قرطاجه گالت خل نروح على بيت سميره بس اني رفضت لان بيت سميره بصف بيت اهلي واكيد راح يشوفوني
طلبت منها نخابرها ...بس رقم سميره مو عدنه بجنطة نزوكه كاتبته بدفتر احتارينا شلون نحصل ع الرقم قررنا نبوگه من تدخل للحمام بس شلون دائما فريده گاعده بالغرفه ....
قرطاجه گالت عوفيها عليه ....
انتظرنا للصبح گعدت نزوكه وبوجهه ع الحمام وفريده كان نايم راحت قرطاجه للغرفه دقايق ورجعت بيدها الرقم كاتبته
اول شغله خلصت انتظرنا الحد ما نزوكه اخذت البنات
وراحت للسوك ...اخذنا التلفون للغرفه وخابرنه سميره ووافقت تقابلني بملهى شمعون بالليل ....
قرطاجه گالت اني اروح وياج للملهى حتى خاف تغلبج بالحچي اني اعرف اشلون اسحلها ....
صار. المغرب سبحت وحضرت ملابسي
وطلعت بسرعه لگيت قرطاجه مكمله .. نزلت لگيت السايق كمال منتظرني صعدنا بالسياره بسرعه .....
دخلت ع الملهى وإني افكر اشلون اخلي سميره تحچي كولشي تعرفه عن أبويه .....
رحت على زكريا مسؤول عن البنات وگوتله قدم النمره مالتي لان شويه تعبانه ....
وبالفعل رگصت وكملت نزلت من المسرح شفت سميره گاعده يم قرطاجه يشربن بيره ويسولفن.....
رحت عليهن سلمت عليها وبوستها ودخلت عليها بالسالفه رأسا گوتلها أبويه شجابه على نزوكه ....سميره اني عرفت كولشي .....
هي ابتسمت وگالت شوفي حبيبتي وداد لتسألين عن ماضي ابوچ لان هسه هو توفه وعلاقته بنزوكه شي يخصهم وهو ما قصر وياكم ولا ويه امكم وسؤالج هذا وجهي لامچ لان ياعيوني ماكو رجال يعوف مرته ويروح على وحده گحبه وكاوليه لو ما اكو تقصير داخل بيته ....
شنو قصدج خاله سميره ....قصدي واضح ابوج وامج ماكانوا متفاهمين امج مغروره وشايفه نفسها حتى على خلفتها متعجبه هي بت شيوخ وتأمر وخدم وحشم....
ماعدها حنيه لا على رجلها لا انوثه لا رقة امرأه وحتى على عليكم خلفتها من غلطتي كان المفروض تسترج وطمطم السالفه وتخليها متطلع حتى لاخوتج وتسترج مو تروح تخابر ابوج وتفضحه حتى گدام اخوته ...الحد ما كتلته الحرگه وتنطي لاخوج سچينه وادگوله اذبحها وتحطم مستقبله تره أحنه جيران والجار عالجار متورج وداد .....
بس هذا مو موضوعنا ....اريد افتهم....
اسكتي نزوكه تاج راسج هي ما ودت عليج انتي رحتيلها ومعزتها لابوج خلتها تلفيج وتخليج معززه مكرمه
ولوما اني وهي جان هسه انتي مذبوحه ومحد يقره عليج الفاتحه وداد ...
بعدنا دا نحجي واجه شمعون سلم على سميره وبوسها استغربت هذا منين يعرفها ....؟؟؟
انتبهت عليه وگالت لتستغربين أحنه أصحاب كار وواحد يعرف الثاني ....
راح شمعون ع المكتب وگالي نشوگ الحگيني ع المكتب
من رحت وراه سميره كالت ماهر ازوج محاميه مثله وأثناء ولادتها ماتت هي والطفل ....
رديت عليها يمهل ولا يهمل ....
دخلت على مكتب شمعون وگعدت سألته شنو نوع الشغل گلي بسيط انطيج علاكه جنطه بيها غراض تاخذيها انتي وكمال توديها على بالبصره اربيل كوت وهمه ينطوج علاگه مثلها بس بيها فلوس ....
اترددت اوافق بس هو گلي لتخافين انتي ويه شمعون واذا عجبني شغلج راح اكافأج ....
الفجر رجعت اني وقرطاجه وصلنا كمال للبيت انتبهت ع السايق يراقبني ....بس ما اهتميت گولت بيني وبين نفسي هذا مشتهيه ومستحيه ....
دخلنا للبيت الكل نايم بس نزوكه تشرب أرگيله ومخليه رجل على رجل سلمنا عليها ودخلنا غرفتنا بس حسيت بيها هي تعرف شي ....
سولفنا على شغلي ويه شمعون قرطاجه گالت وافقي گوتلها ليش گالت بعدين افهمچ بس نشوگ عندي سؤال واستحي اسأله اخاف تزعلين مني .....
ياااا ازعل منج انتي تذبحيني ما ازعل منج گولي شنو السؤال
سؤالي صحيح امچ هيچ طبعها ...شايخه حتى عليكم ....
سحبت نفس كولش طويل وجاوبتها ولج عمرها ما حضنتني ولا قربتني متعصبه والشرف والعار لاگاموا ولا گعدوا عدها اخوتي شباب ماعدهم حرية الرأي مخوفتهم وميعجبها العجب قاسيه ....بس تدرين ما الوم أبويه من عشك نزوكه صحيح هي موزينه بس بگلبها رحمه وحنان....
الله يساعدنا ....
وافقت على شغلي ويه شمعون وكانت أول طلعه الي للبصره كملتها ورجعت سلامات قابلت انطيتهم علاگه حمره وانطوني جنطه مليانه فلوس استغرقت روحتي اسبوعين رجعت بوجهي ع الملهى ....
سلمت الفلوس الشمعون وهو فرح من شغلي وانطاني الفين دينار سويسري اني گوتله هذني هواي گلي تستاهليهم نشوگ
روحي ع البيت ارتاحي يومين وتعالي ....
رجعني كمال بس كنت متفاجئه هذا شبي يباوعلي مخبل لو يريدني افتحله رجليه ....
دخلت للبيت شفت البنات مجمعات مسويات عصرونيه كباب ولبن گعدت وياهم وانطيتهم هداياهم بس شفت من ضمن البنات بنيه جديده وحلوه ومرتبه سالت عليها جواهر گالت هاي مهندسه اسمها بدور اهلها جابريها تزوج ابن عمها بس هي رافضه متريده لان متعصبين وشكوكيه واصلا هو ما دارس بحياته جاهل فهي هربت وجايبتها وحده على سميره وسميره جابتها على نزوكه والمصيبه هي بت بيوت ...
صدوگ قرطاجه ...اي ولج صدوگ وهسه يردوني أعلمها على شغلنا حتى يبيعوها....
معليج قرطاجه علميها واسكتي ....يا ولج شعلمها خطيه تدمر حياتها مثلنا اصلا گعدت انصحها وراح اساعدها تهرب
...وشمدريچ متوگع بالاسوا ....لتخافين اذا هي ذكيه متوگع ربچ ينظرلها....بس اريدچ تساعديني خوش .....
