?? Mau mati pun ada ohh terkejuttt. Biar betul ini?? Mimpi ka sa ini ? Sa tingu semua urang bertepuk tangan kecuali si Nadia sama si boss.
"Ok itu saja untuk hari ini. Boleh bersurai". Terus semua urang keluar. Kecuali sa sama di boss.

"Boss. Apa hal nie?". Sa pigi dekat si boss.

"Dadi pilih ko jadi bos kedua kan. Ko inda dingar kaa tadi?". Bilang di boss. Isshhh tu pun terus mau marah.

"Tapi boss. Sa inda tau apa2 nie. Kenapa bukan si Nadia saja kana lantik". Sa bilang. Sa betul2 inda mau sama ini jawatan. Sa mau jadi cleaner saja macam dulu uwwaaaa.
"Boss sa inda mau ini jawatan please". Sa buat muka sepuluh sen depan si boss.

"Jangan buat muka begitu nanti kana kiss lagi baru tau". Terus sa jauh sikit dari si boss. Dasar gete. Sa bilang dalam hati.
"Kalau si dadi suda buat keputusan, memang susah mau bantah. Jadi ko kena terima saja". Bilang si boss. Alaaaa..

"Tapi boss..." kana putung cakap sa.

"Teda tapi2. Kalau mau bantah pigi cakap sendiri sama si dadi. Ok laa sa mau jalan suda nie". Si boss bilang sambil dia jalan mau keluar.

"Boss kijap". Entah di mana silap sa. Sa terlanggar tu kaki bangku yang ada di bilik meeting.
"Aduhhh!!. Sakitt!!". Sa mengadu kesakitan. Sambil sa pigang kaki sa yang terlanggar kaki bangku tadi. Sakit kitaaii macam mau nangis pun ada uwwaaaa. Kuku baa tu yang kana. Kamu pun tau juga kan sakit dia macan mana kalau kuku yang kena huhu. Sa tingu si boss datang tempat sa.

"Astagaa Bella mana sakit?". Sa tingu muka dia risau. Aik pandai risau juga pula dia sama sa. Mau minta puji dulu laa haha.

"Nina sakit". Sa bilang kunun sambil tunjuk kuku sa yang mau biru suda.

"Astagaaa biru suda ini. Mari pigi hospital". Dia bilang lagi. Dia baru mau angkat sa.

"Ehh biar boss. Lama2 baik juga ini". Sayaa.

"Baik ko bilang? Susah ini mau baik kalau teda ubat". Tegas suda suara si boss.

"Boss baa jangan". Sa buat suara manja kunun. Mau minta kesian supaya inda kana bawa pigi hospital.